富不過三代的悲慘故事

我閒來無事，偶爾會同相熟經紀朋友去參觀豪宅，八卦一下。上星期參觀了一間位於港島區的五千尺豪宅。睇完後，唔覺興奮，反而好唏噓。

睇樓睇到唏噓，真係估都估唔到，皆因這幢豪宅背後埋藏了一個悲慘故事。步入這幅複式豪宅，第一個感覺係回到了30、40年前，整幢豪宅設計充滿60、70年代風格。華麗的巨型客廳，配合華貴燈飾同巨型梳化，還有一個酒吧，給人的感覺係當年主人經常都有宴請酬酢，賓客盈門。

問經紀原屋主何許人也，知道係本地顯赫世家的第三代。睇這豪宅的現狀況，不期然令我想起南唐李煜《破陣子》裡面的幾句詞：「最是倉皇辭廟日，教坊猶奏別離歌，垂淚對宮娥。」主要是「倉皇辭廟」四隻字。

這是銀主盤，法庭發出收樓令，逼令主人在7日內急急離開，除了好貴重的物件外，大部份東西都留在屋內，百物雜陳。由牆上懸掛的家庭照片，到名貴的水晶煙灰缸，到名牌衣服皮包，都留在豪宅內。究竟係屋主忍唔住面對要急急搬出這個家的慘局，抑或根本來不及執拾搬走，已經不得而知。

這幢豪宅現時由銀行擁有，屬拍賣樓。至於豪宅點解轉手到銀行，經紀亦係不甚了了。我後來在網上查看，再問問其他老友，才知道豪宅背係埋藏著一個叫人唏噓不已的故事。原來擁有這幢豪宅的貴公子，現時已經七十幾歲，以前的確非常顯赫，之所以落得這般田地，晚年連居所都不保，全因為兒子的拖累。

據聞他的兒子不學無術，一把年紀，仍然攤大手板，問父親拿錢投資。終於有一次，他的兒子話要與朋友合作投資一個大陸項目，貴公子經不起兒子的日纏夜纏，終於簽了份擔保書，替兒子作保。其中細節唔太清楚，最典型的情節係兒子遇著老千，結果蝕大本，欠下一身債，簽下擔保書的爸爸也因而受累，居住的豪宅都要賣給銀行還債，最後要破產收場。一生享受慣的貴公子，到晚年變得一無所有，要過番普通人的生活，往後的日子，都好難適應。

常言道，富不過三代，這位貴公子，果真係本地超級富貴家族的第三代，富貴到了他的一代，剛好玩完。這句說話，又確係好多富人的寫照，有其內在智慧。

步出那幢豪宅，深吸一口新鮮空氣，胸中才沒了那種鬱結的感覺。舒暢之餘，我從中學到了兩個教訓，第一係無論你幾咁有錢，也一定要教好子女，教得唔好，隨時身受其害。第二，當然係唔可以俾自己跌入這樣破產收場的處境啦，投資者要量力而為啦。

黃毅力

黃毅力

** 博客文章文責自負,不代表本公司立場 **

我有一位朋友， 他的上司是位惹火尤物， 可能是女性的關係， 在行業上十分進取、激進， 惹來同行們的妒忌及攻擊，而她亦都喜歡用耳仔思考， 聽一些親信打小報告， 就是因為這樣， 好多忠臣義士就無緣無故被她解僱了。

我朋友在這間公司是一名部門主管， 位高權重， 他其中一個責任是不時跟顧客和同業們進行友好聯誼， 推廣公司的產品與服務。 我問他，在這些聯誼活動上已有很多忠臣義士死於小報告上， 為何你還健在呢?!  他對我說：「老細咁「行」， 咁惹火， 你話會唔會無人在我面前講老闆是非呢? 你認為作為一個員工，當眾人不斷在講你老闆是非的時候， 你的回應應該是怎樣呢? 與人嘈交、 以一打十， 還是加入是非圈內舒發自己的真情呢? 」

那一刻， 我真的在想如果我是他又會怎樣呢？ 但他對我說：「剛才所說的例子都不是， 試過有一次，參加了業界的一個春茗，我們的餘興節目去了卡拉 ok， 我跟一班同業聯誼之際， 在接近凌晨兩點， 當時我很眼瞓， 又有少許醉意， 結果就傍著梳化小睡片刻， 突然，在耳邊聽到有人提起老闆的名字， 我立時張大雙眼， 那人更說他跟我老闆很熟， 我立刻起來跟他握手， 打了一個招呼， 咭片都還沒交換就九秒九地跟他們道別。 又試過在一次晚宴上， 有位同業前輩一坐下， 就當我是世侄般好到你都不相信。當時，他跟我說，覺得我老闆有很多問題， 嘗試在我面前講老闆壞話， 我即時請這位前輩不要說了，否則這餐飯會吃不完，而我也會先走。」那個前輩對我朋友說當他是世侄， 大家打開天窗說亮話， 他為何這麽絕情呢？我朋友繼續跟 他說：「 你現在將會講我老闆壞話， 我當聽到還是聽不到呢？ 但事實是冇可能聽不到的， 那聽到之後我回應又死， 我不回應又死， 你教我怎樣做呢？若然他日傳返去老闆的耳朵裡， 我就做了個罪人； 那如果是這樣，那就不如耳不聽為乾淨， 眼不見為不在了， 你認為對嗎?」

聽完故事後， 我問他其實他的老闆是否真的那樣壞， 朋友說這個世界不能用主觀感情去判斷好與壞的老闆， 只有是否準時出糧又會論功行賞的老闆， 能夠做得到的， 那個就是好老闆； 如果自己份工能夠做得長，而 能夠繼續做落去的話， 此時此刻他就是一個最好的老闆。試想想， 如果佢是一個壞老闆，又或是一個不夠好的老闆，我隻腳就已經找了另外一個新老闆了。

後記：做一份工， 故勿論你的老闆是真的好還是不好， 只要你還健在不轉工， 或者找不到第二份工， 你就要懂得去尊重老闆。 這樣， 自己的心靈、 心情及工作就自然會覺得好一點。

黃毅力