嚇到跌落地的民調

港大民意研究計劃立法會選舉滾動民意調查，結果顯示建制派的地區直選議席預料將維持在17個，而泛民將失去2個議席，由18席減至16席，建制大勝泛民。當中最特別的是而建制派有4組名單可以取兩席，包括港島區葉劉淑儀、新界西田北辰、九龍西梁美芬和超級區議會李慧琼，呢個結果嚇到政治觀察家跌落地。

Ariel覺得最離譜的是九龍西的結果，港大民調顯示，排第一的經民聯梁美芬的支持，大幅拋離第二位黃毓民的16%和並列第三的公民黨毛孟靜及民建聯蔣麗雲的15%，令梁美芬名單第二位的梁文廣都可以入局。

不過聽區內人講，九龍西今屆增一席到六席，現時選情佔優排頭三位係毛孟靜、蔣麗雲和黃毓民，他們比較穩陣，其餘排落嚟係民主黨黃碧雲、經民聯梁美芬、青年新政游蕙禎、新思維狄志遠和民協譚國僑，五組名單支持度相近，五人爭三席，都係一場惡鬥。所以個笑位係梁美芬根本唔穩陣，何解在港大民調中可以大超前攞兩席？

港大滾動民調現時最大問題係受訪人數太少，總受訪人數只有1,048人：港島187人、九龍西97人、九龍東181人、新界東280、新界西303，正負誤差高達4%至8%。以一般抽樣調查要有500個受訪者才具有代表性，呢個調查在九龍西只有97個樣本，難怪會出現如此離奇的結果。我估到呢個調查累積到有4000、5000個樣本時，參考價值會大啲。

睇另一個民調，香港研究協會亦於7月14日至29日展開全港性隨機抽樣電話訪問，成功訪問了5,011名選民，結果就顯示建制派只能在直選中取得14席，而泛民能夠取得19席，餘下兩席同樣由方國珊和王維基奪得(此結果和港大民調相同)。

香港研究協會

兩個民調的差別在於，香港研究協會結果推論不出建制派名單可在4個組別大幅領先可以取得第二席。在香港研究協會的民調中，只有新民黨田北辰名單在新界西有機會取得第二席。

Ariel

** 博客文章文責自負,不代表本公司立場 **

人離開崗位，講話都大膽啲。這一陣子立法會主席曾鈺成話選特首， 明挑CY， 但不再尋求連任的工業界立法會議員林大輝又話質疑曾主席的能力噃 。

大輝昨日在電台節目談到特首人選， 佢話如果有能力更高的人競逐特首，不會投票給現任特首梁振英； 反之如果其他候選人比梁振英能力更低、更沒誠信， 便會投票給梁振英。

被問及對立法會主席曾鈺成的看法，林大輝說曾鈺成作為主席， 無法解決議會問題，懷疑他將來如何解決香港的問題。

大輝來自唐唐的陣營，週不時都單打一吓CY，但佢昨日講到「 其他候選人比梁振英能力更低、更沒誠信」，真係可圈可點，呢個「 有人衰過CY」的觀點，又真係可以抗衡一下「 ABC論」(anybody but CY)。大輝即係質疑曾主席做唔好議會主席，無能力做特首咁話。

Ariel早已聽聞，立法會內建制派早有意見，認為拉布的局面， 多多少少和曾主席手鬆有關。而家時興點人頭，一唔夠人流會， 又俾人隊建制派懶無出席。建制派話如果主席鐵腕一夠9、10個鐘 就收工，唔俾拉布議員重覆講嘢，建制派可以頂到。 但開會開到一日都唔止，夾埋30、40個鐘，一點人頭泛民走晒， 建制派點頂？所以建制派對曾主席都心中有氣。