政事
政務司司長林鄭月娥昨日出席基本法大使培訓計劃活動， 對住百幾個學生演講，佢主動將原定談退保的演講內容，改為講基本法，仲歡迎記者入內採訪，話閉門同學生演講，怕俾人話佢洗腦咁話。
林鄭演講惹起政界中人注意。佢形容今次選舉有人打着港獨旗幟參選，是新的形勢，政府要重新思考如何回應，以保證選舉合法、公開、公平、誠實，佢強調「誠實呢兩個字好重要」。
林鄭不點名批梁天琦為求入立法會，「擘大眼講大話」，林鄭指倡港獨參選人違反《基本法》 中香港自古以來是中國領土的最重要條文，佢更力挺同屬政務官的選舉主任做法合法。
據悉，政府內部有個說法，怕取消部份候選人資格，惹起反彈，會影響建制派的選情，所以林鄭出招，以「誠實」為焦點，針對港獨候選人作失實聲明，選舉主任有權取消資格。
不過政壇八卦友話，林鄭出招，有另一重意義。
首先突出誠實，佢最有資格講。其次係人都知佢有心想玩特首賽，如果話佢有乜欠缺，可能有人話唔知中央係唔係百分百信任佢。但林鄭今次不止部署在選舉狠打港獨，如今主動出面保駕護航，咁大件硬骨頭都啃得落，照計都可以在「信任」一欄攞吓分噃。
Ariel
** 博客文章文責自負,不代表本公司立場 **
前廉政專員施百偉早兩日接受南華早報獨家專訪，話佢不認為廉署前署理執行處首長李寶蘭離職是因為政治壓力。但施百偉今天演講時調子有點變，認為要修例防止行政長官干涉廉署。施百偉為何變調，耐人尋味。
施百偉在南華早報昨天的訪問中說，李寶蘭「非常不可能」 因為政治壓力辭職。他反而擔心廉署的聲譽受連串政治爭議影響，他說:「香港愈來愈政治化，人們對未來有點緊張，將很多事情看成為大陸干預的結果，我不能肯定這些干預是否存在，我只是不知道。但如果講到(大陸干預)廉署，我覺得非常不可能，我並不覺得我只是天真才這樣想。」
但施百偉今天在外國記者俱樂部演講，矛頭就轉向了特首，佢話廉署成立時條例訂明，廉政專員是受行政長官管轄， 過去的行政長官和港督都有自我克制，因此有關條文未有影響廉署的工作，但現時有需要檢討條例，刪除受行政長官管轄的條文，並加入不受任何干涉的字眼，令廉署的自主運作可以受到法律保障。
知情人士話，施百偉在8號到港，接受完南華早報訪問後，見過民主黨前主席李柱銘，兩人傾過乜就不得而知，可能李柱銘影響了施百偉，令他今日就改口講叫政府修例，叫特首不再管廉署。問題是廉署如不受特首管轄，又受誰管轄呢？若由其他官員管轄，又一樣難免被指不中立；若受一個什麼委員會管轄，誰能確保廉署不會變成無人控制到的獨立王國呢？
