一條「如果我是丁蟹」的問題,竟然考起證券界翹楚、現任議員張華峰,真是令立法會選舉增添不少娛樂性,笑聲震地球。
到底有幾「趣」?本來對港台論壇不予厚望,誰不知主持人在立法會金融服務界論壇的一個「如果我是」的環節中,問到候選人張華峰:「假如我是丁蟹時」,張華峰竟然這樣答:
「如果我係丁蟹,我就要了解佢嘅業務性質,了解佢工作範疇,了解佢嘅專長。知道佢嘅專長在哪方面,才可以引導佢發揮專業,為社會服務,我希望對丁蟹哩個人,有多啲認識,我暫時對佢認識唔深,希望有機會讀多啲關於佢嘅新聞,也希望在佢身上學到佢嘅經驗、專長,為社會或他的行業服務。」
主持見佢答「引導丁蟹為社會服務」,都知道唔妥,追問信唔信有「丁蟹效應」?張華峰繼續以無限想像力來作空泛回應:「丁蟹效應,有好有唔好,好嘅方面,大家要學習;唔好嘅,大家要改變,哩個就係我對事對人嘅睇法。」
真是聞者笑爆,見者噴飯,可能張華峰都真是住在華山頂峰,不食人間煙火,所以連丁蟹是誰都不知道。
最後張華峰也知衰,在facebook「補鑊」回應:「是咁的,我一直都知咩係秋官效應,仲知有大行就哩個效應出報告,但我真係無睇過大時代,更加唔知秋官嘅角色叫丁蟹,所以當日只好發揮我驚人嘅想像力同臨場應變。如果真係引起誤會,係度講聲唔好意思。」
這個驚人想像力真是相當搞笑,網民在港台論壇的網上回應是這樣的:「丁蟹都唔知係邊個。只有幾個可能:佢來自火星,佢數拾年來都唔睇CCTVB,完全無常識,對香港時事從來不理會。完全唔識聽廣東話……」;「丁蟹都唔識,佢係咪香港人嚟㗎」;「丁蟹唔識,鄭少秋都識掛! 俾埋張相你睇都唔知?」
相比對手同一屆別立法會前金融服務界議員詹培忠的兒子詹劍崙的答案,真是高下立見,「我至少不會推自己三個兒子跳樓,在股市上,勝敗乃兵家常事,有輸有贏,這鋪輸了,總有翻身時候。如果我是丁蟹,我會知道遊戲規則如何玩,不是盲目的,股市不是賭博,也不是一個賭場,而是一個純人為的市場,中間極少涉及運氣的成分,不要太過依賴運氣,一分耕耘,一分收穫,一分讀書,一分回報。」
兩人選情競爭激烈,特別是在證監會及港交所今年6月發表關於上市監管架構改革的諮詢文件,建議改革審批新股架構,初期張華峰認同新制度更有效改善效率,及後被對手指為吳三桂,出賣業界利益,隨即「華麗轉身」,轉軚認為要擱置檢討。詹仔反對諮詢文件,對張華峰狙擊相當成功,令到競逐連任的張華峰的選情,甚為吃緊。
這界別還有候選人徐聯安。
Ariel
** 博客文章文責自負,不代表本公司立場 **