松哥「被逼」支持鬍鬚曾

睇新聞見「梁錦松稱對曾俊華很有期望」的標題，嘩咗一聲，心諗難道松哥已完全放棄爭做特首，改行支持鬍鬚曾去選？

不過睇番內文，原來松哥和鬍鬚曾出席同一個「惜食堂」的活動， 記者問松哥是否支持財政司司長曾俊華參選特首，以及曾俊華是否能團結香港時，松哥咁答， 希望領導香港的人能有效落實一國兩制，帶領香港發展經濟、 改善民生，又引用已故新加坡前總理李光耀的說話，能「 分配財富和創造財富」。

松哥又話，政府很努力工作，但如果社會太撕裂和分化，很多事都做不了。他向站在身旁的鬍鬚曾說對他很有期望。鬍鬚曾則立即回應說，像他昨天在網誌說，香港是很有希望。

記者咁問，鬍鬚曾又在附近，松哥都好難唔話對鬍鬚曾「很有期望」 。唔知記者如今再問松哥會否選特首，佢又會點答呢？

講起鬍鬚曾，而家政界飯局一個流行話題， 就係鬍鬚曾會否辭職參選，有高人話，雖然好多人幫鬍鬚曾抬橋，但以他比較恬退的性格，若無阿爺祝福，唔似會夾硬出來選， 暫時不似會辭職。講到辭職，可能葉劉辭行會成員夾硬去馬，機會仲大啲喎。

Ariel

** 博客文章文責自負,不代表本公司立場 **

今日有人在高登討論區上，貼出幾張特首梁振英買iPhone的照片。

圖片所見佢在蘋果店內試用新iPhone 7，一邊聽店員介紹，一邊講電話，唔知係唔係問緊太太想要邊部機。另一張照片見到他在排隊等俾錢，同普通市民一樣，冇乜特別安排俾佢買機。

網民留言都幾多樣化，有人話佢夠親民無收大陸佬禮物，有人問點解佢唔搵老婆去買，都有人笑佢係咪特事特辦可以排頭位，亦有人問係咪搞緊選舉工程，但總體反應比較正面，都有幾多like。