原來有「危」有「機」，係完全可以套用喺黑暴嘅場景。「危」，係好多人被慫恿去犯法，坐監收場；「機」，原來係制造咗好多商機，俾一批奸商借「黃色經濟圈」，去賺到盤滿砵滿，又或者係比機會啲黃人，用基金或眾籌平台，去中飽私囊。總之，一雞死，一雞鳴，佢哋到而家，都靜待時機，再搵一筆。
好似嗰個所謂人道支援基金「枯葉榕」，最近又活躍番，佢哋應該好等錢使！
呢個「枯葉榕」，2021年係英國註冊，聲稱係一間非牟利社會公益企業，主打係資助因黑暴喺香港被拘捕，或者坐緊監嘅人同家屬，每個月俾三四千蚊佢哋，直至放監為止。
「枯葉榕」嘅三個註冊董事，都係英、美國藉嘅香港人，係公開媒體同社交平台，都淨係知佢哋自稱係會計師、教授同媒體工作者，其他資料，一律欠奉。高人話，佢哋三個係黑暴前後已經離開咗香港，一直冇返過嚟！另外，網頁聲稱「枯葉榕」請咗人權組織，同埋公眾人士去監察基金嘅財務狀況，確保啲錢唔會亂用咁話。咁搵咗邊個負責睇住盤數呢？ 原來全部都係敗走嘅黃人同黃組織。最出名嘅就係兩大通緝犯及指明潛逃者「衣冠聰」同鄭文傑，仲有一個叫張x莉嘅前灣仔區議員，加一個叫澳港聯嘅澳洲港人抗爭組織。
先唔講通緝單嘢，鄭某就返過內地招妓被拘留過；而「衣冠聰」就傳聞係2018年做立法會議員期間，性侵佢嘅助理，呢單嘢係黃人圈人人都知，所以搞到美角佬嘅「香港民主委員會」都要同佢割蓆。呢兩位仁兄嘅道德同操守標準，會認真管數嗎？至於張X莉，高人話佢又係着草咗去英角，另外嗰個組織，連一個人名都冇開過？！ 全部睇數嘅人，都係check唔到、搵唔到嘅「太空人」！ 我零零發覺得，真係信佢一成，雙目都會失明！ 而之前英國嘅BNO 5+1, 10+6都未搞掂，政治庇護、難民身份又未等到，佢哋自己都顧唔掂，加上當「生果佬」同「不幸銅」單案審完之後，佢哋啲政治光環，應該都必定所剩無幾，到時冇利用價值，會發生咩事，大家都唔知囉！
講返轉頭，我唔知佢哋會唔會落格，喺個基金度抽起啲錢俾自己用？如果「衣冠聰」同鄭文傑係個基金攞錢用，如果大家又捐咗錢俾呢個基金，咁大家就有可能犯咗《維護國家安全修例》第90條，即係用任何方法直接或者間接提供資金或經濟資源比潛逃通緝犯，最高可以判7年監禁，唔係講笑架！
至於個基金嘅捐款方法，佢哋叫人用Stripe平台比錢，或者透過Bitcoin平台捐錢，因為咁係唔會顯示「枯葉榕」個名同帳戶號碼。表面上係保護私隱，其實都係想增加警方調查嘅難度。 仲有，啲錢捐咗俾邊個又check唔到，所以呢個安排係咪另有企圖，就無從稽考喇！ 而想申請支援嘅人，要交出身份証、住址同社交媒體聯絡方法等等，又叫人用加密電子郵件同埋虛擬私人網絡去溝通。咁鬼鼠！ 啲個人資料俾咩人又唔知，人地點用就更加冇得控制！
雖然有咁多弔詭嘢，但係「枯葉榕」喺個網站，仲振振有詞咁寫低佢哋嘅「未來大計」， 包括，「在囚支援指南持續更新計劃」、「助學金及獎學金計劃」及「推動海外香港文化教育與研究主流化」，其實係無人知做緊啲乜！ 佢哋只係喺度Sell緊概念、願景；呢個係「未來計劃」，信則有，不信則無，信不信，你自己決定啦！
其實懲教署已經有完善嘅系統幫助囚犯更新，俾機會佢地讀書，學吓其他技能，又有職業輔導…….之前大家都有聽過，在囚人士喺公開考試嘅佳績、第一個國安犯唐英杰、同埋黑暴受槍傷嘅嘅曾子健，係監禁期間讀書嘅情況。你哋有懲教署唔信，走去信埋一啲唔知咩人，係山長水遠搞嘅嘢，唔通佢哋喺外國幫你搵份工，俾你喺香港做咩？上次已經講咗嗰隻「後鳥」，聲稱幫屋企人買「平安包」俾在囚人士，已經呃咗唔少錢，希望今次啲有心人醒啲啦！
黑暴之後，有好多著咗草嘅通緝犯、黃人，係外地乾晒塘㗎喇，佢哋梗係要諗下計搵錢啦。「枯葉榕」成個基金佈局，如果話唔係一個騙局呃錢、呃同情心，都好難說服我零零發！ 你要我捐錢去英角俾你，而啲錢又要再迂迴過番嚟香港幫「手足」，呢啲技倆係咪似電騙多啲？ KK園騙案，起碼都話呃你，去幫自己嘅親朋戚友吖，但你而家幫緊邊個都唔知，真搞笑！
最後我零零發提醒大家，就算你有愛心、有多餘錢，都要唸清楚至好捐錢去個基金度，如果唔係，隨時犯咗法都唔知，到時真係同班「手足」係監倉「共渡時艱」喇！「小心呀Baby！」
鍾情局．零零發
鍾情局
** 博客文章文責自負,不代表本公司立場 **
「白鴿黨」4月13號召開特別會員大會，通過授權中央委員會，跟進解散一事。黨主席羅XX一直冇透露解散具體原因，而陰謀論者就不斷講有中間人，威脅「白鴿黨」解散。
「白鴿黨」1994年成立，以「理性、溫和民主派」做定位。當時嘅黨員有律師、社工、又有校長、教師，都可以講係星光熠熠，所以輝煌時期佢係香港最大嘅政黨之一，亦都係立法會嘅第一大黨，但點解31年後會落得如此下場？我零零發今次嘗試用一個普通人嘅角度，睇吓「白鴿黨」點解會壽終正寢。
「白鴿黨」最大嘅錯誤就係黐咗「生果佬」! 睇返「生果佬」單案審訊時透露出來的堅料，發現早在喺2013年10月到2020年4月，「白鴿黨」透過「生果佬」親信「肥仔Mark」，一共收咗接近$3400萬嘅捐款。但係「生果佬」嘅捐款，究竟係自己扲荷包，定係背後有美角支水喉，到而家都係一個謎!「白鴿黨」究竟用咗啲錢去做咩呢？呢個係第二個謎! 收得人咁多錢，如果話「白鴿黨」嘅決策同行動無被影響到，都好難令人信服！
而令「白鴿黨」行錯路嘅另外一個人物，就係創黨主席「白頭李」。聽聞1989年六四事件之後，「白頭李」已經同美國有千絲萬縷嘅關係。「白頭李」係回歸前後分別有兩個美角女人做佢私人助手，分別係Minky Worden 同Ellen Bork。前者嚟香港之前，喺美角司法部工作，佢老公係美角「華x街日報」前出版人；而後者係一個美角右翼智庫組織嘅要員，高人話呢個組織嘅主要工作，係干預香港事務同埋針對美角政府對香港嘅政策，傳聞時任美角副總統、正副國防部長都係呢個組織嘅成員添?!咁點解呢兩位女士肯咁屈就，來香港做「白頭李」個私人助理，大家諗下啦！
另外喺法庭審訊入面睇到，「生果佬」同美角嘅關係非常密切，而「生果佬」又同「白頭李」好鬼老友；好似係喺2014年佔中前，呢個「白頭李」、前主席「AV仁」、創黨元老「李X達」等，就已經跟「生果佬」眉來眼去，仲斷正俾傳媒，影到幾個人經常去「生果佬」屋企食飯、甚至上埋佢隻遊艇同啲外籍人士密密斟。所以有人話「白鴿黨」俾外來勢力騎劫咗，我零零發覺得一啲都唔出奇！
2014非法佔中令社運進入「遍地開花」時代，打著「本土」同「勇武」旗號嘅激進派崛起，所以賣溫和嘅「白鴿黨」，影響力大不如前。「白鴿黨」為咗搶選票、保議席、撬金主，再一次做咗個自掘墳墓嘅決定，就係同激進派同流合污，令到成個黨都變晒質，同政府對著幹，為反而反。「白鴿黨」曾經係中環「誓師」，表明若日後行政長官嘅選舉方案唔係真普選，佢哋就會參與「非法佔中」。當時黨入面一啲溫和派嘅黨員，好似狄X遠咁，都因為睇唔過眼而主動退黨。
到咗2019年黑暴，「白鴿黨」已經變得非常激進，老鴿嫩鴿傾巢而出，支持班暴徒四出打、搶、砸。當年7月1日「弱智瘋」帶住班暴徒一齊衝擊立法會、7月21日「高佬廷」就喺元朗港鐵站帶頭搞暴動、11月末代黨主席羅XX亦出現係理大暴動現場……當時嘅「白鴿黨」已成為一言堂，容不下第二把聲音；當日創黨成員陳莊X撰文抨擊黑暴，竟被即時革除黨席；不過佢就因禍得福，同反中亂港派割蓆。
唔知係咪上帝要你滅亡，必先令你瘋狂。「白鴿黨」喺2019年區議會選舉嘅時候，呃到班市民嘅支持，得到91個議席。但攞到咁多議席之後，「白鴿黨」不但無聚焦經濟民生，發揮正面作用，反而喺議會不斷「拉布」，令香港陷入嚴重嘅政治內耗。
喺2020年頭，「白鴿黨」又高調支持「戴妖」嘅「攬炒十部曲」，即使到《香港國安法》生效之後，呢班「鴿」仲繼續大模廝樣咁，參與推翻特首嘅非法初選，為「攬炒十部曲」鋪路，赤裸裸咁挑戰法律同顛覆國家政權。可能啲「鴿」當時仲好天真咁諗，以為就算有事，都仲有「生果佬」同背後美帝頂住。最終，9名參與「攬炒」圖謀嘅「白鴿黨」成員，分別被判4年2個月至7年不等。
2020年底，特區政府依法取消咗多名反中亂港嘅議員資格，「白鴿黨」嘅立法會議席亦因此全數「清零」。2021年立法會換屆選舉嗰陣，一眾「白鴿黨」骨幹，唔係犯國安或暴動罪，齊齊喺監獄團聚緊，就係流亡海外。所以「白鴿黨」根本派唔到人出嚟參選，於是立法會議席再次「食蛋」! 連議席都冇，又點可以發揮影響力呢？
一個政黨成功，我零零發覺得需要有幾個元素，互相緊扣一齊。第一，政黨有清晰嘅理念；第二，有一班支持呢個理念嘅市民；最後，要有一班有執行能力、有遠見嘅領袖。當年「白鴿黨」創黨嘅時候，定咗10個基本信念。第一個就係「香港是中國不可分割的一部分，我們支持香港回歸中國。」相信當年好多市民都因為咁，而支持「白鴿黨」。但咁多年來，「白鴿黨」不但違背初心，選擇走上反中亂港嘅不歸路，而且一而再，再而三損害香港人嘅利益，仲接受黑金，放棄非暴力嘅底線，最終令到支持佢嘅市民逐漸離棄佢哋。而「白鴿黨」內，坐監嘅入咗監倉，走咗佬嘅大佬，就喺遠方叫人衝，自己鬆。而有能力擔大旗嘅人幾乎係冇，試問個黨點可以運作落去呢？所以解散是必然嘅事!!!
「白鴿黨」既然衰咗，就好心靜靜雞解散就算啦喇，做乜跌落地揦返拃沙?成日暗示有中間人叫佢哋摺埋，等到坊間亦有好多唔同嘅揣測……如果你俾我零零發「猜猜誰是中間人」，我會話係美角叫佢哋收檔多啲囉! 因為佢哋已經冇閑錢養「鴿」；就算有，「白鴿黨」做嘅嘢都不成氣候，冇料到、幫唔到手，而家仲唔叫你摺埋等幾時呀？
鍾情局．零零發
