搶人才，香港邊有得輸！

最近瑞士洛桑國際管理學院發佈嘅「2025年世界人才排名」，香港由舊年嘅第9位連升幾級到今年第4，係咁多年來最高排名，亦係亞洲No. 1！

其實香港不嬲都吸引到好多人才，話說自90年代初，已經有好有「強力背景」嘅美英過江龍嚟香港落腳，只不過以前冇呢啲排名榜，如果唔係，香港一定係世一！

William 蜜薑
「蜜薑」1958出生，阿爸係前美角聯邦探員。佢係美角共和黨黨員，波士頓大學傳播學系碩士畢業，係多間美角媒體公司任職過高層，包括做過《華x街日報》。90年代初嚟咗香港，做《遠東XX評論》編輯。後來無端端係1997年7月7日，做咗「生果佬」嘅天主教教父，之後更加做埋佢嘅遺囑執行人及遺產信託人！「蜜薑」返美角之後就彈起咗，分別做過前總統「小布」，同埋傳媒大亨「梅X」嘅(首席)演講稿寫手，喺政界同傳媒界都好吃得開。

Mark 西門
「肥仔Mark」而家62歲，美角共和黨黨員，美角前資深情報局特工之子，所以佢係大學畢業之後，子承父業，做咗美角海軍情報分析師。2000年經「蜜薑」介紹，做咗「生果佬」私人助理。

當年「肥仔Mark」只係30幾歲仔，好地地喺老家為國家貢獻緊，點解會離鄉別井嚟香港，做人哋阿四嘅？唔通「生果佬」真係有非凡魅力，連美角特工都肯越洋從低做起？高人話冇人知「肥仔Mark」幫生果佬做乜，真係好詭秘！ 我零零發相信，佢可能都係被安排嚟香港，換個身份，繼續做番老本行！「肥仔Mark」2020年著草返咗老家之後，被踢爆有份做假，抹黑當時總統參選人「登登」個仔，企圖影響選情！唔知當年喺香港有冇做過類似嘅嘢呢？

路易斯Crovitz & 太太米奇Worden
呢兩公婆仲離奇，美角共和黨嘅「路易斯」係《華x街日報》嘅前話事人，又係美角電子媒體集團嘅總裁，係傳媒界響噹噹，有錢有地位。係2018-2021年，佢做咗生果佬嘅「No.1傳媒」獨立非執董，雖然係大有錢佬，但冇人會嫌錢多嘅，每年收番幾十萬董事袍金都好呀！可能因為咁，加上佢以前係「蜜薑」老闆，所以而家《華x街日報》，就頻頻出招撐「生果佬」單案，又不斷抵毀香港司法制度同人權狀況啦！

更吊詭嘅就係佢太太「米奇」，佢原本喺美角國會做份優差，但放棄高薪厚職，竟然係1992年飛過嚟，做「犯民」立法局議員「白頭李」嘅私人助理成7年咁耐 (又係私人助理？) 。香港搶人才真有一手，就連私人助理呢啲非專業嘅基層職位，都可以搵到咁高Quali嘅人嚟做！ 「米奇」返老家冇幾耐，就做咗「美角人權觀察」電子媒體主任，後來更晉升為全球倡議總監！

雅倫Bork
「米奇」係1998年臨走前，就直接交棒比「雅倫」，繼續做「白頭李」嘅私人助理。呢個「雅倫」又係唔少嘢，佢之前喺「美角國會外交關係委員會」做幕僚，同啲議員及國務院關係密切。佢做完「白頭李」兩年私人助理，返祖家之後，就出任一個右翼智庫嘅副總裁，連升幾級。高人話當時美角副總統、正副國防部長，都曾係呢個組織嘅成員！我零零發喺度真係要對「白頭李」重新估計，點解只係一個大律師、一個立法會議員，可以請到咁多猛人同佢打工嘅？！

Mark祈福
「福伯」而家68 歲，回歸前由美角移居香港接近30年。佢曾經係兩份本地龍頭英文報紙嘅總編，「外國記者會」董事，以及「Asia公司領袖會」執行總監。係2018年嘅時候，佢同「路易斯」齊齊做咗「No.1傳媒」獨立非執行董事，2021年又一齊辭任。佢2020年返美角之後，創立咗「香港自由委員會」，搵咗一班黑暴逃犯，包括許穎婷、張晞晴做助理，又做埋黃媒「光X媒」同「零角」顧問，總之就「好事多為」！

Benedict 羅渣氏
呢個「羅渣氏」係70後英角人，人權活躍份子，早期係《華x街日報》做定期撰稿員（咁啱又係呢份報紙嘅？）。回歸前嚟咗香港，分別係幾個英文媒體同報紙做記者，並且成立CSW (人權組織)香港分會。聽聞佢同「生果佬」相識於微時，所以好friend。返英角後，有一日佢哋見完面，佢就係同日(即2017年10月20日) ，宣佈成立反華組織「香港監察」(HK Watch)； 2020年又加入咗「對華政策跨國議會聯盟」(IPAC) 。呢兩個組織，除咗反華之外，仲主打推動制裁特區政府同官員。

保羅Harris
「保羅」1976年係英角獲得大律師資格，1993年嚟咗香港執業，主要打人權案件。佢喺1995，同當時「香江大學堂」嘅陳X敏、羅x啟等人成立「香江人權監察」，呢個組織係美角國家民主基金會(NED) 資助成立嘅第一家香港機構，據聞當年NED曾經撥款1500 萬港元比佢哋。後來「保羅」返英角，以英角民主黨黨員身份，係2018年當選英角牛津市議員。佢之後又再返香港做律師，當年仲經「白頭李」提名，成功當選成為2021-2022年度大律師公會主席；佢在任期間，不斷發表針對香港國安法嘅批評言論。

「保羅」 2022年返咗家鄉之後，做咗「香港監察」嘅顧問，又加入倫敦Doughty 街大律師事務所！(呢間律師樓入面幾個律師，咪成日話係代表「生果佬」嘅外國偽律師團隊，亂咁嗡「生果佬」受到不人道對待囉……)

除咗以上呢幾個「外勞」越洋搵食之外，其實仲有好多海外「人才」潛伏喺香港各行各業，我零零發喺適當時候，會再出個「龍虎榜」俾大家睇！

言歸正傳，原來除咗「英角人」識得食住殖民地條水，係香港政商界搵食之外，估唔到美角「洋人」，都好欣賞香港獨特嘅環境，肯紓尊降貴嚟工作，唔通香港真係人工高、福利好、有前途？睇佢哋飲過東江水之後，個個返到祖家嘅士途都零舍唔同，睇嚟有香港歷練嘅CV真係吃香啲喎。不過，我零零發其實都分唔清，究竟係香港個老闆、班「外勞」、抑或係呢啲「外勞」海外嘅大老闆，先至係真正話事人? 究竟呢班「外勞」喺香港，邊份係正職、邊份係兼職呢？

總之，「東方之珠」嘅吸引力真係唔講得少，香港多年嚟都有吸引「專才」嘅不同原因。所以話，搶人才，香港點會輸呀！

鍾情局•零零發

鍾情局

** 博客文章文責自負,不代表本公司立場 **

最近「生果佬」終於要為佢多年來嘅惡行「埋單」，俾官老爺重判20年監禁！有人問：「佢衰啲咩要坐咁耐？」不如睇吓喺單案嘅審訊爆咗啲咩出嚟？

鼓吹制裁 摧毀香港

「生果佬」表面上係「生果報」老闆，實質係打住「新聞自由」嘅旗號，長期通過情報系統出身嘅助手Mark Simon穿針引線，游說美國不同政客及官員制裁中港兩地官員。

2019年，「生果佬」親赴美國與時任副總統Pence及國務卿 Pompeo會面，卑躬屈膝乞求對香港及中央實施「制裁」。「生果佬」仲透過 Mark Simon促成美國前副參謀長Jack Keane、美國前國防部副部長Paul Wolfowitz，為台灣蔡英文提供顧問服務。除此之外，為咗討好美國，「生果佬」甚至草擬特區官員嘅制裁名單，全面配合「侵侵」政府打壓香港。試問一個正常搞報紙嘅人，點解無端端同美國權力核心咁「friend」先?

係審訊入面，其中一個控方證人喺庭上指出，「生果報」嘅社論曾呼籲美國及其盟友根據《馬格尼茨基人權法案Magnitsky Act》制裁中國同香港官員。唔單止咁，「生果佬」曾經喺「生果報」自己嘅專欄度發表文章，公開倡議對中國實施科技制裁；而佢更直接指示時任「生果報」高層，協助袁弓夷喺「生果報」平台公開發布制裁中港嘅影片，呢個袁弓夷喺片中敦促時任「侵侵」同國務卿Pompeo駐軍保護香港青少年，呼籲外國投資者從香港撤資，又呼籲英國收回香港主權……

制裁唔係大家想像咁簡單，而係現代經濟戰嘅「核彈」。為咗達成政治目的，美國之前就曾經用「制裁」呢一招去打擊非洲中東多個國家，令到嗰啲國家經濟一蹶不振，破產收場。而「生果佬」仲陰險，策劃所謂「三條戰線」，聯合「街頭、議會、國際」， 搞煽動、推動街頭抗爭、推翻政權，乞求制裁，企圖癱瘓經濟；佢背後又操控反華組織「重光團隊」，出錢出力，日日向外國唱衰香港，誓要拖中國同香港市民去萬劫不復嘅深淵。

散播假新聞 挑動仇恨

除咗搞制裁，「生果佬」仲不斷利用「生果報」搞假新聞，例如：2008用偏頗嘅報道去反高鐵，煽動群眾包圍立法會同衝擊警方，到2019年黑暴已經徹底失控，又不斷散播「爆眼女」、「太子站事件」等假新聞，甚至誣衊警察性侵示威者，煽仇煽暴，將香港推入撕裂與仇恨嘅漩渦。

「生果佬」恃住「新聞第四權」，拎「生果報」嘅謊言當子彈，日日瞄準班後生仔，教佢哋「違法達義」、搞「港獨」，哄騙佢哋以為上街就係改變世界，鋪天蓋地散播謊言同煽動性報道，結果大批後生仔信咗佢啲鬼話，連群結隊上街暴力違法，以為攬炒就係出路。最後呢？唔係坐監就係流亡，搞到自己前途盡毀，無數家庭破碎，社會陷入混亂之中。

睇返2021年7月1號嗰晚，有個叫梁X輝嘅男人喺銅鑼灣百貨公司外，用刀襲警後自殺單case，警方其後喺佢屋企搜到大量「生果報」舊報紙。心理專家喺死因庭上分析話，佢長期俾「生果報」餵「心靈毒湯」，深受極端攬炒思想影響，最終策劃「孤狼式襲擊」，成為「生果報」洗腦工程下嘅犧牲品。

美西盲撐 勾結外國最佳證據

成個公開聆訊歷時156日，有超過2000項證物、8萬頁文件，證據堆到成座山咁高，但外國勢力竟然仲擘大眼亂噏！判刑一出，美西方一眾政客同反華媒體無視鐵證如山，即刻跳出嚟，再次上演雙標醜劇，大肆抹黑特區政府，開口埋口就係港府打壓「新聞自由」，又歪理連篇要求「釋放生果佬」。佢哋呢種顛倒黑白嘅行徑，不僅公然違反國際關係基本準則，更徹底暴露出「生果佬」其實同佢哋係坐埋同一條船，狼狽為奸。

喺審訊期間，西方從未停止過造謠抹黑，又話「生果佬」喺獄中受虐、無醫療，又話佢連宗教權利都冇，甚至話佢身體差到指甲脫落，但事實呢？法庭宣判當日，「生果佬」步履穩健、自行入席，精神狀態良好，完全打咗呢啲謊言嘅臉。就連佢嘅律師都親口承認，「生果佬」喺獄中一直獲完善醫療，亦無任何投訴。呢啲造謠手段，只不過係西方抹黑香港嘅慣用伎倆。

其實每日唔同國家嘅領事、外國媒體都有去聽審，有晒即時傳譯個喎，係咪佢哋聽唔明，抑或係瞌緊眼瞓睇唔到，報錯料俾老闆知啊？

自食其果

除此之外，仲有啲西方組織，例如「無國界記者」，跳出嚟強烈譴責判決，話「生果佬」被判20年監禁，對七十幾歲嘅佢嚟講「幾乎係死刑」，認為判得太重。判得重？咁不如睇下西方嘅國安法判刑情況: 美國國會山騷亂案，「驕傲男孩」主犯重囚22年；英國6個襲警暴徒判124年。自己啲國安法就辣到出汁，但一提香港就鬧到飛起！咁係唔係虛偽雙標？

「生果佬」觸犯國安法，經公正審訊被判刑，係法治體現；相反，美國非法綁架委內瑞拉總統馬杜羅返美受審，先係踐踏國際法。西方政客死撐「生果佬」，卻對馬杜羅隻字不提，呢個係咩邏輯？

上面講「生果佬」嘅惡行只係冰山一角，佢啲所作所為喺官老爺嘅855頁判詞入面詳列得清清楚楚，受審判刑係因為佢罔顧法律，禍害香港，法庭只係根據法律同證據作出裁決。判詞講得好清楚，「生果佬」有持任何政治觀點嘅自由，但問題係，佢選擇去違反《國安法》，繼續鼓吹外國干預同制裁，無視法律底線！

鍾情局•零零發