早排見到有好多評論文章狠批新到任嘅美角駐港總領事「伊豬麗」，話佢8月尾接任駐港總領事冇耐，就接連兩次以同社會各界交流嘅名義，邀請反中亂港頭目，前高官「陳四萬」同前「白鴿黨」主席「劉大姐」出席歡迎酒會，假借「交流」之名，重啟同反華代理人嘅聯繫。事件惹起極大爭議，但我有啲唔熟政治嘅朋友就話，「伊豬麗」只係同佢地喺個酒會上見下面Mingle下啫，洗乜咁緊張？我零零發就認為，只要稍為了解下「伊豬麗」嘅背景同往績，就知道絕對唔係「Mingle下」咁簡單。
「伊豬麗」其實並唔係第一次喺香港工作，佢2019年就已經嚟咗香港，喺美領做政治部主管，仲建立咗豐厚嘅「禍港」往績。黑暴期間，傳媒揭發「伊豬麗」喺金鐘密會「港獨」組織「香港X志」成員「黃痴瘋」同「衣冠聰」，而「黃痴瘋」等人隨即就發動罷課同煽動學生上街；隔冇幾耐，「伊豬麗」又被揭發喺中環美國會所同有「禍港四人幫」之稱嘅「陳四萬」、「白頭李」等人開秘密會議，之後黑暴就愈演愈烈，汽油彈横飛嘅場面亦越嚟越多。
咁「伊豬麗」嚟香港搞事之前係做咩嘅呢? 翻查資料，原來佢精通中文、阿拉伯文同埋土耳其語，佢2002年喺美角喬治城大學畢業取得文學碩士、主修阿拉伯研究，同年經遴選後攞咗專門培養政治人才嘅美角總統管理獎學金，並因為咁而成功加入美角國務院心戰部門－「民主、人權及勞工事務局」工作。呢個局長期發布抹黑中國及香港人權嘅報告，相信「伊豬麗」亦都有撰寫過呢啲偏頗嘅報告。
「伊豬麗」其後喺美角外交系統工作超過20年，自2004年起，佢曾被派駐中東多國，包括沙特阿拉伯、黎巴嫩、以色列、卡塔爾、伊拉克等，期間不斷以「推動人權及民主」為名大搞政治滲透，被調侃為美角外交系統嘅心戰及顛覆專家，擅長用心戰手段達到政治目的。
「伊豬麗」有咁嘅背景同往績，今次一坐正做阿大，就請埋兩個反中亂港阿婆去歡迎酒會，你話佢冇政治目的，我諗都未必有人信喇!
睇番「伊豬麗」講一啲工作心得嘅文章，佢話外交工作係要將「聯繫」變成「朋友」、「朋友」變成「夥伴」，再一齊解決挑戰同實現共同目標。「伊豬麗」呢句說話，令零零發聯想到，佢係咪就係要將「陳四萬」同「劉大姐」由「聯繫」變「朋友」，再變「夥伴」，再一齊實現佢地嘅反中亂港共同目標? 其實點解「陳四萬」同「劉大姐」會獲得「伊豬麗」嘅青睞呢?
「陳四萬」喺回歸前係獲英角佬重用嘅政府高官，不過回歸後做咗一陣就退休，之後佢就不斷同犯民圍爐，並成為「國際線」嘅打手。2014年政改爭議時，佢飛去美角同時任副總統「登登」會面，游說美角干預香港事務，冇耐就爆發「佔中」。 2019年修例爭議時，佢先去美角向時任副總統「彭撕」等人「告洋狀」，又去德角游說官員同政客支持香港抗爭。而黑暴期間，佢唔單止公開鼓勵公務員上街遊行，仲四出幫「生果佬」泵水嘅「重光團隊」，穿針引線去見英角駐港總領事。「陳四萬」咁鐘意服侍外國主子，唔怪之「伊豬麗」一上場就要見佢喇。
2019年黑暴猖擴之時,「港獨」組織「香港X志」成員喺金鐘的「重要」會面。
至於「劉大姐」就係2019年修例爭議時，與一眾犯民黨羽去見當時嘅美角駐港總領事，抹黑修例。黑暴爆發後，佢更加多次出訪美角、英角、楓葉角等西方國家，呼籲當地議員、政客去干預香港事務。到2020年《國安法》訂立之前，佢除咗忙住抹黑《國安法》，仲寫信比英角內政部，促請俾持有BNO護照嘅香港人有居英權。時至今日，佢仍然賊心不死，搞咗個網台節目「ChatDP」，借訪問「黃人」去製造反政府聲音，似乎佢仲好想延續佢嘅「政治生涯」……高人話「劉大姐」再次俾美角主子寵幸好開心，喺酒會滿場飛，仲懶得戚喺面書上載被主子加持嘅相。
今次「伊豬麗」請「陳四萬」及「劉大姐」去酒會聚舊，揭示咗美角想老調重彈，重建在港代理人網絡，甚至乎係想「陳四萬」同「劉大姐」以老帶新，等美角可以吸納新一代做代理人，再一次搞亂香港。而事件亦都反映咗有啲反中亂港分子仍然死心不息，一有機會就仆埋去主子度，以顯示忠誠!
「劉大姐」上載2025年美領 酒會的照片。
所以大家要認住呢隻「豬」，因為佢係真真正正「扮豬食老虎」嗰隻嚟㗎！
鍾情局,零零發
鍾情局
** 博客文章文責自負,不代表本公司立場 **
最近瑞士洛桑國際管理學院發佈嘅「2025年世界人才排名」，香港由舊年嘅第9位連升幾級到今年第4，係咁多年來最高排名，亦係亞洲No. 1！
其實香港不嬲都吸引到好多人才，話說自90年代初，已經有好有「強力背景」嘅美英過江龍嚟香港落腳，只不過以前冇呢啲排名榜，如果唔係，香港一定係世一！
William 蜜薑
「蜜薑」1958出生，阿爸係前美角聯邦探員。佢係美角共和黨黨員，波士頓大學傳播學系碩士畢業，係多間美角媒體公司任職過高層，包括做過《華x街日報》。90年代初嚟咗香港，做《遠東XX評論》編輯。後來無端端係1997年7月7日，做咗「生果佬」嘅天主教教父，之後更加做埋佢嘅遺囑執行人及遺產信託人！「蜜薑」返美角之後就彈起咗，分別做過前總統「小布」，同埋傳媒大亨「梅X」嘅(首席)演講稿寫手，喺政界同傳媒界都好吃得開。
Mark 西門
「肥仔Mark」而家62歲，美角共和黨黨員，美角前資深情報局特工之子，所以佢係大學畢業之後，子承父業，做咗美角海軍情報分析師。2000年經「蜜薑」介紹，做咗「生果佬」私人助理。
當年「肥仔Mark」只係30幾歲仔，好地地喺老家為國家貢獻緊，點解會離鄉別井嚟香港，做人哋阿四嘅？唔通「生果佬」真係有非凡魅力，連美角特工都肯越洋從低做起？高人話冇人知「肥仔Mark」幫生果佬做乜，真係好詭秘！ 我零零發相信，佢可能都係被安排嚟香港，換個身份，繼續做番老本行！「肥仔Mark」2020年著草返咗老家之後，被踢爆有份做假，抹黑當時總統參選人「登登」個仔，企圖影響選情！唔知當年喺香港有冇做過類似嘅嘢呢？
路易斯Crovitz & 太太米奇Worden
呢兩公婆仲離奇，美角共和黨嘅「路易斯」係《華x街日報》嘅前話事人，又係美角電子媒體集團嘅總裁，係傳媒界響噹噹，有錢有地位。係2018-2021年，佢做咗生果佬嘅「No.1傳媒」獨立非執董，雖然係大有錢佬，但冇人會嫌錢多嘅，每年收番幾十萬董事袍金都好呀！可能因為咁，加上佢以前係「蜜薑」老闆，所以而家《華x街日報》，就頻頻出招撐「生果佬」單案，又不斷抵毀香港司法制度同人權狀況啦！
更吊詭嘅就係佢太太「米奇」，佢原本喺美角國會做份優差，但放棄高薪厚職，竟然係1992年飛過嚟，做「犯民」立法局議員「白頭李」嘅私人助理成7年咁耐 (又係私人助理？) 。香港搶人才真有一手，就連私人助理呢啲非專業嘅基層職位，都可以搵到咁高Quali嘅人嚟做！ 「米奇」返老家冇幾耐，就做咗「美角人權觀察」電子媒體主任，後來更晉升為全球倡議總監！
雅倫Bork
「米奇」係1998年臨走前，就直接交棒比「雅倫」，繼續做「白頭李」嘅私人助理。呢個「雅倫」又係唔少嘢，佢之前喺「美角國會外交關係委員會」做幕僚，同啲議員及國務院關係密切。佢做完「白頭李」兩年私人助理，返祖家之後，就出任一個右翼智庫嘅副總裁，連升幾級。高人話當時美角副總統、正副國防部長，都曾係呢個組織嘅成員！我零零發喺度真係要對「白頭李」重新估計，點解只係一個大律師、一個立法會議員，可以請到咁多猛人同佢打工嘅？！
Mark祈福
「福伯」而家68 歲，回歸前由美角移居香港接近30年。佢曾經係兩份本地龍頭英文報紙嘅總編，「外國記者會」董事，以及「Asia公司領袖會」執行總監。係2018年嘅時候，佢同「路易斯」齊齊做咗「No.1傳媒」獨立非執行董事，2021年又一齊辭任。佢2020年返美角之後，創立咗「香港自由委員會」，搵咗一班黑暴逃犯，包括許穎婷、張晞晴做助理，又做埋黃媒「光X媒」同「零角」顧問，總之就「好事多為」！
Benedict 羅渣氏
呢個「羅渣氏」係70後英角人，人權活躍份子，早期係《華x街日報》做定期撰稿員（咁啱又係呢份報紙嘅？）。回歸前嚟咗香港，分別係幾個英文媒體同報紙做記者，並且成立CSW (人權組織)香港分會。聽聞佢同「生果佬」相識於微時，所以好friend。返英角後，有一日佢哋見完面，佢就係同日(即2017年10月20日) ，宣佈成立反華組織「香港監察」(HK Watch)； 2020年又加入咗「對華政策跨國議會聯盟」(IPAC) 。呢兩個組織，除咗反華之外，仲主打推動制裁特區政府同官員。
保羅Harris
「保羅」1976年係英角獲得大律師資格，1993年嚟咗香港執業，主要打人權案件。佢喺1995，同當時「香江大學堂」嘅陳X敏、羅x啟等人成立「香江人權監察」，呢個組織係美角國家民主基金會(NED) 資助成立嘅第一家香港機構，據聞當年NED曾經撥款1500 萬港元比佢哋。後來「保羅」返英角，以英角民主黨黨員身份，係2018年當選英角牛津市議員。佢之後又再返香港做律師，當年仲經「白頭李」提名，成功當選成為2021-2022年度大律師公會主席；佢在任期間，不斷發表針對香港國安法嘅批評言論。
「保羅」 2022年返咗家鄉之後，做咗「香港監察」嘅顧問，又加入倫敦Doughty 街大律師事務所！(呢間律師樓入面幾個律師，咪成日話係代表「生果佬」嘅外國偽律師團隊，亂咁嗡「生果佬」受到不人道對待囉……)
除咗以上呢幾個「外勞」越洋搵食之外，其實仲有好多海外「人才」潛伏喺香港各行各業，我零零發喺適當時候，會再出個「龍虎榜」俾大家睇！
言歸正傳，原來除咗「英角人」識得食住殖民地條水，係香港政商界搵食之外，估唔到美角「洋人」，都好欣賞香港獨特嘅環境，肯紓尊降貴嚟工作，唔通香港真係人工高、福利好、有前途？睇佢哋飲過東江水之後，個個返到祖家嘅士途都零舍唔同，睇嚟有香港歷練嘅CV真係吃香啲喎。不過，我零零發其實都分唔清，究竟係香港個老闆、班「外勞」、抑或係呢啲「外勞」海外嘅大老闆，先至係真正話事人? 究竟呢班「外勞」喺香港，邊份係正職、邊份係兼職呢？
總之，「東方之珠」嘅吸引力真係唔講得少，香港多年嚟都有吸引「專才」嘅不同原因。所以話，搶人才，香港點會輸呀！
鍾情局•零零發
