「香港記怯」搞過咩？

唔講唔知，2019年黑暴之後，香港市場上有超過4300個職工會登記，係原來數量嘅5倍，大量增生的工會當然和政治搶位活動有關，雖然後來有部份失蹤咗，但係仲活躍嘅都有唔少。

其中一個好出名，成日喺媒體嗶哩吧啦嘅, 就係「香港記怯」，不過佢唔係新工會，係喺1968年成立的老工會，原來嘅宗旨係為咗提高新聞自由，改善香港記者嘅工作條件，同埋解決新聞採訪時遇到嘅障礙。當年記者人工低福利無乜，回歸前「香港記怯」都真係扮演過啲為從業員爭取權益嘅工作，高峰嘅時候有900幾個會員。

但回歸後「香港記怯」就越嚟越政治化，一啲唔太鐘意搞政治的記者就逐漸同個會疏遠。聽聞喺2023年嘅時候，會員已跌到剩返200幾，但成個業界差唔多有成萬人喎？! 政治化令整個組織變質，2019年黑暴發生事件時，「記怯」大力支持。到後來訂立《國安法》，令顛喪的政治夢醒晒，但「記怯」一如既往，自然令正常的記者敬而遠之。而家「記怯」連執委會都萎縮埋，得番8個人，有兩個係外媒嘅員工(其中一個已經被炒咗魷魚，無業)，有3個係「自由記者」，而本地新聞從業員都係得3個……都唔知呢個協會點樣代表本土新聞業界呢？

我零零發上年10月已經講過網媒「Channel Si」，係未經同意下，擅自盜用咗上載係社交平台嘅圖片，又拖欠員工超過3個月嘅糧。當時我話，「記怯」對住無論係新聞操守、營商道德都好有問題嘅「Channel Si」，一直都扮鵪鶉，唔出聲; 「Channel Si」老闆係前生果日報記者，所以「記怯」特別優待佢唔鬧佢？ 最近「Channel Si」個老闆終於出事，佢因為造假賬呃政府「百分百擔保計劃」1,200萬被捕，公司被債權人接管；數十名員工被拖欠薪金及強積金供款，而一直標榜為業界發聲嘅「記怯」，隔咗差唔多成個月，到早兩日先至出聲明話陪咗啲員工去勞工處，但一句譴責「Channel Si」及其老闆嘅說話都冇，仲認為佢哋只係財務管理不善？! 又話媒體因資金被凍結而被逼停運，顯示本地媒體營運空間繼續收窄；又話自拘捕行動後，網絡發佈多個帖文抨擊「Channel Si」，係有組織嘅網絡抹黑行動等等。

What？ 「記怯」你知唔知佢個老闆係做假脹，呃納稅人錢，係刑事案嚟㗎？點解講到佢好似好無辜咁嘅？究竟係你哋水平唔夠，唔識解讀件事，定係喺度妖言惑眾，轉移視線呢？網絡發帖評論吓又變成「有組織嘅網絡抹黑行動」，講吓都唔得，仲有無言論自由呢？呢啲唔係正正係你哋「記怯」成日話香港言論自由空間收窄囉。相信「記怯」只係支持有你講無人講嘅言論自由。

「記怯」主席「鄭X如」對「Channel Si」觸犯法律，損害大眾利益，對被欺壓、需要援助嘅記者，選擇視而不見；但對於爭取自己利益卻非常積極，鍥而不捨都要告《華X街日報》炒咗佢，點解人哋冇糧出就只係出少少力，自己被炒就出大大力去爭取呢？！

而嗰個自稱「自由記者」嘅副主席「梁X聰」，就自由到冇咗影，冇人知佢為業界做過乜，分分鐘佢嘅正職唔係記者都唔出奇！

至於「記怯」前主席「陳X昇」，平時就好巴之閉，唔知係咪因為自己係「Channel Si」高層，所以唔敢搞自己人，唔幫啲記者出聲？

咁呢個「記怯」其實過去做過乜？不如快速倒帶睇吓喇：

2019年黑暴喺香港大是大非嘅年代，8月13日《環球時報》記者付國豪喺香港機場被示威者綁住手腳毆打，「記怯」有遣責過暴徒嗎？8月31號謠傳太子地鐵站死咗好多人，咁大件事，「記怯」有做「領頭羊」嘅角色，去調查真相嗎？ 事後證實「太子站打死人」只是謠言，「記怯」有譴責過半句造假的人嗎？ 當時有個良心電視台出去採訪，就會俾暴徒圍住，甚至被破壞攝錄器材，「記怯」有為被恐嚇的記者出過聲嗎？ 個陣時有好多暴徒，會用幾十蚊去買個「記者證」，一遇到警察，就用嚟做護身符，自稱係「自由記者」，阻撓警方執法，而「記怯」就會即時彈出嚟，誣蔑警方打壓新聞自由！「記怯」當時咁大聲，同而家「Channel Si」高層騙案成個月先出嚟，細細聲嗡兩句，簡直有天淵之別！

疫情嘅時候，有個傳媒屈政府，話封區強檢時派發嘅罐頭冇罐頭刀，居民開唔到嚟食!  原來呢間媒體係專登唔影罐頭頂部嘅拉環，去砌政府生豬肉，於是引起社會各界嘅抨擊。但估唔到呢個堪稱專業嘅「記怯」，明知呢個媒體係做緊假新聞，竟然唔出嚟譴責，仲話成件事係「政治抹黑」! 有冇搞錯？我哋香港市民係純啫，但唔係傻㗎！

舊年「記怯」特登開記招，聲稱有記者同佢哋啲屋企人受到滋擾，企圖營造有傳媒被打壓嘅假象。後來話有幾個報咗案，而其中一個報案人係facebook 聲稱，自己報案之後入境，俾海關針對截查，跟住仲話俾人電話滋擾，佢係咪諗多咗呀？雖然唔知而家成件事發展成點，不過如果件事有料到，佢哋仲唔大鑼大鼓咁走出嚟亂吠咩？

近年「記怯」極度政治化，對本地真正嘅新聞自由、新聞從業員嘅保障，不聞不問；但外國一有風吹草動唱衰香港，佢哋就會即刻鋪橋搭路，齊齊助攻，好明顯係好有「國際視野」，識得「聯通世界」啦! 但係，當外國嘅新聞自由受到扞擾，佢哋又玩選擇性睇唔到。無論係2022年《半島電視台》一名記者，喺報道以色列軍隊掃蕩巴勒斯坦難民營嘅時候，喺鏡頭面前被殺，當場死亡；又或者係「侵侵」因為《美聯社》唔肯將墨西哥灣改為美國灣，一度被禁止進入白宮採訪，「記怯」都一樣係唔會出聲! 所以「記怯」個名真係好，係怯懦個「怯」；不過如果佢哋改名，叫「國際記怯」，應該更加貼切！

我零零發都唔知「記怯」呢個組織有咩存在價值，摺埋就應該係「最佳選擇」！但係佢哋死唔斷氣，嚟緊6月會選新一屆執委，唔知邊個會接呢個爛攤子做爛事呢？

鍾情局．零零發

鍾情局

** 博客文章文責自負,不代表本公司立場 **

大埔宏福苑發生五級大火，導致超過150人不幸離世，當中包括一名英勇殉職嘅消防英雄。零零發同全港市民一樣，感到無比心痛同悲哀，願逝者安息，生者如斯。

大火發生之後，成個政府總動員，消防人員不眠不休，無畏無懼面對火場幾百度高溫全力撲救，希望救出更多生還者，救護及警方就全力配合，盡量減低傷亡。一救熄火之後，警方災難遇害者辯認組 DVIU就即刻爭分奪秒，進入仍然有危險嘅災場去搜索遺體殘骸，DVIU隊員不但面對惡劣嘅情況，亦要強忍悲痛和淚水，目的只係希望可以儘快確認死者身份，等家人可以同佢哋正式道別。至於其他政府部門，就將支援災民嘅配套及物資，迅速安排到位，而全港各界及市民不但捐贈善款，亦作出各方面嘅配合，體現了官、商、民同心協力，解決災民燃眉之急。

特區政府除咗全力救災同支援災民即時所需之外，喺事件發生唔夠24小時，就宣佈已經籌組成立3個工作組，包括「調查及規管工作組」、「緊急支援及募捐工作組」及「應急住宿安排工作組」，全方位協調安頓災民嘅需要。警方及廉署亦即時展開相關刑事調查，將懷疑涉事嘅工程承辦商人員拘捕，全速努力查找事故原因，希望還死傷者及家屬一個真相。而為咗確保全港其他棚架及建築物料嘅安全，相關部門亦立刻巡查全港所有正在進行大型維修嘅屋苑。

正當社會萬眾一心集中賑災善後嘅時候，零零發就留意到有一小撮別有用心嘅人喺呢個時候，借頭借路挑起事端，真係令人好氣忿!咁呢班無恥之徒究竟做咗啲咩呢?

首先喺大火發生當日，不少媒體都有轉載甚至直播事件，當時有相信係身處宏福苑嘅居民或者佢哋嘅家人，透過直播頁面留言發放求救訊息，以及列出被困/失聯家人身處住宅單位嘅位置，希望救援單位可盡快提供協助。但就有啲無恥之徒，竟然喺留言區瘋狂洗版留言，不斷重複呼籲「立法會選舉投票」、或者強調要「支持某一建制派政黨」；呢啲留言內容同方式，好明顯有別於正常嘅選舉宣傳及拉票訊息，而數量比起火災發生前突然大幅上升幾倍有多，喺一個咁唔合理嘅時間點不斷重覆「選舉信息」，加上大部份留言都係來自匿名帳戶，呢啲手法同啲網軍打手非常相似。好明顯，呢啲留言者係故意搗亂，目的就係要令人誤信「建制派不顧災情，只顧宣傳選舉」，同埋對立會選舉產生負面印象。佢哋咁做隨時影響咗求救訊息嘅發放，令到命懸一線被困嘅居民失去被救嘅機會。

而喺事發後嘅一兩日，社署等部門、關愛隊及不同民間社福機構都疲於奔命進行首階段支援災民嘅工作。呢個時候，又有啲別有用心嘅人散佈謠言抹黑關愛隊搶物資、報警驅趕派物資嘅義工等等。民青局隨即澄清，更嚴正指出呢啲係無中生有嘅事，完全無發生過，警方亦無收過有關嘅報案。另外，網上又出現有人以匿名方式，聲稱自己係消防員，話政府無提供膳食支援俾消防，要義工送飯先有得食，仲話連基本嘅消防救火及保護裝備都唔夠，更有人散佈假消息，話警方會出動6000防暴警、配備步槍及裝甲車，鎮壓清場民間物資站等等，呢啲人企圖透過發佈不實嘅消息搞分化，令人覺得政府嘅工作唔到位，去挑動市民憎恨政府……呢啲好明顯又係黃人一貫作風。

當政府喺記者會上交代跟進檢視嘅工作，包括同業界研究，如何在合適工作環境下，推進金屬棚架取代竹棚架的可行性，以提升工程安全嘅時候，就俾人上綱上線，炒作所謂「竹棚無罪」，之後網上陸續出現與竹棚相關嘅圖片同抹黑政府嘅不實言論，企圖將批評嘅矛頭指向政府；及後係災場附近，更有戴黑口罩人士，向途人展示有關標語。另外，又有人喺網上搞聯署，提出所謂「四大訴求」，再印成傳單攞去災場附近四圍派，實行線上線下挑動市民對政府不滿，影響特區政府嘅救災工作。以上種種手法熟口熟面，都係2019年「黑暴」嘅套路，不禁令零零發懷疑搞事嘅人背後嘅動機。

除此之外，正當社會各界紛紛向災民伸出援手之際，騙徒卻利用今次大火，伺機招搖撞騙，包括假扮義工使用虛假嘅「大埔宏福苑災民登記表」混水摸魚，去騙取受影響居民銀行及信用咭號碼等個人資料；亦有市民收到假冒慈善機構籌款嘅釣魚短訊，訛稱為大埔災民醫藥費籌款，誘使點擊附帶嘅惡意連結，進入虛假籌款網站。呢啲擺明就係呃錢，趁火打劫嘅行為。

呢場火災令全港每一位市民都感到震驚同悲傷，雖然整個社會正經歷艱難時刻，但政府亦都實實在在做咗唔少救災同善後嘅工作，所以呢個時候，大家好應該團結一致，齊心協力處理災後工作。但係無論大家想表達一份心意，又或者出一分力去幫助災民，都要小心判斷資訊嘅真確性，千祈唔好信埋啲無名無姓嘅所謂訊息，就盲舂舂跟人去衝，到時幫唔到災民，仲要添煩添亂，又或者令自己誤墜法網……

所以大家去幫人嘅時候，記住長善之餘，亦都要長智！

鍾情局•零零發