關智斌相隔六年再開show 性感Look影海報胸肌成全場焦點

等足六年，關智斌（Kenny）終於再舉行個人演唱會《The Endless Adventure Live in Hong Kong》，這次選址啟德體藝館，演唱會將於9月26及27日一連兩場舉行。Kenny自爆拍攝海報時全場焦點都落在他的胸肌，笑言：「成個團隊對住我波罅影相，好彩我有操開！」

Kenny將於9月26及27日一連兩日在啟德體藝館舉行個人演唱會《The Endless Adventure Live in Hong Kong》。

這次演唱會以「小飛俠Peter Pan」為概念，Kenny解構：「細個已經好鍾意睇呢套卡通片，不過今次我唔係扮Peter Pan，而係用冒險島嘅精神，講成長嘅矛盾同掙扎。」而海報造型原來暗藏玄機，綠色撕裂衫的一邊代表Peter Pan，另一邊就似邪惡船長Captain Hook，「好似正義同邪惡喺我身上開戰，打到衫都撕爛埋。」

拍攝花絮

講到件衫咁性感，Kenny即鬼馬話：「為咗賣飛吖嘛！點都（露）少少啦。」又笑言：「希望咁樣可以幫到百零二百張飛啦，咁就功德無量㗎啦。」不過Kenny都直認近排真的操得好fit，除了為演唱會，亦因為早前要參加健身比賽，隨後又大爆拍攝海報期間的趣事，「因為件衫開胸，我成個團隊無論目光定相機，全部都對住我波罅，好彩我有操開，都見得吓人，唔使尷尬！」

拍攝花絮

不少網民都將焦點落在Kenny張「暴乳」海報上，連AK@MIRROR都忍唔住留言：「收返埋個八字，唔好亂咁俾人睇！」DJ梁文禮更搞笑話：「豪乳警報」。公司一班兄弟姊妹如謝霆鋒、容祖兒、蔡卓妍、鍾欣潼、李幸倪、泳兒等，都紛紛於自己社交平台轉發演唱會消息，落力支持。

AK@MIRROR

DJ梁文禮

謝霆鋒

容祖兒

蔡卓妍

鍾欣潼

李幸倪

泳兒

Kenny指《The Endless Adventure》不僅是一場演出，更是一段成長路上不斷冒險探索的旅程，要有面對無常世界的勇氣。在這一個你我都不會長大的晚上，將由「永遠的彼得潘」帶領大家，找屬於自己不一樣的答案。除此之外，Kenny預告：「個show會有好多跳舞部分，rundown精彩到我自己都睇咗十次，保證唔會悶親大家！」

拍攝花絮

關智斌（Kenny）全新廣東作品《My Little Tinker Bell》上架，這次新歌是送給一班對他不離不棄的fans及朋友，答謝他們一直以來的支持。不過提到拍MV，Kenny笑說是一個淚水與汗水交融的拍攝。

Kenny推出全新廣東作品《My Little Tinker Bell》。

MV找來Kenny「老友狗狗」Max及牠的一班兄弟姊妹一齊演出。一直有說小孩及動物是最難拍攝，Kenny坦言十分順利，「完全冇大問題！我同Max合作開，之前有拍過好多廣告，好friend㗎！佢train得好好，好乖、又識做戲、又有表情。」看似順利，隨後Kenny又補飛：「除咗佢哋間唔時會喺地下度……或 者拍拍吓走開咗屙尿，哈哈！」

MV圖片

MV圖片

MV中有一幕是Kenny在做掌上壓，Max就威風凜凜地站在他背上，Kenny先讚Max乖，接着又爆出一個「重量級」笑料。原來拍主觀鏡頭（即狗仔視角）時，攝影師是站在Kenny身上拍攝，「大家睇落個畫面好似好溫馨，其實嗰陣我係幾辛苦，佢係企咗喺我上面仲要連埋部攝影機，真係好重。我諗如果有個side shot嘅畫面都幾好笑。」

MV圖片

MV最後講到狗仔離開，Kenny亦有所感觸，「拍攝嘅時候都有諗返起自己之前養狗嘅經歷……都有啲心酸，亦都有啲觸動嘅位。」他希望將這首歌送給所有有養寵物，或已經失去寵物的朋友，「呢一個別離其實都係開心，因為佢喺你人生入面陪伴咗你一段時間，令到你成長，學咗人生寶貴嘅一課。」

MV圖片

MV圖片

MV圖片

MV圖片

新歌《My Little Tinker Bell》概念亦甚有意思，將一直支持Kenny的fans及朋友比喻做「小天使」，是他們的魔法才令Kenny這個「彼得潘」可以繼續在娛樂圈中飛來飛去，永遠長不大。歌曲找來Ariel Lai及鄺梓喬編曲，陳考威監製，旋律輕快入腦。填詞人林若寧更加將Kenny的心底話寫入歌詞：「失戀一晚我抱緊你 得獎一晚我抱緊你 兩老死 連我做魔鬼都包庇」，認真暖心。

觀看相關影片按連結：https://youtu.be/SzhVVwfDrno