全唱作女新人RIIANA《I’M SORRY》新歌MV登場一手包辦曲詞唱作首嘗MV策劃兼監製崗位僅睡兩小時瞓身製作

娛圈事

全唱作女新人RIIANA《I’M SORRY》新歌MV登場一手包辦曲詞唱作首嘗MV策劃兼監製崗位僅睡兩小時瞓身製作

2025年08月21日 20:30 最後更新：20:39

比高娛樂首位女歌手、全唱作新人RIIANA日前推出首支派台歌《I’M SORRY》MV，由構思到妝服而至場景設計均出自她的手，瞓身製作最愛的怪美復古風格：「冇諗過自己可以做到咁多嘢，雖然中間有好多挑戰，但係好有成功感！」

RIIANA表示當初錄製《I’M SORRY》的時候，腦海已經有MV的畫面：「搞怪、可愛又俏皮嘅，節奏要好快，成個畫面要繽紛同豐富，MV嘅情節都喺晒個腦入面，咩機位、咩調色，基本上我已經有晒構思。」她透露早已收集好所有參考資料：「導演好好，好有耐性同我講邊啲得、邊啲唔得，例如咩場景襯邊套衫、有咩道具、做咩動作都要有晒計劃，成個籌備到完成拍攝，足足用咗四個月。」

點擊看圖輯

比高娛樂首位女歌手、全唱作新人RIIANA

首支派台歌《I’M SORRY》

一手包辦曲詞唱作

首嘗MV策劃兼監製崗位

MV描述RIIANA悶悶不樂，「藍色熊仔」為了氹她開心，花盡心思送花、送蛋糕、送糖果，但仍然未有令女孩笑起來：「呢個係我真實嘅經歷，好唔開心嗰陣，身邊都有好多人為我打氣、想我振作，不過有時就係笑唔出。」除了RIIANA外，MV另一位主角是「藍色熊仔」，她笑指實物比自己想像大很多：「同間廠溝通咗好耐，睇相嗰陣都覺得同預期有出入，但係唔夠時間啦，唯有照整咗先。去到現場先知道咁大隻，好驚喜，因為佢唔係『熊仔』而係怪獸，哈！不過呢隻怪獸同個MV好夾，我都係喺現場加啲details位畀佢，係好即興但係又好好玩嘅過程。」

她特別感激化妝師全方位支持，兩人更成為好朋友：「所有服裝、化妝都係拍攝前一日先準備好晒，我自己亦都有要求，搵咗好耐先搵到兩套啱嘅VINTAGE衫，好彩有化妝師KK一直幫我準備。佢要長途跋涉去到拍攝場地，我哋兩個人喺屋企係咁襯衫、試妝、整頭，佢仲好細心幫我記低所有配搭，連最後執嘢都係佢幫我，我仲記得拍MV之前嗰晚，我哋淨係瞓咗兩個鐘，真係好多謝佢。」RIIANA笑謂拍攝當日，每每等轉景及打燈，都不禁睡着：「導演會大聲嗌我個名，『RIIANA，精神啲！』諗返都好搞笑。」　

試過為自己擔任MV策劃兼監製後，RIIANA直言上癮：「係有好多挑戰，不過見到成品，真係好有滿足感！希望之後可以再喺拍攝上參與更多，經過今次，我覺得自己發掘咗啲潛能出嚟，雖然未係做得好好，但係我好有興趣。」這次的經歷，讓她更期待製作「全自家作品」：「之前做訪問，大家都問我有咩目標，當時我話想做個人音樂會，而家我會想，製作一張完全由我自己包辦曲詞、統籌兼監製MV的專輯，可能有8、9、10首歌或以上，所有嘢都係我鍾意嘅風格，大家就可以透過呢張專輯去認識真正嘅我。」

往下看更多文章

香港取景打造真實戀人縮影 RIIANA新歌MV拍足12小時

比高娛樂首位女歌手、全唱作新人RIIANA 今日(10月3日) 推出全新歌曲《Don't Wanna Fall In Love Again》，新歌描述熱戀後的冷卻與分歧，即使回憶美好，女主亦不願再投入新戀情，反映都市中愛情的真實掙扎與無奈。MV全程於香港夜景街頭拍攝，以霓虹燈、繁忙街景呈現都市愛情的冷暖變化，講述兩位主角在髮廊相遇至熱戀、爭吵與冷戰的情感轉折細膩展示戀人間的複雜關係。RIIANA憑自身經歷投入情緒，拍出最貼近真實的都市愛情故事。

MV全港夜景取景呈現冷暖交錯的愛情片段

歌曲MV以城市愛情故事為藍本，全程於香港取景拍攝。畫面中鋪展出香港街頭的夜景，大樓燈火輝煌，車流川流不息，營造出獨特的都會情感氛圍。MV開場以髮廊作為兩位主角相遇的場景，RIIANA與男主角（髮型師）於此邂逅，隨後畫面穿插兩人熱戀時光、溫馨甜蜜的親密瞬間，以及爭吵冷戰和無言沉默的矛盾衝突。

導演巧妙運用香港街頭夜色的霓虹燈光和繁忙街景作為映襯，讓整體視覺與情感轉折更添層次。影片中亦展示兩人在街頭一同買雪糕的溫馨片段，喚起RIIANA兒時放學後拿著零用錢買甜食的童年回憶。這些細節為MV增添真實生活氣息與情感厚重。

初見男角即席演激烈分手戲靠出拳打對方培養默契

今次MV全程以夜景街外景為主，從黃昏一直拍到翌日清晨，RIIANA分享拍攝趣事時笑言，與男主角初次見面不足十多分鐘，就要投入最激烈的爭吵分手場口。由於場面需要真實感，導演要求爭執戲加入出拳揼男主角個心口的動作，她不慎用力過猛，發出巨響，所幸對方專業投入，繼續完成演出。她笑言這一幕成為難忘插曲，也為整個拍攝增添默契。

深情對望、親密攬腰、頭貼頭 RIIANA：「近到好尷尬，面都紅哂。」

後來拍攝熱戀期的親密場景中，多個鏡頭捕捉RIIANA與男主角深情對望、親密攬腰、頭貼頭，畫面令人感受到戀人間真摯的情感牽絆，特別是在街頭夜景燈光映襯下，更具畫面感，呈現都市愛情故事。相比之下，熱戀期的親密戲份反而更富挑戰性，因為需要較多親密接觸，雙方曾感到尷尬，不過兩人愈拍愈熟的情況下自然流露拍出導演要求。RIIANA坦言：「近到好尷尬，面都紅哂！但又歌曲本身要交代由甜蜜到冷淡的轉變，幸好拍攝順序是先爭吵後熱戀，慢慢培養了默契，成品才會真實。」

重返士多店拍攝觸動兒時回憶

拍攝過程中，一場在舊式士多買雪糕的戲份，勾起她兒時放學去買零食的回憶。MV劇情全靠內心戲表演推進，RIIANA憑直覺即場演繹爭吵台詞，甚至聯想到過往自身的爭執經歷。她直言這種創作方式令作品更真實貼地:「好似將自己投射返以前嘅感覺之中」。

新作不單是對愛情的寫實觀察，也是一段屬於RIIANA的心靈探索。歌曲與MV現已全面上架，等待樂迷一同重拾屬於自己的愛情回憶。

你或有興趣的文章

全唱作女新人RIIANA《I’M SORRY》新歌MV登場 一手包辦曲詞唱作 首嘗MV策劃兼監製崗位僅睡兩小時瞓身製作