打大交 拗hea做

特首選戰逼近，三個疑似候選人打大交。

整件事先由新民黨主席葉劉淑儀開始，她昨日在電台訪問中直指曾俊華擔任多年財政司長，「無乜真係做嘢，我覺得佢有啲hea做（懶散）」，並舉例指身為土地督導委員會主席，未有表現。

批評到咁直接，曾俊華當然會反擊。他今日到中大出席中大60周年院慶講座，回應葉劉批評他「hea做」，表示自己擔任海關關長時，葉劉淑儀正是他的「老闆」，當時對方給自己的評價「幾好」。話鋒一轉佢就話：「葉太在政府工作咁多年，都應該知道司長呢個位都重要既，如果真係可以hea到10年，都幾有天才。」

呢個hea做爭拗未完，特首CY晚上加入戰團，以美國總統杜魯門名言「The buck stops here」（責無旁貸）為題撰寫網誌，疑似暗批有人雖然有權有責，但為求做好人，就不斷「推莊」卸責，不肯拍板。

CY好似驚死人唔知佢講邊個，接著舉例說：「The buck stops here這句名言，在香港同樣適用。雖然有爭議，雖然得罪人，但作為政府首長不能迴避。四年來的事例甚多：大大小小土地開發項目是其一，近日的港獨和立法會宣誓是其二。做好人容易，做醜人要有擔當和勇氣。」

講到土地是財爺曾俊華管轄的範疇，講宣誓就燒到立法會主席梁君彥。CY出一箭就射兩人。

睇嚟葉劉點起呢把「hea做」之火，都可以燒吓喎。

Ariel

** 博客文章文責自負,不代表本公司立場 **

坊間流傳特首候選人有十人名單，聽到咁長的名單，好似成件事仲喺一個考慮初階段咁，但據高人所講，成份所謂名單其實有主次之次。

核心人選當然係現任特首梁振英，佢始終係首選，當然未到12月選舉，無人知選委會結果，考慮CY的相關問題，關鍵只餘下有冇把握取得601票。

其他的所謂名單，都係各方曾經提過上去，建議中央考慮的人選，包括五位現在或前香港執政的核心人物，政務司司長林鄭月娥、行政會議成員李國章、財政司司長曾俊華、行政會議成員葉劉淑儀，同埋前立法會主席曾鈺成。這幾位人選各自有自己擁躉和捧場客，當中李國章的名字過往比較少提，頗有黑馬的味道。

另外仍然有一些另類的金融界人選，包括前財政司司長梁錦松，同埋金管局總裁陳德霖。不過，特首人選最忌有硬傷，松哥當年的買車風波就係佢的硬傷。

呢個名單再講落去可以好長，有人話係八個，有說是十個，更有說是十二個，但係再講落去都無乜意思，因為名單愈遠的部份，其實根本不在阿爺的視線範圍之內，好難有機會跑出來，包括已經出來宣布參選的胡國興。

無論如何，有所謂名單，唔等成件事完全未定，相信阿爺心目中的心水，已定咗七七八八。