《香港01》報道，話金融管理局總裁陳德霖正部署參選特首，他的支持者已租用辦公室，並向本屆現任高官招手組班，種種舉措顯示，陳已做好「出戰」準備。報道又指商界話陳德霖已聘用擅長網絡宣傳的CMRS公司，為競選鋪路。
《香港01》又指，北京對陳德霖表露有意參選的舉動感到頗為驚訝，事關外界一直認定，陳德霖與財政司司長曾俊華屬同一路人馬，如果財爺敲定參選，陳德霖應是其核心競選班底，想不到如今陳竟有意另起爐灶，輔將變主帥。
政壇八卦友話，人稱「攞命陳」的政務官出身，長期在財金系統工作，又做過特首辦主任，這個履歷表本來都係一隻競選特首的黑馬。但「攞命陳」為人穩陣，不似會盲目出選，面對槍林彈雨都夾硬要去，所以若無阿爺祝福，無北京開綠燈叫佢去馬，睇唔到佢會咁冒進。
八卦友話，佢自己雖無堅料，只有碎料，但都無聽過陳德霖「租用辦公室」或「聘用擅長網絡宣傳公司」這些事情。若然搞到這種地步，半個中環都會知，亦都差不多係一兩天內要宣布參選的陣容，而家完全見唔到這些現象。
至於話「陳德霖與財政司司長曾俊華屬同一路人馬」，八卦友話又屬美麗的誤會，兩人雖然識得，但又唔係好老友那一種，去唔到「陳德霖應是曾俊華核心競選班底」呢種交情喎。
Ariel
** 博客文章文責自負,不代表本公司立場 **
