RubberBand伙「音樂狂人」側田12月「合體」 西九開騷舉行「音樂盛宴」

香港演唱會一直深受樂迷歡迎，年尾終於爆出另一重磅消息，RubberBand、側田齊齊開騷，將於12月13日在西九文化區AXA x Wonderland舉行音樂會！

RubberBand與側田將於12月13日在西九文化區AXA x Wonderland舉行 《Just Rub It》 Live。

RubberBand與側田為同期出道，6號對呢次「合體」非常期待：「我哋識於微時啦，以前又係同公司，好似重回入行的時候，有興奮嘅心情！因為有兩個單位嘅火花，同自己做騷好大分別。十年前我們同公司，有不少機會同台演出，當時我們『入世未深』只顧自己部份，希望今次將側田融入成為一隊大編制的樂隊，大家可以隨時『轉位』表演，呢個就是好玩之處。」

RubberBand

6號@RubberBand形容側田「音樂狂人」，欣賞他對音樂夠「堅持」：「他的唱歌技巧、感情是很高階，他的流行Hit歌是當時的回憶，轉眼就二十年，『回憶殺 』相信今次個唱其中一部份。我最想唱他的《Erica》一曲，二十年前第一次以RubberBand身份，改篇呢首歌與側田合唱，所以好想圓夢再唱多次。」

RubberBand

側田亦表示這次「合體」機會難得，希望撞出新火花給樂迷驚喜：「其實真係要多謝主辦單位嘅牽線，我同RubberBand識咗好耐，以前都係同公司，但一齊開show真係未試過，所以今次有機會合作，真係好難得。我好珍惜呢次機會，希望同佢哋撞出啲新火花，帶俾到觀眾一個驚喜。」佢表示Cross Over感覺新鮮，預期觀眾應該鍾意呢次演唱會：「我其實鍾意佢哋好多歌！我都想唱多啲勵志嘅歌，帶多少少Gospel風格。我哋將會融合成一隊band，等於呢隊band多了一個主唱及和聲。」

側田

現長居海外的側田表示，會返香港練歌，務求最佳狀態演出：「綵排我一定會返香港！現場一齊夾先至最有火花，所以點都會返嚟一齊練。其實我哋都係Mark Lui帶入行，音樂路上行嘅方向都好相似，加上都試過同公司，所以感覺上會特別夾。」

側田

AXA 安盛呈獻: RubberBand x 側田 《Just Rub It》 Live
演出日期：2025年12月13日（星期六）
演出時間：晚上 7:30
演出地點：西九文化區 安盛竹翠公園
票價：HK$388 / $688 / $888
主辦單位：耀榮文化 | 7 LIFESTYLE LIMITED
冠名贊助：AXA 安盛

恒生 Mastercard 信用卡優先購票
優先時段：2025年10月13日（一）12:00pm 至 11:59pm
購票平台：KLOOK

公開發售
公售時段：2025 年10月15日（三）12:00pm 起
購票平台：KLOOK

RubberBand聯同耀榮文化於12月14日舉行「RubberBand x 耀榮文化 同在音樂會」，以音樂凝聚社會力量，支援受影響的家庭，傳遞守望相助與同舟共濟的信念，為社區帶來實際援助與心靈安慰。

RubberBand聯同耀榮文化於12月14日舉行「RubberBand x 耀榮文化 同在音樂會」。

是次音樂會將於西九文化區安盛竹翠公園舉行，全場六千座位爆滿，RubberBand用《回家》為音樂會打響頭炮，「喺呢度見到大家係因為香港發生咗好唔開心嘅事。我哋一直都想做d嘢，咁所以寫呢首歌回家，亦都得知到我哋嘅好夥伴耀榮文化想邀請我哋一齊做一個咁樣嘅騷。我哋喺呢個城市好微不足道、好微小嘅，但係我覺得每一個人只要喺佢自己個崗位發揮最大，正所謂有錢出錢，有力出力。就將我哋嘅愛送出最大嘅能量，送去每一個人嗰度。」

RubberBand唱出二十幾首歌，觀眾以特別的心情入場，為受影響人士送上鼓勵。由於這晚氣溫急降，6號不時呼籲觀眾企起暖身，6號唱到跌暖包： 「有咁多朋友喺度，都暖晒喇，唔需要暖包。昨晚又落雨又凍，今晚都凍但好天氣，做善事個天係睇到！」整晚觀眾都好投入，6號話感覺到能量交換，不但來自台上， 台上亦以滿滿的愛和能量回應，希望將這份能量轉送給受影響市民。

及後，全場觀眾大合唱《阿波羅》，6號更講到眼濕濕，「今次呢個騷好多人幫手，為呢次音樂會推咗啲工作過嚟幫手！我哋只係識做音樂，咁多年嚟我哋啲歌都係關於呢個城市嘅故事，裡面有好多愛。今日我係要多謝大家，喺處於困難當中大家來到呢個公園，因為做呢個騷係好唔容易、經歷咗好多。因為要用呢個速度做好一件事，係需要好多有心人。除左我地幾個，其實台前落後佢哋都係一樣，都因為今晚騷將工作改期，好希望可以送到一份溫暖。」

12月14日晚所有門票均一售價港幣$388 、開設6,000個座位， 另設額外捐款讓善長人翁隨心支持 。今次音樂會門票不扣除任何成本與開支，收入將全數捐出， 善款總數為港幣：$2,903,713。善款將平均撥捐予五個單位：大埔宏福苑援助基金、東華三院「大埔宏福苑事故愛心捐款」、殉職消防員家屬、白恩逢之家（Bethune House Migrant Women’s Refuge Limited）及阿棍屋（House of Jay and Mercy）。

今次音樂會門票不扣除任何成本與開支，收入將全數捐出。

善款將平均撥捐予五個單位

RubberBand與同耀榮文化向每一位善長人翁深深致敬！