知名主持人兼演員強尼日前現身新城廣播，接受李有毅（Ben）和兒子李國煒（Benson）主持的《Ben同Benson「Chur」到行》訪問，強尼在節目中分享了他從足球節目主持轉型演員的心路歷程，原來當初他曾以一原因拒絕高層邀請。
強尼接受新城廣播《Ben同Benson「Chur」到行》訪問。
強尼透露轉型演員的契機來自一次意外的簽約邀請，「有一日金廣誠同魯庭暉約我，叫我簽入嚟，我不知天高地厚答佢哋，「『吓？唔好啦，我唔係拒絕，使乜要一個年紀咁大嘅藝員？個台咁年輕，我似乎同佢哋個年紀有啲距離，叫我散做都會繼續做』。」然而，公司高層看中了他的特質，邀請他擔任直播司儀，強尼亦大膽提出了自己的想法：「佢問我有冇咩想做？我話我想拍劇。」
強尼直言沒有接受過正規戲劇訓練，也不懂演戲，但他認為一個深入民心的角色可以永遠流傳，「所以既然要做電視，我又想更上一層樓，唯有向戲劇進發，當時亦想畀自己試吓，唔係你去拍就OK，如果試過唔得就冇辦法。」後來，強尼愈拍愈上癮，亦嘗試過不同角色，但他不會限制演出什麼角色，反而期待演繹不同人物。
強尼分享了他從足球節目主持轉型演員的心路歷程。
強尼連續六年擔任選秀節目系列的司儀，曾參加第二屆選秀比賽的Benson表示：「都幾特別，因為我係第一次參加由08開工到08收工嘅節目。」強尼即爆料：「暫時嚟講，最長紀錄係上一屆，即係第五屆第一回合嘅99強，嗰年我返朝早11點，參賽者就開07，因為佢哋人多要化粧，我收工時間係第二日下晝3點40分，離開公司大約5點，即大概30個鐘直落，我亦要出去99次。」
問他當時有沒有秘聞？強尼笑稱：「我好難去廁所，因為我每隔一分鐘就要出一次場，一分鐘點夠去廁所？肚痛一定唔得，所以我嗰時做司儀係唔食嘢，依家開始食少少，食太飽會好眼瞓，去到朝早7、8點開始斷電，個人好似人乾咁。」
大爆任選秀節目司儀連踩30小時！
在娛樂圈工作，強尼太太可有擔心他受到誘惑？強尼表示：「大部份人唔了解我哋工作性質，淨係睇到我哋出鏡係點，其實只係一份工。（但你要投入角色，會有感情戲？）翻查我嘅紀錄，我拍過嘅角色全部都冇感情戲，談情說愛戲交畀年青男女或靚仔靚女，咁先好睇，現實浪漫同劇集浪漫唔同，要畀個幻想大家。」
強尼的兒子就讀中二，他指這是父子倆的關鍵期，「因為開始青少年，我會嘗試觀察多啲，叫佢有咩同我講多啲，畀我了解佢多啲。」強尼過往每天都會駕車送囝囝上學，近年兒子漸長大，已經不用他接送，自己則盡量星期天不工作陪伴妻兒。問強尼有多疼惜兒子？他笑說：「我鍚佢嘅，而且都幾縱容佢，我成日話如果我生女就大件事。」
詳細節目內容，請留意10月11日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/
