加辣唔怕得罪發展商選民？

正當人大常委會將釋法列入議程之際， 特首梁振英昨日突然率領一眾司局長，宣佈新一輪樓市加辣措施，將買第二間樓的印花稅劃一加到15%，殺市場一個措手不及。 雖然政府被評為想轉移對釋法的注意，但係又真正有好多人關心樓價多過釋法。

今次政府辣招記者會和過去三次辣招記者會不同，過去只有財爺、運房局局長張炳良及政策官員出席，昨日特首CY同發展局局長陳茂波都有出席，並由CY主持。

CY發完言叫運房局局長張炳良講加辣內容，然後請發展局長陳茂波講公營房屋。財爺見無預佢講嘢，向CY舉手問：「我可唔可以補充一句？」然後發言3分鐘。

對呢個CY、財爺搶住講辣招的現象，有財經界高人覺得大惑不解，話特首選舉就到，CY和財爺都想參賽，政府搞咁強勁的辣招，發展商一定好唔高興，發展商加起來在選委會的選票有200票以上，兩個人做乜爭住得罪發商選委？

財經界高人更話，如果我係財爺，一定唔會爭住講，只露出一副「 難為了家嫂」的表情，粒聲唔出，等如話辣招新政策唔關我事，唔好入我數。

不過政壇高人就有唔同睇法，佢認為特首選舉有兩個面向，一個面對選委，講選票；一個面對大眾，講民望。目前細價樓再創新高，市民對高樓價抱怨甚深，打擊高樓價可以提振民望， 自然人人爭住做。

Ariel

** 博客文章文責自負,不代表本公司立場 **

人大常委會就游、梁宣誓風波，一錘定音決定釋法。香港基本法委員成員譚惠珠表示，今次係人大委員長張德江主動提出，會就基本法104條，有關議員宣誓的條文釋法，主要考慮到國家統一及領土完整等重要課題。

北京消息指，在下周一人大常委會閉幕前，會就釋法進行表決。以往閉幕後，人大常委會法工委相關官員都會有記者會，解釋通過的法律條文，今次亦不例外，在周一的記者會上，人大法工委主任李飛會親自出席，為釋法進一步解畫。

早前有傳媒報導，李飛會在人大常委會結束後，下周來港向各界人士解釋釋法內容。不過，北京消息人士就話，李飛並無來港的計劃及安排。

消息指過去亦不是每次釋法後，人大法工委負責人都會來香港見各界人士的。1999年居留權案釋法後，並無來港見面會的安排；2004年就政改啟動，確立五部曲的釋法，人大法工委負責人喬曉陽同李飛就有來港解畫，因為政改五部曲涉及諮詢香港各界人士。

但今次釋法則不同，目前未有需要來港諮詢同解畫。