李璧琦曾任補習老師 爆李國煒上堂爬牆塞BB彈入鼻

藝人李璧琦（Becky）日前到新城廣播接受李有毅（Ben）及兒子李國煒（Benson）主持的《Ben同Benson「Chur」到行》訪問，宣傳新歌《彩虹下的約定》；Becky除了分享豐富的演藝經歷，更驚爆擔任Benson英文補習老師的陳年趣事。

李璧琦接受新城廣播《Ben同Benson「Chur」到行》訪問。

節目甫開始，Ben大爆Becky曾是Benson的英文補習老師，Benson即幽默表示：「所以我嘅英文咁好，就係咁解喇！」然而，Becky回憶當年的情景亦猶有餘悸，她沒好氣表示：「你仲好講！真係激到我呢…同你補完習之後，以後都唔敢再做補習老師，好大陰影呀！」

Becky忍不住連珠炮發，「激死我呀，呢個同學仔（Benson）唔知點解咁活躍，佢成日上堂時跳嚟跳去，然後又好似『壁虎功』咁爬咗上牆，明明上緊堂…佢又唔知點解鍾意玩BB彈，唔係攞嚟射我，係塞咗落自己個鼻哥窿到，當時我仲係一個十幾歲嘅女仔，見到佢塊臉開始變色，然後又開始抖唔到氣，你幻想吓我點算？」

李璧琦宣傳新歌《彩虹下的約定》。

但Benson竟然搞笑謂：「我真係冇印象喎！『壁虎功』我就記得，BB彈真係冇印象。」就連Ben都表示：「我都唔知喎，連媽咪（太太）都唔知。」Becky續說：「我喺嗰時第一次學識危機處理同急救，我好緊張，係咁叫佢噴，點知佢話『我都要吸咗先噴』。自從同佢補完習之後，我就唔再補喇！」

除了補習老師的身份，Becky亦是模特兒、歌手、演員、節目主持及歌唱老師等多重身份，談及拍攝廣告的經歷，Becky特別分享人生首個廣告雜誌，就是與鄭裕玲（DoDo姐）合作拍攝樓盤廣告，而拍攝過程亦十分難忘，她說：「我一試鏡就中咗，之後去咗內地拍攝，但我係好易畀蚊針嘅體質，結果喺酒店瞓覺時，係咁畀蚊針，一掰大眼成隻眼腫晒，即刻係咁喊。」

獲Do姐暖心安慰感難忘。

李璧琦爆李國煒上堂爬牆塞BB彈入鼻。

她立即致電化妝師求救，最後帶著紅腫的眼睛見DoDo，令她感動的是，一向予人威嚴感覺的DoDo不但沒有責怪，反而貼心地說：「你咁樣不如戴住眼鏡拍啦！」還親切地安慰她：「傻女嚟嘅，唔緊要。」這個溫暖舉動讓Becky至今難忘，也讓她見識到DoDo親和的一面。

詳細節目內容，請留意11月8日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/

藝人廖碧兒（Bernice）日前到新城廣播接受李有毅（Ben）與兒子李國煒（Benson）主持的《Ben同Benson「Chur」到行》節目錄音訪問，憶述多年前拍劇時遭遇的一次嚴重意外，導致腰部脊骨骨裂，但她當時仍堅持完成拍攝，其堅毅態度令人動容。

廖碧兒接受新城廣播《Ben同Benson「Chur」到行》。

Bernice透露意外發生在TVB拍攝最後一部劇集期間，當時正在中環拍攝外景，她不小心踩中一個被遮蓋的地面洞口，整隻腳陷入近三呎深的坑中，瞬間力量拉扯導致腰部嚴重扭傷。她起初以為只是普通扭傷，希望堅持完成工作，但後來痛楚加劇，求醫後才驚覺「後面骨頭斷了一點」，即腰部脊骨出現骨裂。

由於該劇是邊拍邊播的「緊接劇」，且接近結局篇，Bernice擔心影響播出進度，決定忍痛完成。她表示：「我一直食止痛藥，希望拍完佢，但喺最後兩、三個星期，傷勢已經嚴重到企都企唔穩，真係好痛，要工作人員喺鏡頭外扶住我。」她憶述：「佢哋一停機，好多人知道要扶住我。」

廖碧兒爆拍劇遇嚴重意外脊骨斷裂。

忍痛到煞青即入院。

完成所有戲份後，Bernice立即入院接受治療，可是最初嘗試的小型手術效果不理想，24小時內便決定進行第二次手術，而那段時間為了專心休養，她隔絕了外界所有訊息，同時要暫停最愛的舞蹈，Bernice表示：「所以嗰時最擔心，好唔開心，開刀都唔知行唔行得番，但你唔做（開刀）就永遠都係咁，依家身體入面有嚿嘢喺到撐住條腰。」

康復後身體機能亦無法完全回到受傷前的狀態，例如舞蹈動作的幅度受限，她更因此練習詠春等功夫，鍛鍊身體穩定性和力量，繼續活躍於她喜愛的舞蹈與運動。

廖碧兒接受李有毅(左)、李國煒(右)訪問。

詳細節目內容，請留意12月6日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/