正於聖誕及跨年檔期上映的勵志電影《逆轉上半場》，女主角梁詠琪（GiGi）現正身在西班牙。昨晚（12月29日，香港時間），她特別前往球壇聖地——巴塞隆拿主場館 Spotify Camp Nou 開IG Live，並帶領戲中「光希隊」的小演員一同朝聖，與觀眾分享難得時刻。
梁詠琪（GiGi）親赴巴塞主場館。
GiGi趁聖誕假期與家人飛往丈夫的西班牙家鄉，探望年邁的老爺與奶奶。據悉，八十多歲的老爺近年多次出入醫院，因此GiGi早已計劃今年聖誕回鄉陪伴家人。她表示：「未能跟《逆轉上半場》團隊於聖誕節一齊到戲院謝票感到可惜，見到大家努力謝票亦好想參與。元旦後會趕返香港，希望盡快聯同其他演員跟觀眾見面。」
GiGi此行途經巴塞隆拿，亦把握機會以戲中領隊身份，帶領光希隊小演員到 Spotify Camp Nou 參觀。雖然身在外地，她在直播期間仍被不少遊客認出並要求合照。GiGi笑言：「巴塞球場係好多fans都想嚟嘅朝聖地，我哋都排咗好長隊先入到去。」
與《逆轉上半場》小演員開Live。
GiGi與周衹月、單焯翹及譚峻然分享拍攝趣事。
直播中，GiGi與周衹月、單焯翹及譚峻然一同分享拍攝趣事。 GiGi特別提到周衹月本身是足球員，寄語她能在國際球壇發光發亮：「好多觀眾因為呢套戲認識你，原來呢個咁靚嘅女仔係踢專業足球賽。你嘅第一套電影真係要多謝導演，拍得好好，將你踢足球嘅英姿呈現得好勵志，好多人都讚你倔強嘅眼神，好做到我表妹嘅感覺。」
GiGi更親自訂製紀念球衣送觀眾及小演員。
周衹月亦感激導演的信任：「好多謝導演喺咁多人裏面揀我呢個唔太識做戲嘅女仔。好在有專業導師教我哋點樣演戲，令拍攝更加流暢。大家記得多啲入場支持《逆轉上半場》，睇多幾次會更開心。」
GiGi亦分享初接拍時的擔心：「小朋友踢足球嘅題材喺市場上點走向都係未知。但一路拍攝遇到大家，見到你哋咁辛苦都冇怨言，一齊捱過成個8月，睇到成品真係覺得值得。」她又透露不少觀眾大讚單焯翹（飾演阿倫）口材好、反應快，是「潛質演員兼棟篤笑材料」。
此行中，GiGi更為五位主要小演員訂製印上英文名字的10號巴塞球衣，心思滿滿。她說：「另外我仲整咗三件，係特別送俾我哋部戲嘅觀眾，到時會送俾大家。」
GiGi更親自訂製紀念球衣送觀眾及小演員。
不經不覺Gigi梁詠琪已經入行30年，為好好記錄這個事業里程碑，主辦單位「掌賞娛樂」宣布，將於今年11月27-29日假紅磡香港體育館為Gigi舉行《梁詠琪 LOVE GiGi愛自己世界巡迴演唱會-香港站》。
梁詠琪將於今年11月在紅館開騷
「高妹」大長腿再現
梁詠琪入行30年
為演唱會拍攝宣傳海報
至於選擇在11月舉行個唱，背後原來有一個深層意義。Gigi的首張廣東個人專輯《愛自己》，正正是在30年前、即1996年11月11日推出，Gigi一直希望能在這個充滿回憶與紀念價值的月份舉行個唱，如今終於願望成真。
由標誌性的「短髮」加入樂壇，紅遍兩岸三地到今時今日歌影視三棲，早前仍勇於挑戰全國語對白話劇《我們成為的她》、及接拍驚慄電視劇《聰明鎮》。工作上繼續勇於嘗試，Gigi坦言，入行三十個年頭，除了熱愛工作和生命，還懂得如何愛錫自己。
「今次演唱會個名叫『愛自己LOVE GiGi』，點解會叫愛自己？因為《愛自己》呢首歌係我三十年前發表嘅第一首音樂作品。回想這三十年我如何面對自己？做人嘅宗旨係咩？其實同呢首歌一樣要『愛自己』。無論發生咩事、同咩人相處、工作成點，去到人生邊個階段，最重要係做到愛錫自己、對自己誠實。加上呢三十年來緊記要愛惜自己，歌迷又好錫我，所以就用咗『愛自己』呢個概念。」
至於拍攝演唱會海報的概念，Gigi笑言今次整個製作團隊，都是合作30年的並肩戰友，所以完全放手讓團隊設計、構思，即使要她Deep V穿上西裝褸、再盡騷白滑長腿，Gigi一樣無比信任。
「今次演唱會海報嘅concept、影相嘅color tone同造型，都係交俾專業團隊負責，希望帶俾大家開心、有型嘅感覺。造型方面，Deep V都可以試吓啦！我覺得騷腿得嚟有型又靚，感覺自在、舒服，整體效果好靚。同埋今次無論係影相、開會、美術、髮型、化妝定係拍MV，都係搵番合作咗好耐嘅老朋友。大家相處咁多年，已經超越咗純粹嘅工作夥伴，而係真正嘅朋友。」
的而且確，有娛樂圈「高妹」之稱的Gigi，在拍攝時舉手投足都能配合攝影師的要求，盡騷她的45寸長腿，加上招牌式的甜美笑容，成就了這張Gigi充滿快樂正能量的演唱會海報。
轉眼入行三十年，廣東、國語經典作品多不勝數，要從中抽絲剝繭挑選最強歌單，絕對不簡單，Gigi笑說：「上次《時間遇上我們》演唱會，特登想做個紀錄，所以香港站全廣東歌、台灣站就全國語歌，但今次我想『大兜亂』！總之大家想聽咩歌，廣東又好、國語又好，通通都唱。」
回望過去，Gigi覺得初出道首十幾年，工作量排山倒海，「飛人」生活到外地四出宣傳的日子雖然很癲狂，但她十分感激身邊有一班愛錫她、為她事業打拼的工作團隊。
「為咗宣傳國語同廣東唱片，自己好似『超人』一樣，試過喺台灣拍MV拍到凌晨五點，再趕搭六點幾機返香港，一落機就直奔電台做宣傳。又試過去外地探訪完返香港，夜晚十點仲要去錄音室錄歌。只能夠坐車同搭飛機瞓覺，好感激當時所有人的栽培，辛苦都覺值得。同埋一路以來合作嘅經理人公司、唱片公司每一位同事、幕後嘅作曲填詞人、企劃、甚至當時賣CD，要動用好多人力物力嘅幕後人員，經理人、同我合作過嘅助手、好多電影嘅導演同演員，我都心存感激！當然亦唔少得我嘅歌迷。其實走過呢三十年，遇到好多好人，每一個人都喺我生命裏面俾我好多回憶同學習。」
今時今日對工作依然熱衷，願意跳出舒適圈嘗試不同挑戰，Gigi坦言全靠自己的一份好奇心。
「我就係永遠抱住一個好奇心行到依家。未來嘅十年二十年，仲有咩發生呢？我依然感到好奇。雖然有些工作看似不斷重覆，但每一件事當我再深入探索嘅時候，都總可以比上次做得更好！總之繼續抱住好奇心啦！任何新挑戰，我都好樂意去接受。」Gigi說。
有關演唱會優先訂票及公開發售日期時間，請留意主辦單位「掌賞娛樂」與Gigi的社交平台，作進一步消息公布。
《梁詠琪 LOVE GiGi愛自己世界巡迴演唱會-香港站》
日期：2026年11月27-29日
地點：紅磡香港體育館
票價：$1180/$780/$480
