講起肉骨茶，好多遊客都會問：「啲茶呢？點解碗湯冇茶葉嘅？」
每次聽到呢條問題，我都忍唔住想笑。老老實實，肉骨茶呢個名，真係堪稱飲食界最大嘅「標題黨」。如果話畀你知，肉骨茶入面冇茶底，係咪好吊詭？
肉骨茶其實係當年福建移民去南洋做苦力嗰陣，為咗祛濕、補氣、頂住捱世界，用當歸、川芎、玉竹、甘草呢啲藥材，加埋豬骨、排骨一齊煲嘅湯。以前啲人叫呢類藥材湯做「茶」——即係好似我哋飲「二十四味涼茶」咁，明明係苦到癲嘅藥湯，都叫做「茶」。所以肉骨茶個「茶」字，其實係指「藥材湯」，唔係紅茶綠茶嗰隻茶。
講到肉骨茶，仲有一個常見嘅「內戰」要搞清楚：馬來西亞版同新加坡版，根本係兩樣嘢。
馬來西亞巴生嗰邊係「福建派」，湯底深色到近乎黑，藥材味濃烈霸道，一飲落去當歸、川芎嘅甘香直衝上腦，有時仲會落埋黑醬油，味道厚實得嚟帶少少藥苦，係嗰種「老火煲足幾個鐘、飲完覺得成個人補咗」嘅風格。配嘅通常係三層肉、豬腳、內臟，粗獷豪邁，係福建人「落重料、出濃味」嘅性格。
新加坡嗰邊就係「潮州派」，湯色淺而清澈，胡椒味搶晒風頭，藥材只係輕輕帶過。飲落去第一啖係白胡椒嘅辛辣刺激，之後先有淡淡嘅肉甜，清爽唔油膩，連夏天飲都唔會覺得燥。配嘅多數係靚排骨，食完肉仲可以飲晒成碗湯，係潮州人「講究原味、輕調味」嘅作風。
簡單講：馬來西亞版似「藥材湯底嘅濃湯拉麵」，新加坡版似「胡椒清湯配靚排骨」。兩派各有支持者，你叫馬來西亞人飲新加坡版，佢會話「呢個係胡椒水唔係肉骨茶」；你叫新加坡人飲馬來西亞版，佢會話「咁重藥材，飲完會流鼻血㗎」。
試過有外國朋友好認真問我：「如果我要『茶』，可唔可以喺肉骨茶入面加個茶包？」我忍笑答佢：「你可以加，但你飲緊嗰碗就變成肉骨茶包，唔係肉骨茶。」
其實諗深一層，呢個誤會都幾得意。一個名，記載住華人落南洋嘅歷史、苦力嘅汗水，同埋現代人對飲食文化嘅想像。最重要係，唔好再問點解冇茶葉啦。再問，老闆可能會答你：「你想要茶葉？得，加十蚊，我畀個茶包你自己浸。」
食講究
** 博客文章文責自負,不代表本公司立場 **
前幾日，有位國內同事帶咗盒青團落嚟香港，話清明將至，請大家試試。大家圍埋一齊，咬開綠色嘅糯米皮，入面有豆沙、亦有鹹蛋黃肉鬆餡幾款。有位同事第一次食，皺皺眉：「咁似大福嘅？係咪加咗草味嘅大福？」大家笑作一團，但又覺得佢講得有道理。同樣係糯米皮包餡，點解日本大福賣到幾十蚊一粒，青團幾蚊就有交易，而香港糯米糍就由街邊小食，進化到而家十幾廿蚊？
日本大福：由「大肚腩餅」到精緻甜點
大福以前有個好老土嘅名，叫「大腹餅」——即係「大肚腩餅」。室町時代後期已經有人賣，用麻糬皮包住鹽味紅豆餡，搓到圓轆轆，食完飽到上心口。後來有人嫌個名太粗俗，改咗諧音「大福」，聽落即刻吉祥晒。1787至1793年間，有位住喺江戶嘅寡婦，將紅豆餡嘅鹽換成砂糖，結果一炮而紅，大福正式出道。
大福用嘅係糯米粉，皮薄煙韌，餡料以豆沙為主。今日嘅大福早已脫胎換骨，豆大福、草大福係傳統派；草莓大福、栗子大福、水蜜桃大福係水果派，擺到靚一靚，每粒都精緻過人。日本甚至有間專門店「覚王山フルーツ大福 弁才天」，2019年先開業，轉個頭已經開到七十幾間分店。包裝精美、匠人手藝、品牌效應，加加埋埋，一粒賣你四五十蚊，粉絲照買。
青團：江南嘅「期間限定」平民美食
青團嘅歷史仲耐過大福。明代嘉靖年間，江浙一帶已經用青團嚟拜山。清代文人徐達源寫過「相傳百五禁煙厨，紅藕青團各祭先」，可見當時嘅流行程度。青團用嘅係糯米粉，但佢嘅綠色來自艾草、漿麥草或鼠麴草，咬落有陣淡淡嘅草香。傳統餡料係豆沙，近年就玩到出神入化——鹹蛋黃肉鬆、芋泥、芝士，乜都包得落。
青團賣嘅係「期間限定」：錯過清明，就要等明年。呢招行銷手法，令佢每年都掀起搶購潮，但價錢仍然親民，上海老字號「沈大成」「王家沙」賣嘅青團，幾蚊人民幣就有一粒，大排長龍都係為咗呢啖平民滋味。
香港糯米糍：由「狀元糍」到街頭升呢
講返我哋香港嘅糯米糍，來頭都唔細。相傳南宋有位讀書人上京赴考前，鄰居送咗糯米糍俾佢。結果佢高中狀元，仲將糍粑獻俾皇帝，獲賜名「狀元糍」。傳統嘅糯米糍只有花生、芝麻、豆沙餡，樸實無華。但近十年，糯米糍都識得「升呢」。長洲芒果糯米糍率先跑出，皮薄餡足，成為遊客必食之物。之後華田糯米糍、抹茶紅豆糯米糍陸續登場，價錢都由當年幾蚊一粒，進化到十幾廿蚊。由街邊走入商場，由平民小食變身IG打卡主角，糯米糍嘅價格，見證咗香港小食嘅「升呢」之路。
同事笑住話：「原來青團係大福、糯米糍個friend。」但講到尾，只係包裝唔同、行銷手法唔同，價錢就差天共地。佢哋三個其實都用糯米粉做皮，大福用日本糯米，講究皮薄煙韌，賣嘅係精緻包裝同匠人品牌，買嘅係一種「儀式感」；青團就加咗艾草，傳統手工做嘅仲食到艾草纖維，賣嘅係期間限定同懷舊情懷，幾蚊雞就食到一年一度嘅滋味；而我哋香港嘅糯米糍，成功轉型，靠嘅係創新口味同本土情懷，仲有咬落去嗰陣，有少少要博吓粒芒果係甜定酸嘅過癮快感。
邊粒啱你口味，自己揀——最緊要食得開心。
