草蜢x軟硬復刻2012年大戰紅館演唱會掀集體回憶 XXL版造型鬥唱又鬥嘴

「THREE IN LOVE草蜢演唱會2026」昨晚（5月1日）紅館舉行第5場，鄭伊健、鄺美雲、谷德昭、鍾鎮濤、溫碧霞和肥媽等捧場，與全場觀眾玩人浪、起身跳舞大合唱，玩得好High。昨晚表演嘉賓軟硬天師，復刻「草蜢森巴大戰軟硬Fans演唱會 2012 GHVSSH」，更以20年前一黃一紅戰士look登場，掀集體回憶。不過變成XXL版，草蜢被殺個措手不及，笑到幾乎講不出話：「十幾年無見，肥咗喎！」

草蜢紅館演唱會來到第5場。

鄭伊健

鄺美雲

鍾鎮濤、肥媽等都來捧場

軟硬天師以20年前一黃一紅戰士look登場。

XXL版！

當年12場對決後軟硬險勝，昨晚他們再戰紅館，軟硬將草蜢《三分鐘放縱》加入首本名曲《老人院》、《廣播道fans殺人事件》和《川保久齡大戰山本耀司》歌詞，好有心思，但蔡一傑「投訴」他們雙腳無離地跳舞揸流攤，蔡一智更取笑他們跳「落地生根舞」。林海峰反擊：「你哋係『跳舞組合』，我哋係『無跳組合』！」而草蜢跳唱軟硬的《叱咤勁歌金曲》迎戰，非常精彩。同當年一樣，以現場歡呼聲評分，雖然主場草蜢明顯大勝，但軟硬出茅招亂噏賽果，非常爆笑。

草蜢與軟硬天師

草蜢送上泳褲給林海峰，預祝他三項鐵人比賽成功，而送葛民輝孖煙囪底褲。林海峰爆小秘密，原來1993年軟硬宣傳《廣播道fans殺人事件》時潮爆板仔look，其實是抄草蜢《三分鐘放縱》MV造型。「睇電視見到，嘩，咁型，但唔襯你哋囉！我即刻叫阿葛跟住搵。」結果獲當年板仔界鉅子BFD日籍老板Tabo贊助，軟硬成為潮流指標，林海峰多謝草蜢啟發，揚言他們任何時候要「大戰」，軟硬隨時奉陪，台下Fans立即歡呼，期待草蜢再乘軟硬開騷。

軟硬天師

草蜢

草蜢與軟硬天師

軟硬一唱一和，將近日草蜢三子在演唱會台上講的深情說話，重新組裝成軟硬模式，全場笑聲不絕。林海峰說：「你哋三個話希望下一世都做兄弟，點解無預我哋兩個？如果唔預埋我哋，就無辦法同你哋『大戰』！」又對傑仔說：「人生嚟到呢個地方，要將張畫紙畫到最靚。」葛民輝扮傑仔語氣：「如果軟硬有張畫紙，一定請埋草蜢一齊畫！」傑仔說：「我哋張畫紙都一定有你哋軟硬份嘅！」

草蜢與軟硬天師

草蜢與軟硬天師

之前蔡一智台上多謝舊同學蘇志威，林海峰說：「我都多謝我嘅同學葛民輝，我哋都係屋村大，無諗過我哋呢個組合都可以堅持到40年！」蘇志威質疑有40年？葛民輝說：「四捨五入！」又說：「雖然我哋兩兄弟成日吵吵鬧鬧，但係我哋永遠都係一體！」林海峰拉住傑仔說：「將來無論你哋三個邊個走先（草蜢齊聲『啋』），我都會走先，因為我慣咗早瞓。如果草蜢下一世有場紙嘅話（紅館開騷入場紙），我哋軟硬下一世都會做兄弟，陪你哋繼續玩落去！」五子手搭手結盟，場面感人，但阿智突然對軟硬說：「我想講⋯⋯我點都唔會着你哋件衫！」全場爆笑！接著他們合唱草蜢的《朋友》和軟硬的《好兄弟》混合版，全場High 爆！

草蜢與軟硬天師

草蜢與軟硬天師

殿堂級組合草蜢一連兩場《GRASSHOPPER THREE IN LOVE CONCERT 草蜢演唱會2026》馬來西亞站日前圓滿落幕。現場座無虛席，逾萬名樂迷跟隨節奏跳足三小時，場館瞬間化身成大型狂歡派對，氣氛極度熾熱！

草蜢馬來西亞開騷萬人跳爆場館。

草蜢以《A.E.I.O.U》、《紅唇的吻》、《又愛又恨》等多首經典快歌為演唱會揭開序幕，前奏一響，全場逾萬名樂迷即時起立，隨着節拍揮動螢光棒並全場大合唱。談及馬來西亞樂迷的熱情，草蜢於完騷後接受訪問時仍難掩興奮。蔡一智表示：「非常開心，我以為新加坡站嘅觀眾勁，原來馬來西亞嘅觀眾都唔弱。」蔡一傑感動說：「今晚嘅觀眾真係Very Good，冇得頂！如果佢哋冇畀到呢啲力量我哋，我哋都冇咁興奮！」

兩度Encore加碼送歌。

阿智更特別提到現場化身大型舞池的震撼場面：「呢個場館好大，坐咗成萬幾人，我哋加咗好多 Mirror Ball，頭先真係好似一個大型派對。馬來西亞嘅Clubbing都好勁，頭先好似一萬人喺度Clubbing，個感覺好正。」他還溫馨提示入場的樂迷記得穿運動鞋：「我哋啲樂迷愈來愈醒目，睇草蜢個個都着波鞋。有一位樂迷問佢家姐點解要着，睇完個騷佢就明白。」

蘇志威

蔡一傑

蔡一智

演唱會尾聲，全場萬名樂迷依然不肯離場，大嗌 Encore。為了不讓樂迷失望，草蜢兩度Encore加碼送上經典名曲《世界會變得很美》及《永遠愛著您》，帶動全場大合唱掀起最後高潮，樂迷才依依不捨離去。阿智感激道：「噚晚已經好勁，啲觀眾已經唔走，我哋要出返去清唱咗兩首歌。今日仲勁，我哋仲加碼添。」傑少補充指，適逢當地假期，令大家的興奮情緒更加高漲。

草蜢獲大會安排榴槤放題。

除了樂迷的熱情令草蜢大受感動外，主辦單位亦為三子及團隊準備了極具當地特色的驚喜——「榴槤車」，讓台前幕後在開騷前免費「任食放題」品嚐極品榴槤。為了以最佳狀態登台，草蜢在備戰期間一直保持清淡飲食，如今順利完騷，三人笑言終於可以大開食戒，蘇志威更急不及待狂食榴槤！

順利完成馬來西亞站後，草蜢隨即宣布《THREE IN LOVE》巡迴演唱會將於10月移師澳門舉行，更透露澳門站將採用極為罕見且震撼的「四面台」舞台設計。蘇老闆表示：「除咗香港嘅紅館外，我哋嘅巡迴演唱會多數係三面台，澳門開四面台係好難得。」三子呼籲樂迷切勿錯過，一同親臨現場感受四面台的威力。

預告10月移師澳門開四面台。