《COURT!》X小姐性感登場最擔心身型令觀眾出戲 Gen Z演員葉澍欣APA畢業首度拍劇踏足片場感夢幻

由MakerVille出品，銀河映像製作的ViuTV原創劇《COURT!》於今天（5月18日）首播，Gen Z演員葉澍欣（阿澍）於劇中飾演猥褻案受害人「X小姐」李朗晶，第一次拍劇的她便以性感造型登場，非常搶鏡！畢業於演藝學院（APA）的阿澍為了演戲不介意性感，反而最令她擔心的是其身型不貼近角色而令觀眾出戲。

《COURT!》截圖

《COURT!》截圖

《COURT!》截圖

《COURT!》

阿澍自小二開始接觸戲劇，曾於校內戲劇節獲得傑岀演員獎，長大後考入APA戲劇學院表演系並於2024年畢業，開始踏上其銀色旅途。首次拍劇的阿澍感到既興奮又緊張，「當時畢業沉寂咗一段時間，諗緊係咪需要另覓高就嘅時候得到呢個機會，非常興奮亦好感恩，多謝身邊朋友陪伴我好好準備角色。」在片場那刻令她很感動，「雖然咁講好誇張，因為機會難得，非常夢幻，因此自己要求亦非常高，好想做好件事，要對得住自己同俾機會我嘅人。少少壓力啦，見到咁多大人物都十分緊張，不過大家都好照顧我，謝謝咁多位對手幫忙！仲有咁多位幕後人員，好幸福遇上咁多好好嘅人。」她特別點名多謝邵美君，「多謝令我得到Casting機會嘅『君仔』邵美君老師，畀機會我同極照顧我，提供滿滿情緒價值畀我嘅監製Elaine（朱淑儀），仲有畀機會我嘅導演Terry（吳家偉）！」

Gen Z演員葉澍欣

Gen Z演員葉澍欣

阿澍畢業於演藝學院

阿澍畢業於演藝學院

IG派福利

劇中飾演李朗晶的阿澍以性感打扮示人，被問到有沒有性感底線？阿澍說：「能夠接到任何角色都係一個難得嘅機會，要好好把握，做演員就係想經歷另一個人嘅生命，幫角色講故事，反而我係擔心自己嘅身型唔貼近角色，令觀眾唔入戲。」她續說：「至於性感底線，視乎角色需要同睇吓係咩劇本啦，暫時全裸係驚嘅，分分鐘觀眾都未必想睇。」她對自己身型沒太多信心，但隨着年紀增長比以往放開了，「特別身邊啲朋友都話『𠵱家唔著靚啲幾時着』？能夠透過唔同角色記錄自己年輕時嘅身型、成長，往後回望返都係一件幸福嘅事。」

最近忙於排練中英劇團的音樂劇《邊城》及拍攝工作的阿澍，同時亦有做兼職和教育工作維持生計，「短期夢想希望能夠只以演員身份就能夠維持到生活。我係一個唔能夠畀自己停低嘅人，會學唔同嘅興趣填補下空缺嘅時間，學日文、跳舞，會同朋友拍吓唱歌跳舞Cover，所以…..歡迎任何工作邀請。」

ViuTV原創劇《COURT!》將於5月18日起，逢星期一至五晚上9時30分播映。《COURT!》由MakerVille出品，銀河映像製作，幕後團隊包括監製游乃海、朱淑儀，導演吳家偉，以及編審潘漫紅。劇集分為3個單元，講述基於不同觀點角度、難以致信的巧合或為了維護更公平的法律原則，都影響著所有案件在法庭上的細節，令最終「真相」的呈現，面臨著不同挑戰和考驗。

《COURT!》劇照

《COURT!》劇照

《COURT!》劇照

《COURT!》劇照

《COURT!》除了有多位律政界猛人外，亦有刑事偵探組的警員，歐鎮灝（George@P1X3L）和陸駿光分別飾演的角色德仔和肥祥為其中兩員，二人分享今次拍劇的心路歷程。

陸駿光飾演的肥祥是警察小隊中的阿頭，陸駿光形容角色：「佢係一個做咗好多年，但亦都係好有諗法嘅一個警察，佢就唔係為咗要破案去紮職嘅人，佢係比較實在嘅人，冇乜野心，好安份守己，但佢又唔想同人爭，係一個想搵真相嘅人。所以就成日會畀人覺得，啲同事會覺得我係比較Hea Hea地。因為人哋想破案，破案就可以升職。但我就唔係一個咁嘅人。但我又係嗰Team人嘅阿頭。我啲同事就會覺得你條友唔掂喎咁樣做嘢，覺得我太淋。」

《COURT!》劇照

《COURT!》劇照

《COURT!》劇照

他與編審潘漫紅相識多年，「佢一見到我就話個角色係我嚟，其實個角色係一個Humble，知道好多嘢但又唔出聲，唔敢嘅人，好多人都會講了解嘅嘢，但未必係啱，但我就唔出聲，我就默默去搵真相嘅人，變咗好似有少少唔合群。」他續說：「咁我有咩同佢似呢？我都係好多時唔出聲嘅，我覺得我出聲都會改到佢嘅諗法，但我做嘅嘢就會話到畀你聽乜嘢係真相，乜嘢係啱，或者我自己嘅Believe，所以我用咗呢一方面去做個角色。」

George飾演的警界新血德仔是一位初入行的刑事偵探組組員，「佢係一個對於查案係好有熱誠嘅一個人，佢喺組入面係渴望被認同，默默地做好多嘢，係一個做得嘢嘅𡃁仔。今次對白未必有太多，但係反而有更多做戲嘅機會，同埋多咗好多觀察。」他續說：「非常之感激Elaine姐（監製朱淑儀）畀咗好多機會我，我覺得呢個機會對自己演藝生涯上係需要，佢畀我嘅唔單止係一個演出機會，係另一套劇係飾演第二種性格嘅人。我覺得有點似《樹大招風》嗰種感覺，腦海裏面係《PTU》嘅感覺。」

不論演大小角色都同樣認真面對，他認為：「Even一個細角色，都需要花好多時間、心機去做好佢，就算個Cam冇畀你大頭，都會影到你，你都要畀觀眾知你係做緊戲。」他又謂：「我在意嘅唔係自己演技有幾好，而係有演嗰個特質喺裏面，我想畀觀眾見到我可以有好多唔同嘅演技，唔一定我每一次演嘅角色係好懦弱，或者係一個中學生，其實慢慢隨住自己年紀我會想搵更加多唔同面向嘅角色去做。」