張宇人田少罵戰升級

特首CY委任自由黨主席張宇人入行政會議，自由黨大佬田北俊好唔順，一直狙擊張宇人，早前暗示張宇人唔好做黨主席，最新指控是覺得張宇人是知道有機會入行會，所以才會做自由黨主席。

田少昨日在電台節目話，張宇人加入行政會後影響極大，因為自由黨的4名立法會議員的票將會全部歸隊支持政府，佢認為梁振英將更有恃無恐，令香港社會更加分化。

田少又質疑，張宇人過去很少參與黨務，在10月初自由黨改選時，本來黨內是希望主席位置先出缺，等批發及零售界議員、 現任副主席邵家輝自己覺合適時，便會交棒俾佢做，但張宇人又突然話「捱義氣頂住先」，都好奇怪。

田少話張宇人突然變得積極，出選黨主席，個人覺得，可能一早有人告訴張，只要當選黨主席，就可獲委任入行會。

張宇人早前對田少的批評都頗忍讓，昨日有啲嬲，反駁田少的言論純粹靠估，指梁振英是10月他當選主席後，才邀請他出任行會成員。話自己在1995年加入自由黨後，一直有參與黨務工作，到2007年才因忙於處理生意暫停黨務工作 ，到2009年又重新投入黨務工作，做埋副主席。

其實自由黨的議員和田少貌合神離，早有跡象，田少日日隊政府，諷刺CＹ，唔係人人都同意，早前田少俾自由黨用自己的物業做辦事處，後來大家唔係幾啱，自由黨已另外找辦事處。直至９月立法會選舉自由黨在新界東、 新界西直選輸清，而且仲唔係輸少少，係輸好多， 證明隊政府都攞唔到議席，更令其他自由黨要反思係唔係繼續走反特首路線。 今次只係將多年矛盾，一舖清數啫。

Ariel

** 博客文章文責自負,不代表本公司立場 **

高院早前就宣誓風波頒下判詞，裁定「青年新政」梁頌恆及游蕙禎10月12日在立法會的宣誓無效，喪失議員資格，梁游不服上訴，今日被上訴庭駁回。最杰的是上訴庭判梁、游兩人要俾埋原審時立法會主席梁君彥的律師費。

案件在原審時梁游敗訴，但區慶祥官只命令梁游支付政府的訟費，不用負擔梁君彥的訟費。但有心水清老友提醒Ariel去睇判詞有關訟費的部份，果然有所獲。

上訴庭三位法官判梁游敗訴後，不但要支付今次上訴的所有訟費，還命令二人要負責原審時梁君彥的訟費。

法庭判訟費誰俾和責任誰屬有關，雖然在原審時官司由政府提出，但上訴庭顯然覺得事件由梁游而起，要為整件事負責，所以要判番轉頭，要佢哋俾埋梁君彥的律師費。

原審時政府由余若海和莫樹聯兩個資深大狀代表，佢地都係重炮，律師費本來已經唔少，再加埋梁君彥由資深大律師翟紹唐代表，又係另一筆數以百萬計的律師費。仲要加埋今次上訴各方的律師費，咁搞法加埋愈來愈近1000萬呢種數字。

而家梁游兩人仲話要上訴去終審庭，搞埋終審想唔過1000萬都唔得，咁搞法兩人好易破產喎。