《風車草SuBeDoWa 音樂會2026》唱出真感情 梁祖堯唱到走樣邵美君尋回初心湯駿業學習適應

風車草劇團再度回歸劇場，於日前假上環文娛中心劇院上演一連7場《風車草SuBeDoWa 音樂會2026》，三位劇團中流砥柱成員：梁祖堯、湯駿業及邵美君，在舞台暫時放下演員身分做回自己，透過歌曲展示他們內心深處最真誠的自己。7場演出座無虛席，每場三位都唱到眼濕濕，而尾場完show後，三位都表示十分享受這次重返劇場的難得體驗，同時亦透露The Show Must Go On，風車草亦將於8月演出全新劇目《回憶的味道》。

Photo Credit by Carmen So @ Right Eyeball Studio

Photo Credit by Carmen So @ Right Eyeball Studio

Photo Credit by Nicole Lam

Photo Credit by Nicole Lam

Photo Credit by Nicole Lam

在尾場的演出中，觀眾反應都異常熾熱，所以阿祖、AhDee及阿君在尾聲為大家特別送上鄭秀文的〈我們都是這樣長大的〉，阿祖感性道：「我哋一齊經歷咗好多時光，每一次我哋都又成長，所以好想用呢首歌多謝你哋，一路同我哋一齊行。」唱罷阿祖續道：「人生充滿變化同難關，經歷每個難關嘅時候總會感到不知所措，但過咗之後望返轉頭，都係一種歷煉，好衷心多謝你哋每位俾咗好多好多愛、鼓勵和勇氣我哋，我哋永遠都會擺喺心裡面，永遠都會記住。」

Photo Credit by Nicole Lam

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

風車草 SuBeDoWa 音樂會2026 尾場

其實今次《風車草SuBeDoWa 音樂會2026》的選曲都很有心思，好似阿祖選唱了林家謙〈某種老朋友〉，AhDee選唱了陳奕迅〈黃金時代〉、阿君選唱了王菲〈討好自己〉等等，全部都是內藏他們的心聲。阿祖分享道：「每次《SuBeDoWa音樂會》都係記錄我哋嘅成長，我哋由廿幾歲嘅𡃁仔𡃁妹，變到而家呢個歲數嘅時候，唱返聽返好多以前好熟悉嘅歌感覺好唔同，例如〈黃金時代〉，當時聽係好熱血嘅作品，而家再唱又另一種味道，好得意，同埋今次嘅觀眾非常熱情，遠超我哋想像，能夠有一班咁樣嘅觀眾實在太幸福，好多謝佢哋。」AhDee道：「好耐冇做，感覺好似終於有一個好親近同大家見面嘅機會，同觀眾一齊講下近況。」阿君亦和應道：「呢個雖然好似一個演出，但其實講咗好多我哋自己嘅感受，就算平日我哋都未必會傾得咁深入。」

講到今次選曲，阿祖形容為挑選死亡，他笑說：「我自己都投降，因為以我音域，根本冇可能可以唱到林家謙〈某種老朋友〉，但呢隻歌對我嚟講意義好大，所以我好想挑戰。好多次想放棄，但大家都鼓勵我，話我可以唱出自己嘅聲音，結果每晚都唱到膽顫心驚，有好多晚仲唱得好差，係因為情感一嚟嘅時候我就喊住唱，唱到走晒樣，但有觀眾同我講話呢個係最觸動佢心靈版本，令我覺得非常安慰同值得，因為真係練咗好耐！」阿君則揀了陳凱詠JACE〈間歇性休眠〉，她回憶起排練期間的辛酸，說道：「起初拍子完全數唔到，但音樂總監Mike Orange都訓練咗我哋好多唱歌嘅方法，要注意啲乜，所以呢次演出唔係淨係揀我哋好叻嘅歌，而都係我哋進步嘅過程。」至於AhDee則選了Kiri T〈至少做一件離譜的事〉，唱出了自己的任性，但他表示：「其實有啲歌唔同message喺唔同時空都會共通，今次就揀咗呢啲歌去分享。」除了觀眾耳熟能詳的流行曲，今次《SuBeDoWa音樂會》亦揀了一些風車草演過的音樂劇曲目，當中包括〈你咪理，我愛你，死未！〉及〈Avenue Q（Q畸大道）〉，AhDee表示：「呢兩個show係喺Broadway買返嚟，好難得可以再做返唱返啲歌俾大家聽，因為識得風車草嘅觀眾一定識得呢啲歌，佢哋應該好想再聽下。」

相比近年的演出，今次轉戰上環文娛中心劇院，阿祖表示：「今次觀眾量係細咗，但呢個親密感，令我哋返到去當初成立風車草嘅時候，就係喺呢個size嘅劇場演出。再次返回呢種距離係好夢幻，如果作為監製，計算收支係難計嘅，但作為表演者就好正，因為好近，我流一滴汗一滴眼淚，觀眾都會見到，觀眾抹一滴眼淚我都會見到，所以我覺得好正。」AhDee亦補充道：「感覺好赤裸，真性情表露無遺，同時亦等大家見到，我哋做show、做舞台就係咁，我哋同觀眾嘅交流就係咁簡單，喺咁近嘅距離，觀眾會感受到我哋最真實嘅內心情感。」阿君亦指這次演出讓她找回初心，她說：「呢個距離互動好直接，因為佢哋見到就會有反應，我哋見到又會反應，我哋一路學戲劇就係呢個初心——同觀眾要有give and take，呢個場地雖然細，但彼此之間嘅互動係好touching。」

這次離開了葵青劇院，在新環境演出，對於風車草來說是一個沉重打擊，AhDee也坦言：「冇咗葵青劇院，呢個打擊可以令風車草爭啲消失。我哋都真係好擔心，束手無策，唔知點算好，但好彩喺我哋尋找book場嘅過程得到好多幫助：康文署同上環文娛中心都俾咗機會我哋可以喺呢度做演出，咁代表我哋仲有機會可以做。其實一個做咗20多年嘅劇團，如果見到我哋今晚嘅演出，會知道我哋真係揼石仔咁捱出嚟，所以突然間冇咗一啲資源，冇咗演出機會係好驚，但世界又好多改變——多咗好多人想book場，資源分配唔同咗，所以都嘗試學習適應。」《風車草SuBeDoWa 音樂會2026》結束後，風車草劇團未有停下來，稍後8月將會推出全新劇目《回憶的味道》。AhDee透露道：「我哋好努力四周圍去搵場，嚟緊淨返仲有一個演出機會，就係8月喺西灣河文娛中心演出嘅〈回憶的味道〉，呢個係我哋仲係葵青劇院場地伙伴計劃裡面嘅時候已經plan咗嘅project，而家冇咗大場做唔緊要，我哋嘗試將我哋好想做，好想俾觀眾嘅好嘅作品，喺細嘅地方做俾大家睇，所以好驚又好期待，因為唔知之後仲有冇。」

更多有關《回憶的味道》的詳情，將於稍後公布，敬請密切留意。

由風車草劇團主辦《回憶的味道》將於2026年8月6至16日假西灣河文娛中心劇院首度公演，這是風車草繼《回憶的香港》後，相隔7年由原班人馬製作，梁祖堯、湯駿業、邵美君及彭秀慧攜手演出的全新劇目。

梁祖堯

彭秀慧

邵美君

湯駿業

七年前，5位不同領域的專業設計師，與4位演員經過半年的資料搜集、人物訪談及公開工作坊，以參與式劇場形式，跟觀眾一同重溫及探討關於香港今天與明天的「回憶」，創造屬於我們的《回憶的香港》。七年後，原班人馬將會走訪香港各區，創造出《回憶的味道》。今次《回憶的味道》同樣通過大量深度遊及訪問，由香港庶民飲食文化作為切入點，上至名廚傳統精緻手工粵菜，遠至沙頭角客家村盆菜，近至我們每個人心目中最懷念的嫲嫲手工菜等等，然後將會以劇場方式，以獨立章節呈現出一種難以言喻又溫暖的「回憶的味道」。

《回憶的味道》將於8月6至16日假西灣河文娛中心劇院首度公演

《回憶的味道》將於8月6至16日假西灣河文娛中心劇院首度公演

在記者會上，幾位演員：梁祖堯、湯駿業（AhDee）、邵美君及彭秀慧（Kearen）均現身說法，談及7年後再次創作系列作品《回憶的味道》的因由時，阿祖道：「上次回憶的香港係一個自肥嘅計劃，嗰陣純粹係演員同幾位創作人想叉電，同埋想重新連結呢個地方，所以有《回憶的香港》。一直好想再做part 2， 最近時機成熟，大家有期，又搵到西灣河文娛中心劇院，所以就去馬。」AhDee亦補充道：「做《回憶的香港》時其實都搜集咗好多材料，特別係講到食，大家就癲咗，好多嘢想講，所以再做同系列嘅時候，就決定做《回憶的味道》，因為當提起一種食物嘅時候，會諗起同邊個食，發生乜嘢事，入面可以有好多故事。同埋做資料搜集嘅時候，發現好多家族食譜，再加上好多唔同小店嘅故事，都同我哋息息相關，所以我哋雖然由食物開始，但整個劇場都會同我哋呢個香港有關。」阿君亦道：「味道有好多種，但背後嘅故事，無論如何都係甜嘅，因為好嘅嘢先會留喺個心嗰度，同埋會想將美味傳遞開去。」今次Kearen再次跟風車草合作，她表示會送上「滋味」，她笑言：「這些滋味來自我們共同的回憶，因為我們成長年代太近了，雖然住在不同地區，有唔同背景，但大家都會有各自家庭裡成長嘅味道，我嘅加入會更豐富味道嘅層次。」

提及今次《回憶的味道》內的好玩元素，AhDee即坦白表示：「呢個show講明自肥，一定會做一啲自己開心嘅嘢。我哋前期討論嘅時候，已經諗到好多同食物有關又有趣嘅歌曲，到時要同大家分享。」阿祖亦道：「到時我會喺台上面下廚，大家喺劇場入面就會聽到爆鑊聲，亦會聞到啲香味，包保你會有生理反應，流晒口水。」AhDee更揚言，屆時或會呈現劇迷提供的家傳食譜，並邀請觀眾上台即時品嚐美食，絕對是一個沉浸式參與的舞台劇。阿祖揚言：「我有信心可以將劇迷提供嘅食譜重現眼前。」

其實回憶的味道可以是你我最有共鳴的好味道，但亦可以是自己才會體會的五感回憶，幾位演員今日亦在台上說起自己最難忘的香港味道。

彭秀慧：我會諗起媽媽煮嘅蛋角，媽媽會用湯勺，喺石油氣爐頭上面嘅火上面燒熱個湯勺，再將蛋漿及其他材料輪流倒入湯勺煮成蛋角，再放湯去食，我冇見過其他人做，係因為呢個show我先諗起媽媽做過呢個菜式，細個可能唔識珍惜，但而家好想整返。

邵美君：我有八兄弟姐妹，屋企好窮，但媽媽會成日突然煲當歸雞蛋糖水，嗰陣覺得好臭好憎，但大個先知原來好補身，嗰陣好唔鍾意，但大個先知道原來媽媽以前用最簡單嘅方法去令自己身體好，佢咁辛苦湊大我哋，但會用呢個方法養生，好偉大。

湯駿業：我媽每逢過年過節，特別年卅晚，一定會煮一個南乳炆齋，佢係花咗好多心機去煮，比起平時食飯，更加係未試過咁足料同埋咁多南乳咁惹味，平時食飯一碗飯就飽，但有南乳炆齋，我可以食兩碗，甚至再添都得。

梁祖堯：呢刻我會諗起煲仔飯，因為我小學時候嘅早餐，冬天寒流襲港，我公公會朝早煮好煲仔飯，我就睇住電視食。有時會有臘腸、排骨，愈凍啲食材就愈肥，所以有時會有臘肉，食完成身暖晒，我可以就咁著冷背心就返學。因為公公嘅門檻太高，所以而家坊間嘅煲仔食我都覺得唔夠好味。

聽到幾位演員的分享，不但令人垂涎三尺，更急不及待要在劇場一同品嚐《回憶的味道》這齣色香味俱全的劇作。