《風車草SuBeDoWa 音樂會2026》唱出真感情 梁祖堯唱到走樣邵美君尋回初心湯駿業學習適應

風車草劇團再度回歸劇場，於日前假上環文娛中心劇院上演一連7場《風車草SuBeDoWa 音樂會2026》，三位劇團中流砥柱成員：梁祖堯、湯駿業及邵美君，在舞台暫時放下演員身分做回自己，透過歌曲展示他們內心深處最真誠的自己。7場演出座無虛席，每場三位都唱到眼濕濕，而尾場完show後，三位都表示十分享受這次重返劇場的難得體驗，同時亦透露The Show Must Go On，風車草亦將於8月演出全新劇目《回憶的味道》。

Photo Credit by Carmen So @ Right Eyeball Studio

Photo Credit by Carmen So @ Right Eyeball Studio

Photo Credit by Nicole Lam

Photo Credit by Nicole Lam

Photo Credit by Nicole Lam

在尾場的演出中，觀眾反應都異常熾熱，所以阿祖、AhDee及阿君在尾聲為大家特別送上鄭秀文的〈我們都是這樣長大的〉，阿祖感性道：「我哋一齊經歷咗好多時光，每一次我哋都又成長，所以好想用呢首歌多謝你哋，一路同我哋一齊行。」唱罷阿祖續道：「人生充滿變化同難關，經歷每個難關嘅時候總會感到不知所措，但過咗之後望返轉頭，都係一種歷煉，好衷心多謝你哋每位俾咗好多好多愛、鼓勵和勇氣我哋，我哋永遠都會擺喺心裡面，永遠都會記住。」

Photo Credit by Nicole Lam

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

Photo Credit by snap_shot_sammy

風車草 SuBeDoWa 音樂會2026 尾場

其實今次《風車草SuBeDoWa 音樂會2026》的選曲都很有心思，好似阿祖選唱了林家謙〈某種老朋友〉，AhDee選唱了陳奕迅〈黃金時代〉、阿君選唱了王菲〈討好自己〉等等，全部都是內藏他們的心聲。阿祖分享道：「每次《SuBeDoWa音樂會》都係記錄我哋嘅成長，我哋由廿幾歲嘅𡃁仔𡃁妹，變到而家呢個歲數嘅時候，唱返聽返好多以前好熟悉嘅歌感覺好唔同，例如〈黃金時代〉，當時聽係好熱血嘅作品，而家再唱又另一種味道，好得意，同埋今次嘅觀眾非常熱情，遠超我哋想像，能夠有一班咁樣嘅觀眾實在太幸福，好多謝佢哋。」AhDee道：「好耐冇做，感覺好似終於有一個好親近同大家見面嘅機會，同觀眾一齊講下近況。」阿君亦和應道：「呢個雖然好似一個演出，但其實講咗好多我哋自己嘅感受，就算平日我哋都未必會傾得咁深入。」

講到今次選曲，阿祖形容為挑選死亡，他笑說：「我自己都投降，因為以我音域，根本冇可能可以唱到林家謙〈某種老朋友〉，但呢隻歌對我嚟講意義好大，所以我好想挑戰。好多次想放棄，但大家都鼓勵我，話我可以唱出自己嘅聲音，結果每晚都唱到膽顫心驚，有好多晚仲唱得好差，係因為情感一嚟嘅時候我就喊住唱，唱到走晒樣，但有觀眾同我講話呢個係最觸動佢心靈版本，令我覺得非常安慰同值得，因為真係練咗好耐！」阿君則揀了陳凱詠JACE〈間歇性休眠〉，她回憶起排練期間的辛酸，說道：「起初拍子完全數唔到，但音樂總監Mike Orange都訓練咗我哋好多唱歌嘅方法，要注意啲乜，所以呢次演出唔係淨係揀我哋好叻嘅歌，而都係我哋進步嘅過程。」至於AhDee則選了Kiri T〈至少做一件離譜的事〉，唱出了自己的任性，但他表示：「其實有啲歌唔同message喺唔同時空都會共通，今次就揀咗呢啲歌去分享。」除了觀眾耳熟能詳的流行曲，今次《SuBeDoWa音樂會》亦揀了一些風車草演過的音樂劇曲目，當中包括〈你咪理，我愛你，死未！〉及〈Avenue Q（Q畸大道）〉，AhDee表示：「呢兩個show係喺Broadway買返嚟，好難得可以再做返唱返啲歌俾大家聽，因為識得風車草嘅觀眾一定識得呢啲歌，佢哋應該好想再聽下。」

相比近年的演出，今次轉戰上環文娛中心劇院，阿祖表示：「今次觀眾量係細咗，但呢個親密感，令我哋返到去當初成立風車草嘅時候，就係喺呢個size嘅劇場演出。再次返回呢種距離係好夢幻，如果作為監製，計算收支係難計嘅，但作為表演者就好正，因為好近，我流一滴汗一滴眼淚，觀眾都會見到，觀眾抹一滴眼淚我都會見到，所以我覺得好正。」AhDee亦補充道：「感覺好赤裸，真性情表露無遺，同時亦等大家見到，我哋做show、做舞台就係咁，我哋同觀眾嘅交流就係咁簡單，喺咁近嘅距離，觀眾會感受到我哋最真實嘅內心情感。」阿君亦指這次演出讓她找回初心，她說：「呢個距離互動好直接，因為佢哋見到就會有反應，我哋見到又會反應，我哋一路學戲劇就係呢個初心——同觀眾要有give and take，呢個場地雖然細，但彼此之間嘅互動係好touching。」

這次離開了葵青劇院，在新環境演出，對於風車草來說是一個沉重打擊，AhDee也坦言：「冇咗葵青劇院，呢個打擊可以令風車草爭啲消失。我哋都真係好擔心，束手無策，唔知點算好，但好彩喺我哋尋找book場嘅過程得到好多幫助：康文署同上環文娛中心都俾咗機會我哋可以喺呢度做演出，咁代表我哋仲有機會可以做。其實一個做咗20多年嘅劇團，如果見到我哋今晚嘅演出，會知道我哋真係揼石仔咁捱出嚟，所以突然間冇咗一啲資源，冇咗演出機會係好驚，但世界又好多改變——多咗好多人想book場，資源分配唔同咗，所以都嘗試學習適應。」《風車草SuBeDoWa 音樂會2026》結束後，風車草劇團未有停下來，稍後8月將會推出全新劇目《回憶的味道》。AhDee透露道：「我哋好努力四周圍去搵場，嚟緊淨返仲有一個演出機會，就係8月喺西灣河文娛中心演出嘅〈回憶的味道〉，呢個係我哋仲係葵青劇院場地伙伴計劃裡面嘅時候已經plan咗嘅project，而家冇咗大場做唔緊要，我哋嘗試將我哋好想做，好想俾觀眾嘅好嘅作品，喺細嘅地方做俾大家睇，所以好驚又好期待，因為唔知之後仲有冇。」

更多有關《回憶的味道》的詳情，將於稍後公布，敬請密切留意。

風車草劇團最新劇作《回憶的味道》，於8月16日假西灣河文娛中心舉行尾場，梁祖堯、湯駿業、邵美君及彭秀慧，與觀眾在劇場內一同回味來自香港的好味道外，其中一幕更會即席下廚，在台上烹調美食，更誠邀台下觀眾品嚐。

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

（Credit_ Carmen So @ Right Eyeball Studio）

四人都做了不同的菜式，而當中都包含自家回憶的味道。梁祖堯炮製名為甜酸苦辣蝦的菜式，是團年飯菜式茄汁煎蝦碌的變奏，他特別為今次《回憶的味道》而構思。阿祖感性地表示：「今次演出《回憶的味道》，發現自己好少提起以前嘅嘢，因為諗返起以前好甜、好開心嘅回憶，諗到公公婆婆已經唔喺度，甜嘅嘢都會變酸；仲記得嘅嘢，即係未過，如果係苦辣嘅回憶，諗返起又會唔開心，所以唔鍾意諗返以前嘅嘢，不過實情係我好鍾意當下，都係充滿甜酸苦辣，都係好重要嘅，所以我哋好好享受每一種味道。」

（Credit_ Carmen So @ Right Eyeball Studio）

（Credit_ snap_shot_sammy）

（Credit_ Benny Luey）

（Credit_ Carmen So @ Right Eyeball Studio）

彭秀慧則製作了牽起她的童年回憶的冬瓜粒湯，她邊煮邊在台上說起跟家人的故事，道：「因為《回憶的味道》講返起以前食啲乜嘢，先發現自己係一個好幸福嘅小朋友，因為媽媽廚藝好厲害，但大個發現原來唔係必然，佢擺咁多時間喺廚房度，但整得再靚嘅冬瓜盅都只有我一個食。回憶系列裡面，我哋講好多自己嘅故事，記性好之餘，但同時有好多空白，尤其是係對爸爸媽媽嘅空白，當佢哋離開後處理佢哋嘅後事遺物時，先發覺原來好多嘢都唔知，但又已經搵唔到答案，所以我非常喜歡呢個系列，亦好享受其中。」

已為人母的邵美君，則送上送飯一流的螞蟻上樹，她說起自己與仔仔的往事，說：「我懷孕嗰陣媽媽話唔會幫我湊仔，但到小朋友識行識走嘅時候，我工作開始好忙，媽媽就話可以幫我睇住個仔，後來我個仔仲成日都話想去婆婆屋企，最後發現原來婆婆成日帶佢去便利店食杯麵同撈麵。而家佢已經十幾歲，我哋偶爾都會去便利店食杯麵撈麵。有次食食下撈麵，阿仔話掛住阿婆，嗰一刻我好開心，因為阿仔笑住話好掛住阿婆，我估喺佢腦海中，有好多回憶都係好開心同美好，令到佢好感動。」一路煮一路說起往事，但阿君煮到尾段才發現自己未加調味料，但卻若無其事即時倒入鑊中，爆笑全場。

湯駿業在台上煮起姨媽教他煮的南乳蓮藕炆豬腩肉來，但因為媽媽在場，所以他特別分享了跟媽媽的往事。他說：「我阿媽係健康女王，我細個嘅時候，佢煮菜一定煮到黃色，蒸魚會喺條魚熟嘅時候再蒸多3分鐘，因為佢好怕食得唔健康，穩陣啲，所以我習慣食熟啲嘅嘢，但阿媽煮南乳齋，我會連添幾碗飯，因為味濃，仲要每年過年都要整，我大咗先發現，其實呢個最能令佢奉獻佢嘅愛，而呢個的確係我阿媽嘅名菜，所以我好幸福。」在席間的湯媽媽聽到AhDee的分享，也不禁露出溫柔的笑容。

在謝幕時，阿祖感謝各位觀眾由《回憶的香港》支持到今次《回憶的味道》，而且更要多謝康文署，他表示：「喺我哋冇咗葵青劇院呢個場地後，係康文署幫我哋搵到西灣河文娛中心，仲有呢度嘅職員嘅配合，因為要喺台上面煮嘢食，唔容易批俾我哋做，佢哋可以話唔得就冇㗎喇，因為咁大煙，仲要俾觀眾食，好多好複雜嘅問題，所以好多謝場地嘅每一位，令到大家有一個咁特別嘅體驗。」《回憶的味道》過後，四人將分道揚鑣，各自有全新的舞台演出，當中包括梁祖堯與王菀之、谷祖琳、盧鎮業、胡麗英、唐劍康（當奴）合演的全新魔幻喜劇《寫不得你》，邵美君與柯煒林、鄧濤、黎濟銘、梁仲恆一同演出的趣怪新劇《尼斯湖水怪》，湯駿業「《To My Beloved One》Live 2026」個人演唱會，以及彭秀慧將於8月20日公布詳情的全新原創舞台劇，想知更多詳情，請留意風車草劇團，以及四位演員的網上社交平台專頁。