每個人的生活品味都唔同，但呢個租盤嘅「品味」就真係嚇親唔少人。近日網上流傳一則租盤廣告，有業主以月租$5,000放租屯門碼頭附近一個單位，仲大膽以「敘利亞風格裝修」作招徠，即時引來大批網民熱議，紛紛直言「睇見都唔想行入去」、「送畀我都唔要啦」。
fb圖片
日前有港人於Facebook群組「免佣套房出租」出帖放租，寫道：「屯門區近碼頭 業主免佣 敘利亞風格裝修 鄰近交通配套方便 月租5000 拎包入住 PM詳細資料」。從帖文附上的單位內部照片所見，租盤疑似為公屋單位，天花板及牆身油漆嚴重剝落，屋內一邊放了一張碌架床，另一邊則擺放了一張明顯發黃的床褥。更誇張的是，室內堆滿大量雜物，仲有輪椅、唧車同籠車，環境相當混亂。
fb圖片
fb圖片
帖文一出即引來網民瘋狂留言，有人搞笑話：「好一個敘利亞風格裝修」、「睇到個身都覺得痕」、「睇見都唔想行入去」、「送畀我都唔要啦」。亦有網民發揮創意，笑稱：「坐輪椅推電唧鏟籠車，買餸一氣呵成」，仲有人抵死話：「都冇炮彈痕跡，唔叫敘利亞風格」。
fb圖片
不過，有眼利網民就發現照片中疑似有住客出現，即留言追問：「點解瞓喺床張相要打直影？」、「點解要影自己著底褲？」場面相當尷尬。
fb圖片
另外，有網民根據單位外觀推測，該單位或位於屯門湖景邨或蝴蝶邨，質疑公屋單位是否符合出租規定。留言包括：「睇個閘都知係公屋」、「公屋租畀人係咪買咗補咗地價先？」、「湖景邨可以租畀人㗎咩？」、「蝴蝶邨好似冇租置計劃㗎喎，咁係咪即係舉報得？」一時間，呢個「敘利亞風格」租盤除了引起笑聲，亦惹來不少法律同規管上的疑問。
