度假屋驚魂！被蝙蝠「吻醒」無傷痕，11歲男童竟染上奪命狂犬病？

去郊外或者旅行去外國租度假屋放鬆下，聽落係咪好爽？但如果有一晚，你瞓瞓下覺被一隻不速之客「吻醒」，千祈唔好大意。
加拿大一個11歲嘅男童喺舊年同屋企人去咗安大略省北部一間別墅度假。有一晚，佢瞓瞓下覺，突然驚醒。一睜開眼，嚇到魂魄唔齊——一隻蝙蝠竟然停咗喺佢塊面上！男童大驚，即刻將隻蝙蝠拍走。爸爸聽到動驚，手明眼快用個鍋笠住隻蝙蝠，然後攞去屋外放生。
當時屋企人仔細檢查過，男童塊面完好無缺，冇咬痕、冇流血，隻蝙蝠睇落亦好正常。既然無傷大雅，大家就繼續享受假期。
點知，恐怖嘅病毒原來已經埋咗身。十幾日後，男童右邊面開始出現刺痛同麻木，之後塊面腫起，胃口變差。發病第4日，佢去睇急診。當地醫生睇完，推測佢只係因為疱疹病毒引起嘅面癱，開咗啲抗病毒藥就叫佢返屋企。
三日後男童開始吞嘢喉嚨痛，仲不斷嘔吐，被送入市醫院。雖然屋企人主動同醫生講返「蝙蝠單嘢」，急診醫生亦通知咗衛生部門，但醫院最後竟然診斷佢係「疱疹性齦口炎」，又畀佢出院。
出院第二日早上，男童右邊面直情癱瘓，講嘢口齒不清。喺等入院期間，佢開始發高燒、神智不清、甚至出現幻覺！當晚，病情急轉直下，被緊急送入兒童重症監護室（PICU）。
直到呢一刻，ICU醫生才猛然醒覺：呢個症狀，極度似狂犬病！入院第四日，化驗結果出爐——確診蝙蝠狂犬病毒變種。可惜一切都太遲了，男童喺住院17日後，不幸離世。
呢單個案震驚加拿大。要知狂犬病喺當地極罕見，自1924年以來全個國家只有28宗；而安大略省自1967年以來，就未出現過本地感染個案。好多人以為，狂犬病（Rabies）淨係得瘋狗症、由狗傳染。世衛數據話，全球確實有99%個案係由狗引起，但在美洲，蝙蝠先係頭號殺手！在加拿大，臭鼬同狐狸都係常見宿主。

各位旅友記，外遊住郊區，記住留意只要皮膚同蝙蝠有任何直接接觸（尤其喺瞓覺時發生），不論有冇咬痕，即刻去醫院！必須喺發病前打狂犬病針，因為呢個病一旦發病，致死率接近100%！唔係想嚇到你唔敢去郊遊，只不過大自然有大自然嘅規矩。醫生警告，蝙蝠就算帶有狂犬病，外表可以完全正常！而且蝙蝠嘅牙齒極細，咬完你可能連傷口都睇唔到。仲有，如果見到行為怪異或者死咗嘅野生動物，千祈唔好手多去摸，即刻通知當地動物管理部門。

旅行惡夢

** 博客文章文責自負,不代表本公司立場 **

去外國睇世界盃、親眼睇自己鍾意嘅球隊捧盃，相信係無數球迷嘅畢生夢想。但如果為咗呢個夢想豪花幾萬港元飛到現場，最後連球場個閘口都入唔到，呢種直落地獄嘅旅行體驗，你又想像到嗎？

2026年世界盃期間，45歲嘅蒙達爾沃就遇上咗呢場「球票蒸發」嘅恐怖經歷！

適逢父親節，蒙達爾沃諗住畀個終生難忘嘅驚喜老竇。佢喺好出名嘅二手飛網站 StubHub 豪擲 1,700 美金買咗門票，仲專程將父母由墨西哥接到達拉斯。全家嘅來回機票、酒店住宿加加埋埋，足足花咗近 6,000 美金（將近 5 萬港元）！

點知出發前一日，StubHub 突然彈出一張通知：話賣家交唔到波飛，訂單要取消！

當時達拉斯嘅世界盃飛已經炒到上天價，網站直接拒絕提供同等檔次嘅後備飛。一家人不死心，買晒機票酒店冇理由唔去，唯有硬着頭皮去到球場。直至開波前一小時，蒙達爾沃仲喺球場門口瘋狂打畀客服，結果當然係無濟於事，全家人只能喺場外食風，進退兩難。

原來，蒙達爾沃只係今次「史上最大規模票務災難」嘅其中一個受害者。背後成因，係二手飛網站一種叫「投機售票」嘅魔鬼行業操作亂象。

原來好多根本未持有波飛嘅賣家，喺網站提早掛牌開賣。佢哋本來想打如意算盤，賭臨開波時可以低價收飛、轉手牟利。點知今屆世界盃飛越炒越貴，呢班無良賣家索性直接毀約，將手頭上嘅飛轉賣畀出更高價嘅人。

最慘嘅係，平台最多只會退返買波飛嘅本金，但球迷為咗呢盛事而一早畀晒嘅機票、酒店、假期的巨額旅遊成本，根本無人賠償！

主辦方同平台依家仲互相推卸責任。其實世界盃官方表明，所有正版波飛只能經由國際足聯官網或 App 買賣。二手平台買嘅飛，都要喺官方系統過戶。StubHub 賴國際足聯個全新 App 有故障搞到過唔到戶；國際足聯就反駁話從來冇認可過第三方平台，個 App 本身冇問題。專家就直言，僅僅今屆世界盃就收到 600 幾宗相關投訴，平台絕對難辭其咎，但官方那個技術水平被網民嘲諷好似 1999 年舊軟件嘅系統，同樣令球達體驗極差。

隨着世界盃進入更刺激嘅淘汰賽，這場門票災難恐怕會愈演愈烈，隨時有更多人會被拒之門外。

各位旅友記，離港睇國際大型盛事（無論係世界盃、奧運定係超級巨星演唱會），行程安排一定要極度謹慎。唔想好似上邊位人兄咁，買飛時記住呢兩點：千萬、千萬、千萬（重要嘅嘢講三次）唔好依賴 第三方二手平台！貪一時方便或者以為有平台保障，分分鐘臨門一腳被取消。唯有官方平台、官方 App 交易先至係唯一有保障嘅途徑。

如果真係非用二手網不可，一定要做好隨時「買到假飛/被臨時取消」嘅最壞打算。訂機票酒店時，盡量選擇可以免費取消或者改期嘅方案；萬一真係買唔到飛，都要準備定「喺當地酒吧睇大電視應援」嘅 Plan B 行程，平衡下心情。

旅行係為咗買回憶，唔好畀個平台將你嘅完美假期變成大型荷包受難記。祝大家追星睇波都順順利利！