一次印度遊，腦袋竟成了 38 隻寄生蟲嘅屋企？

去旅行，大家最怕遇上咩？飛機 delay？跌銀包？定係食物中毒？
英國嘅媒體人蘿莉·丹曼（Lowri Denman）話你知，呢啲都只係小兒科。真正嘅噩夢，可以喺你返到家鄉幾年之後，先慢慢搵上門。

蘿莉某日去餐廳上廁所，點知一低頭，即嚇親！馬桶裏面有一條足足一米長、好似透明膠紙、上面有一道道棱紋嘅蟲。佢當時好驚，即刻睇醫生、驗大便，點知報告一切正常，身體又冇唔舒服。蘿莉以為沖走咗條蟲，件事就咁過去。

英國媒體人蘿莉·丹曼遊印度變成一場噩夢。網上圖片

佢發夢都估唔到，真正嘅麻煩唔係喺條腸度，而係喺佢個腦袋裏面。而呢一切嘅起點，原來係3年前佢去咗次印席旅行開始。

當時蘿莉去咗印度背包遊三個月。出發前，佢好有準備，諗住「全程食素」就一定唔會食物中毒。結果，傳染病醫生事後證實，問題偏偏就出喺唔小心混入咗素菜嘅豬肉粒入面！防到睇得見嘅肉，防唔到睇唔見嘅卵。印度當時有近六億人露天排便，糞便進入土壤同水源，形成恐怖嘅循環。蟲嘅卵，就係咁跟住生水、髒手，悄悄入咗蘿莉嘅肚。如果食咗未熟嘅豬肉，幼蟲會喺腸道長成幾米長嘅成蟲（即係馬桶嗰條）；但如果係直接吞下蟲卵，幼蟲就會穿透腸壁，跟住血液全身上下鑽，最鍾意鑽入眼球同大腦，結成一個個囊腫！醫學上叫「神經囊尾蚴病」。

有一日，蘿莉突然喺公司連講嘢都講唔清，隨即暈倒抽搐。送到醫院一照核磁共振，醫生面色凝重叫佢坐低：「蘿莉，我哋喺你個腦裏面，搵到 38 個寄生蟲囊腫。」呢個病喺英國極其罕見，因為當地有乾淨沖水廁所。但喺衛生條件差嘅地方，呢個係幾億人每日面對嘅風險。更痛苦嘅係，幾年後當呢啲蟲開始喺腦入面老死，宿主嘅免疫系統就會去清理，引發大腦嚴重水腫。蘿莉成個人出現精神錯亂、極度焦慮，甚至好似退化成小朋友咁喺地下爬。雖然蘿莉依家已經好返，但被折騰咗十幾年，亦要食一世抗癲癇藥，執返條命已經係奇蹟。

各位旅友記，無論係唔係去邊度都好，最有用嘅幾招都要成日袋住：漱口都用樽裝水，唔好用生水刷牙，飲水只飲煮滾或密封瓶裝水。生冷食物盡量Say No、街邊切好嘅新鮮生果、未煮熟嘅蔬菜，忍下口啦。
多一分老土嘅謹慎，少一場十幾年嘅噩夢！

旅行惡夢

** 博客文章文責自負,不代表本公司立場 **

去郊外或者旅行去外國租度假屋放鬆下，聽落係咪好爽？但如果有一晚，你瞓瞓下覺被一隻不速之客「吻醒」，千祈唔好大意。
加拿大一個11歲嘅男童喺舊年同屋企人去咗安大略省北部一間別墅度假。有一晚，佢瞓瞓下覺，突然驚醒。一睜開眼，嚇到魂魄唔齊——一隻蝙蝠竟然停咗喺佢塊面上！男童大驚，即刻將隻蝙蝠拍走。爸爸聽到動驚，手明眼快用個鍋笠住隻蝙蝠，然後攞去屋外放生。
當時屋企人仔細檢查過，男童塊面完好無缺，冇咬痕、冇流血，隻蝙蝠睇落亦好正常。既然無傷大雅，大家就繼續享受假期。
點知，恐怖嘅病毒原來已經埋咗身。十幾日後，男童右邊面開始出現刺痛同麻木，之後塊面腫起，胃口變差。發病第4日，佢去睇急診。當地醫生睇完，推測佢只係因為疱疹病毒引起嘅面癱，開咗啲抗病毒藥就叫佢返屋企。
三日後男童開始吞嘢喉嚨痛，仲不斷嘔吐，被送入市醫院。雖然屋企人主動同醫生講返「蝙蝠單嘢」，急診醫生亦通知咗衛生部門，但醫院最後竟然診斷佢係「疱疹性齦口炎」，又畀佢出院。
出院第二日早上，男童右邊面直情癱瘓，講嘢口齒不清。喺等入院期間，佢開始發高燒、神智不清、甚至出現幻覺！當晚，病情急轉直下，被緊急送入兒童重症監護室（PICU）。
直到呢一刻，ICU醫生才猛然醒覺：呢個症狀，極度似狂犬病！入院第四日，化驗結果出爐——確診蝙蝠狂犬病毒變種。可惜一切都太遲了，男童喺住院17日後，不幸離世。
呢單個案震驚加拿大。要知狂犬病喺當地極罕見，自1924年以來全個國家只有28宗；而安大略省自1967年以來，就未出現過本地感染個案。好多人以為，狂犬病（Rabies）淨係得瘋狗症、由狗傳染。世衛數據話，全球確實有99%個案係由狗引起，但在美洲，蝙蝠先係頭號殺手！在加拿大，臭鼬同狐狸都係常見宿主。

各位旅友記，外遊住郊區，記住留意只要皮膚同蝙蝠有任何直接接觸（尤其喺瞓覺時發生），不論有冇咬痕，即刻去醫院！必須喺發病前打狂犬病針，因為呢個病一旦發病，致死率接近100%！唔係想嚇到你唔敢去郊遊，只不過大自然有大自然嘅規矩。醫生警告，蝙蝠就算帶有狂犬病，外表可以完全正常！而且蝙蝠嘅牙齒極細，咬完你可能連傷口都睇唔到。仲有，如果見到行為怪異或者死咗嘅野生動物，千祈唔好手多去摸，即刻通知當地動物管理部門。