郭富城舊愛姚正菁回歸娛樂圈進軍樂壇 減磅爭新人獎：好似重返30年前咁忙！

息影逾三十年的昔日TVB花旦、郭富城舊愛姚正菁近期與林寶玉「孖公仔」拍住上，二人組成最強組合，為菁菁回歸娛樂圈鋪路！早前菁菁自爆錄歌進軍樂壇，有意挑戰「新人獎」外，更透露與經理人林寶玉傾MV拍攝事宜。雖然製成品未派台，但菁菁經理人公司亦不敢怠慢，開拓經理人部外，亦擴充「新世界娛樂」辦公室大展拳腳，菁菁與林寶玉隆重其事盛裝出席！

姚正菁與林寶玉近期「孖公仔」拍住上。

菁菁經理人公司除了開拓經理人部外，亦擴充「新世界娛樂」辦公室大展拳腳。

姚正菁表示現忙於「開會」、錄歌，重拾「少女時代」的忙碌：「依家最大改變就係每一日都覺得時間唔夠用，因為要去練歌、要做運動減肥、要拍一些生活或者旅行片段post上社交網站啦！原本想送花籃俾老闆，但Sam哥話唔使，出席切燒豬就得啦，好老闆唔想員工破費！」菁菁透露嚟緊會參加商演，令佢覺得非常緊張：「嚟緊都係唱歌同商演，我暫時都可以適應得到！以前主要係拍劇集，TVB嘅通告比較緊密，而家啲時間就冇咁緊張，無好似以前06:00通告，然後收廠半夜三四點咁辛苦啦。不過突然變返咁高強度嘅工作量，有啲返返去幾十年前剛入行嘅感覺。」

姚正菁

而林寶玉變身做經理人，要重新打造姚玉菁，但她就表示二人「老友鬼鬼」，更透露老闆沒有要求「跑數」：「本身同菁菁都認識，所以冇咁大壓力，當知道要做佢經理人嘅時候，個focus 只係諗點樣可以做到最好，做啲乜嘢嘢對佢係最有利，點樣令佢更加好。老闆冇俾壓力我哋，只係叫我哋做到嘅就盡量做，叫我地都唔需要俾太大壓力自己。（佢唱歌做新人？）對佢唱歌有信心，所以都開始接啲唱歌商演 ，最近都勤力練習唱歌。」

林寶玉

姚正菁、林寶玉

林寶玉早前帶姚正菁到米蘭時裝周睇騷，日前菁菁網上貼圖爆出踏上當地天橋做Model，呢次復出第一擊認真威水！姚正菁為泰國品牌在米蘭時裝周做Model，為今次表演刻意減磅，用最佳狀態出場，呢日佢身穿紫色泰國民族服亮相，不少觀眾以為她是泰國華僑，為服裝增添色彩：「 真係發夢都冇諗過會做模特兒，仲要走上國際時裝周嘅天橋， 絕對係最難忘嘅經驗之一。」

姚正菁、林寶玉

姚正菁作為「模特兒」界新人，她笑稱拉高全騷「平均年齡」：「我要多謝經理人林寶玉同埋主辦方肯畀個機會我嘗試，我見到身邊好多模特兒都係年輕嘅小妹妹，得我一個係呢個年紀嘅新人，難免都會有啲緊張，後來主辦方同我講，我散發嘅女人味係後生Model搵唔到嘅，所以證明『發夢』同年紀無關，最緊要把握每一次機會。」

姚正菁

經過今次「做Model」後，姚正菁萌生進軍時裝界的念頭：「我今次真係好興奮，想喺時裝界繼續發展，因為我覺得冇嘢係冇可能。今次行show我都擺咗個大烏龍，因為綵排嘅場地比會場細，我一路掛住『表情管理』冇細心聽書，原來會場嘅Runway有成150米長，我行咗一半就已經掉頭走，真係超級尷尬！呢次算係我一個小遺憾，希望未來有其他機會可以再行show，完完整整咁樣行晒成個天橋！」

姚正菁

姚正菁