周國賢開show以劇場式探討AI世代 木結他重現「血肉感」創作 Encore首唱新歌《仿生覺知》

周國賢（Endy）一連四場全企位音樂會《周國賢 Disconnect to… Reconnect Unplugged Live》，昨晚（7月15日）於新蒲崗Portal正式揭幕。全場550個企位賣到一票不剩，現場企到密密麻麻，熱氣逼人。Endy一開波便拿着結他自彈自唱，一口氣唱足18首歌，全場氣氛由頭燒到落尾。

周國賢一連四場全企位音樂會《周國賢 Disconnect to… Reconnect Unplugged Live》正式揭幕。

音樂會以劇場式表演探討科技與人性的關係。Endy分享靈感來自對先進時代的反思：若有一日全球停電，人類不能依賴AI及網絡，會變成如何？「自己一向對新事物慢半拍，懷念三十年前嗰種親手買工具、用汗水創作嘅『血肉感』。」所以今次特意安排部分環節得他一支木結他獨唱，重現當年寫歌的原始過程，之後樂手逐一加入，象徵找到理念相同的同伴，「成個故事構思來自一個未來世代（可能係2098年）嘅人，喺停電下嘅衝擊，希望2026年嘅觀眾睇完有所反思。」

周國賢

唱完18首，歌迷例牌狂嗌Encore，Endy乖乖出場，「今次呢個show係用咗一啲劇場式嘅方式去表演，鍾唔鍾意先？」全場即時尖叫回應：「鍾意！好好睇呀！好feel呀！」見反應熱烈，Endy即試水溫，「如果可以開part 2就好啦呵！」全場歡呼聲四起兼狂嗌：「好！」、「開part 2！」、「開巡迴！」

周國賢

周國賢

Endy滿意點頭叫好，然後為歌迷送上驚喜，「跟住落嚟真係今晚最後一首歌！呢首歌我知你哋好想唱，但係應該冇人識跟住一齊唱，因為呢首歌係一首新歌，唔係《甕中之鱉》呀，呢隻歌將會係我今年第三首派台嘅歌，唔識唱就跟住跳就得㗎啦，亦都可以跟住我嘴形估吓我唱乜，我都成日唱錯嘅，哈哈。」

周國賢

Endy透露這首壓軸新歌是跟久違的拍檔小克聯手打造，歌名難講又難記，「叫做《仿生覺知》。」然後又搞笑謂：「係乜嘢嚟嘅呢？你哋聽完首歌，自己去參透一下啦，送俾大家。」音樂一響起，全場自動波跟着節拍跳動，唱完隨即落台，不過全場五百幾人仍然未肯放過Endy，繼續釘在原地狂叫Encore近三分鐘，聲浪震動整個場地，終於Endy跟樂隊再次返回舞台，歌迷嗌爆喉嚨，Endy說：「真係冇準備，唯有唱啲我記到歌詞嘅好冇？」隨即唱出《14天》，歌迷除了喪叫更全場大合唱，將氣氛推至高峰。完場後歌迷一臉滿足，似乎準備迎接part 2的來臨。

全場大合照

日前周國賢（Endy）宣佈七月十六至十八日，於新蒲崗Portal舉行一連三場全企位《周國賢 Disconnect to… Reconnect Unplugged Live》音樂會，門票昨日（6月5日）中午一開賣，即於半小時內極速售罄。由於歌迷瘋狂搶飛，為了讓更多fans有得入場，今日（6日）主辦方正式宣佈加開一場。

周國賢

Endy表示很開心公司幫他搞這個音樂會，又笑言：「我一開頭諗住搞個新歌發佈會嘅啫，點知佢哋肯幫我搞大佢，做一個小型音樂會，好開心。」提到一年半未有開過自己show，這次半小時門票已被掃光，Endy直言好感恩：「大家而家都仲願意真金白銀嚟支持我，真係好感動嘅。」

周國賢

至於今次音樂會主題，Endy謂暫時未能透露，大賣關子話：「我以前都做過好多唔同類型嘅show，Band show有做過，好華麗嘅show有做過，自己嘅『作品展』都做過，今次希望特別啲，希望觀眾入場會有一種好似睇咗套戲嘅感覺，少少theatre感覺。新歌就當然會唱，都會將以前一啲比較經典嘅歌做一啲新嘅arrangement，希望帶啲新鮮感俾大家。」

周國賢

周國賢

Endy又特別提到，台上的樂手都是他的音樂團隊老拍檔，然後搞笑話：「我知我有啲fans都好鍾意睇佢哋嘅，哈哈。佢哋都會陪我完成呢個演出。」似乎笑稱自己fans入場是為了他的音樂團隊，而並非為了看他的演出。

周國賢