COLLAR睽違兩年再推專輯《PERSONA》 頭炮新曲淚水全記錄

由Marf邱彥筒、Gao沈貞巧、Day許軼、Candy王家晴、Winka陳泳伽、Ivy蘇雅琳及Sumling李芯駖組成的樂壇女子組合COLLAR，繼2024年推出首張 EP《Unit 1201》後，相隔近兩年，將於下月11日再度推出專輯《PERSONA》；專輯將收錄7首全新歌曲：《淚光》、《SKSKZAZA》、《刺客鬥死黨》、《初級成人禮》、《管理還管你》、《（almost) perfect girl》、《流浪足印》，其中頭炮作品《淚光》率先下周一登場，為推出的7首新歌揭開序幕。

COLLAR睽違兩年再推專輯《PERSONA》。

Marf期待樂迷反應
相隔近兩年再次出專輯，COLLAR全員表示熱切期待，當中Gao表示：「兩年後再出碟，實在覺得非常感恩，知道出碟並非一件容易嘅事，團隊同我哋都非常投入，而且傾盡全力。我個人而言，呢次大碟嘅風格跟《Unit 1201》對比起來，有一種成熟嘅感覺，上次係勇敢闖公路，今次就好似路途上遇到嘅一啲事、成長中必經嘅人生車站，感覺有啲似續集。」Marf就透露，當知道拍板推出專輯後，她專登回看《Unit 1201》，她說：「唔知點解好想快點見到新專輯面世，然後將新舊專輯一次過睇；我覺得今次歌曲會比較適合大眾嘅類型，所以好期待新作品推出同觀眾嘅反應。」

猶記得《Unit 1201》擁有強勁的製作團隊，今次《PERSONA》亦不遑多讓，雲集多位重量級音樂監製：T-Ma、徐浩、蘇道哲、陳考威等，舞蹈方面除了有外國排舞蹈師編舞外，亦有香港新生代排舞導師加入，務求以嶄新舞姿上陣。

COLLAR將於下月11日再度推出專輯《PERSONA》。

新曲風成熟感性
打頭陣的《淚光》將於下周一首播，歌曲旋律偏慢，有別於COLLAR節奏澎湃的風格，不過歌詞真摯，以記錄過去幾年COLLAR的經歷，Sumling說：「過去幾年，我哋經歷好多，有開心、有辛苦、有喊過嘅時刻，而呢首歌就係想將嗰啲『喊過之後仲會發光』嘅瞬間記錄低。我哋COLLAR試過喺排練室、喺後台、甚至喺台上忍唔住喊，但每次喊完，我哋都會抹乾眼淚繼續行。呢首歌就係想講：眼淚本身都可以係一種光，佢唔代表你輸咗，而係代表你仲有感覺，仲會痛，仲會想好返。」Winka指《淚光》的曲風是COLLAR初次嘗試，她認為：「COLLAR就嚟五歲，呢首歌有一種感性得嚟又成熟嘅感覺，我覺得好啱時機成為頭炮作品。」

頭炮作品《淚光》

Candy適合慵懶感
此外，7首歌之中，Candy表示最愛《初級成人禮》：「透過呢首歌，發現自己都幾適合嗰種慵懶感覺，因為呢首歌需要好放鬆、好慵懶感覺，所以錄音嘅時候好chill，完全可以跟住自己嘅感覺去唱。」至於Day最愛《（almost) perfect girl》與《刺客鬥死黨》，她笑說：「《（almost) perfect girl》歌詞好貼近我哋，好似寫我哋嘅故事，亦好似好多女仔嘅故事，覺得呢首歌會有好多共鳴；而鍾意《刺客鬥死黨》，因為係COLLAR初嘗試嘅曲風。」Ivy最愛《流浪足印》，Ivy指：「因為呢首係我心中，覺得屬於COLLAR嘅歌！」

COLLAR睽違兩年再推專輯《PERSONA》。

即將下月11日推出專輯《PERSONA》的樂壇女子組合COLLAR，於專輯中收錄全新7首歌曲，繼頭炮作品《淚光》登場後，年度第二首團歌《SKSKZAZA》亦於昨日（8月25日）面世。新歌《SKSKZAZA》收起《淚光》的柔和，以澎湃的曲風為主，貫徹COLLAR的跳唱風格，傳遞着「微小但強大」的信念，而MV除了到日本富士山附近取景外，更大玩古靈精怪與荒誕玩味，展現COLLAR獨有的瀟灑本色。

COLLAR推出今年第二首團歌《SKSKZAZA》。

觀看相關影片按連結：https://youtu.be/XeK9gvVb-uE

Marf首次為團歌作曲

《SKSKZAZA》由T-Ma監製、JONO編曲、王樂儀填詞、Wilma Virintie與 JONO、musicbyAP及marife作曲，歌曲看似古靈精怪，但內裡卻傳遞着「微小但強大」的正面訊息，難怪COLLAR成員Marf邱彥筒、Gao沈貞巧、Day許軼、Candy王家晴、Winka陳泳伽、Ivy蘇雅琳及Sumling李芯駖大讚歌曲具有深層意思，當中有份參與作曲的Marf表示：「其實呢首歌嘅意思係超級正，我係好鍾意，佢帶出嘅意思，係也許呢個世界好似有好多無力感，但其實我哋做嘅所有嘢都會有用、都會起緊作用，只係時間問題，別放棄。」

而Gao與Winka就認為歌曲是COLLAR一貫作風，趣怪得來，又保持勇氣，Winka指：「對我嚟講呢首歌等於瀟灑！歌詞入面有一句『食麵加果醬』我覺得幾有趣，俗世會覺得食麵加果醬係好奇怪嘅事，但係我鍾意食麵加果醬，唔需要作任何交代。」

歌曲《SKSKZAZA》由外籍排舞導師編舞，舞姿別具特色，然而COLLAR透露，在《PERSONA》中，除了《SKSKZAZA》要跳舞外，還有另外兩首歌曲都要排舞，當中Candy說：「我哋用咗兩星期左右，就排晒三首歌嘅舞，我覺得呢幾首歌都有唔同嘅難度，不過講到最難嘅一首團歌，我反而覺得係《Trouble Trouble》，冇live完整表演過呢段舞，所以如果而家叫我跳，我諗我都唔記得點跳，但我係好鍾意呢首歌嘅舞，因為排舞師加咗好多可愛嘅動作落去，令成隻舞更加鬼馬同有趣。」

斜坡拍攝顯難度

專輯《PERSONA》中的多首新歌MV，均由蕃茄作題引及貫穿，而繼《淚光》有蕃茄出現後，《SKSKZAZA》亦有蕃茄鏡頭，令不少樂迷討論，究竟蕃茄背後帶出甚麼訊息，相信有待揭曉。不過，提到蕃茄，Day透露為拍攝今次MV，差點被蕃茄「考起」，她指：「有一幕我同Marf、Gao、Ivy要喺斜坡草地度跳，然後工作人員就掟啲蕃茄落嚟，我哋不斷跳，但個斜坡係好斜，又驚踩到啲蕃茄會跌親。」至於Sumling表示，今次拍攝最難忘，莫過於在草地上拍攝的時候，被蚊子叮咬後，兩個星期仍然十分痕癢。

過往COLLAR曾為歌曲《idc》到日本拍MV，再次重臨日本拍攝，未知感覺可有不同？COLLAR指今次雖然要在3日的行程拍攝5個MV，但比上次舒服，而且在拍攝的最後一天，還可以齊齊到Outlet血拼，Ivy說：「今次拍攝唔使摸黑開始化妝，已經好感恩。而且拍攝地方喺溫泉區，收工後可以同其他成員一齊浸溫泉，玉帛相見，係十分有趣嘅體驗。最後喺上飛機前3個鐘，我哋整個團隊仲爭取到時間去Outlet購物！」