唐唐預期普選有機會高門檻

復活節假期好多人外遊，無「官」一身輕的唐唐(唐英年)都唔例外，不過身在歐洲的佢，都望住香港有關普選的討論，今日仲喺微博上載咗一張早前為政改拍的宣傳片時的相。

 

 

佢話預期今次普選行政長官安排有機會是嚴謹及高門檻的，因為萬事總有開始，所謂「萬事起頭難」，但相信辦法會比困難多。

 

佢仲呼籲應該求同存異，以大局為先，小節為後，用「一步一腳印」的方式，不淩駕基本法，不原地踏步，及不要一步到位，走出香港的普選路。

 

 

 

歐遊緊的唐唐去咗西班牙的畢爾包古根漢美術館(Guggenheim Museum Bilbao)，話呢棟大膽丶充滿創意又美麗的建築，令畢爾包呢個古舊丶缺乏吸引力的工業城市，變成吸引數以百萬計遊客。佢話諗起香港西九龍文娛藝術區，相信落成可以令香港成為國際文化的中心。唔知係咪西九都算係唐唐在任時其中一個負責的大Project，去到咁遠到掛住。

 

Ariel

** 博客文章文責自負,不代表本公司立場 **

阿爺的新華社可能怕香港復活節無新聞，尋晚整段好嘢益吓大家，新華社屬下的《新華網》發表專文，狠批李馬丁和陳四萬見美國副總統拜登爭香港民主，係「賣港求榮」的行為。

 

新華社的批評用語相當辣，話李柱銘和陳方安生到美加之行是「賣港求榮」，恭請外國勢力干涉香港內部事務，訪問全程都「竭力顛倒是非、惡意抹黑，盡顯搖尾乞憐、奴顏卑膝的醜態……當一個不明事理的外國政要或敷衍幾句，或與之唱和，他們即如獲至寶、手舞足蹈，活脫脫一副『洋奴』、漢奸的嘴臉。」

 

嘩，新華社的用詞都好狠喎，不過咁樣問題就出現啦，新華社用語咁狠即係阿爺好慶啦，既然咁慶，點解咁遲先至出招呢? 李馬丁和陳四萬4號見拜登，阿爺無即時反應，講嘢唔係幾代表官方的《環球時報》在8號率先發難，話李馬丁等訪美是「一步臭棋」。外交部到9號才表示拜登見他們是錯誤的，中方表示強烈不滿。如今再過一個星期到昨日18號才由《新華網》出重炮，《新華網》同《環球時報》唔同，《新華網》官方好多，但阿爺係遲咗兩個星期至出手。

 

Ariel相信阿爺一直忍而不發，同上星期日(13)上海那壇大龍鳯有關，泛民本來都想搵藉口唔去，若阿爺一早出重炮轟李馬丁和陳四萬，泛民肯定會支持佢地，全部拉隊唔去上海咯。阿爺唔想上海之行喎晒，唯有死忍。你睇外交部在9號的批評也只是針對美國，無針對李馬丁和陳四萬，就知阿爺係暫時留手，等上海之行完咗才郁佢地啦。