審計署一把火點著盛事基金，尤其一條條醒獅，唔單止身為基金評審委員會主席、經民聯的林健鋒有排煩，龍獅節的負責人、民建聯的陳鑑林都喺風眼上，睇怕呢次件事有排燒。
政壇高人估計，政府可以做的事情唔多，能否過關，就要睇鑑林手上係唔係有單有據，向公眾解唔到畫喇。至於林主席都可能有責任，因為成件事俾外界感覺，監管真係馬虎同粗疏。
其實去年已傳出審計署可能查盛事基金，政壇高人都話好奇怪，照計盛事基金應該都知俾人查，亦應該聞到審計署公布報告的日子架，但就好似冇乜準備咁，林主席當天唔即時回應，難怪公眾感覺唔好。
政壇高人話，相信呢次事件建制派都會幾傷，立法會到時玩權力及特權法查盛事基金，民建聯同經民聯實俾人嘈，有利益衝突，應該要避席不能投票，咁就好難夠票反對用特權法囉。自由黨對林主席都唔會太客氣，亦睇唔到會賣民建聯的帳，到時就真係大龍鳳啦。
至於最後拆唔拆得掂，就要睇負責的人自己解決，如果計劃書做大咗，咁攞的撥款點樣使，係咪有受薪員工收多咗錢，如果全部有單有據，就可能過到關，如果當中有中飽私囊，就神仙難救啦。
Ariel
** 博客文章文責自負,不代表本公司立場 **
泛民中人對阿爺的態度從來兩派，一派是反枱派，一派是講數，最近幾有趣，兩派都露面出來，各自表述。
反枱派以李馬丁為代表，佢早前和陳四萬一同見美國副總統拜登會晤，結果惹來內地官方傳媒嚴辭批評。李馬丁和陳四萬今早出席港台節目解話。馬丁說內地傳媒指他抹黑香港，卻不能指出具體抹黑了什麼，佢話自己是「是其是，非其非」。
陳四萬說美加行原本是去年底的，但因她家中有事，才延至今年3月底4月初成行。他們的說話主要是回應性的。
講數派就有民主黨委張文光和公民黨湯家驊。張文在復活節期間上電台，話上海行有兩個「新意」，一個係阿爺無講過所有泛民團體都不愛國愛港；第二個係中聯辦主任張曉明話，會於兩個月內約見無去上海的立法會議員，形式和地點不拒。張文光又話民主黨雖然未被邀請，不過，參加應該無問題，佢對於能夠同阿爺「傾偈」，態度頗為積極同正面。
早前在風頭火勢的時候，反枱派氣焰高漲，聲音佔主導，大大聲叫所有泛民不要走上海。現在上海行的爭議過去，講數派的聲音又會慢慢浮出，張文光對於今次上海行的評價，可說是以事論事的評價。睇到阿爺對政改的態度唔係鐵板一塊，中間存有可以傾的空間。
另外一位也有出席上海之行，都係講數派的公民黨湯家驊，近期被反枱派又鎚又砌，又話佢唔再關心六四。佢現在爆料，話去上海前面對強大壓力之餘，在啟程前的兩周內，外母和姨仔，不幸離世，太太最需要佢陪伴在側，湯家驊本想唔參與上海之行，但覺得此行非常重要，不應錯失與中央溝通有關普選的機會，最終都懷著「既內疚且傷心」的心情赴會。
這類比較人性化、溫和而且中肯的聲音，也只能夠在風平浪靜的時候，才能夠聽到。
