唔要就未必有更好的結局

3年零8個月，菲律賓人質事件叫做有咗個結果，死難者家屬同傷者形容，非最圓滿，但都接受。 Ariel向知情人士索料，得悉談判到最後一刻，其中一個關鍵，係雙方終於接受協議上菲方用「most sorrowful regret」字眼，而唔係家屬同傷者最初要求的「sorry」及「apologize」的字眼，而殉職領隊謝廷駿的哥哥謝志堅話，佢地同菲方官員會面時，菲方官員口頭上有「sorry」及「apologize」的道歉字眼。最後佢地接受菲方的道歉，希望事件告一段落。

  

呢個結果都可謂爭取到最後一刻，昨日特首辦主任邱騰華同保安局局黎棟國，同家屬以及傷者一直傾到凌晨點幾兩點鐘，終於達至共識，據聞特區政府主要係向家屬力陳，依家爭取的方案是最後方案，好難會攞到更多嘢，加上菲律賓選舉在即，如果呢次唔要菲方呢個方案，選舉後可能有好多變數。當然特區政府官員亦向家屬表示，如果佢哋唔接呢個方案，政府係會尊重佢哋的意見。

 

知情人士拆局，最後大家願意中間落墨，接受一個唔圓滿的結果，主要係依形勢來看，選擇唔接受呢個方案，個局好難行落去。港府一早話過，解決人質事件，一定要係家屬同傷者接受的方案，如果佢哋唔接受，港府就只能展開第二波的制裁，但港府手上的牌並唔多，要再制裁只能從輸入菲傭入手，呢個方法唔係好傷到菲政府，但就大大傷到無辜的菲傭，更傷到有需要的香港家庭，到時本地民意會唔會有變呢? 政府同家屬、傷者都要考慮呢個可能。

 

更坦白啲講，雙方拉倒的話，以菲方的行事方法，呢個解決方案必定俾佢爆出街，以示佢地已經盡咗力。到時香港市民會唔會覺得呢個方案都勉強可以接受呀，但家屬唔接受，先至要強行制裁菲傭，咁樣民意可能會反彈，家屬同政府都要面對好大壓力。就差一個強烈啲的道歉宇眼，成件事解決唔到，將來要再談判，都真係好難。喺最後關頭，家屬同傷者都係以大局為重，接受方案，令各方都舒了一口氣。

 

喺談判過程中，有知情者慨嘆，菲律賓真係一個好難纏的國家，國內亦分咗三派，軍隊、外交同內閣三個勢力，今次最唔想同香港傾的係外交勢力，反而軍隊同內閣都想快啲解決，呢舖香港若果唔係有阿爺支持，都真係好難同佢哋交手。

Ariel

** 博客文章文責自負,不代表本公司立場 **

剛被查懋聲申請清盤的亞洲電視昨日又有搞作，線人報料，亞記昨日零晨播緊感動香港人物節目時，突然爆出一個新聞簡報，報道前中共總書記江澤民在上海出現。你知亞記唔多人睇，仲要係零晨，真係無人報料就永遠無人知啦。等Ariel幫佢寫吓啦。

 

圖片來源：亞視新聞網站

段新聞有老江現身的相片，內容講老江昨日下午5點到上海市靜安區探表妹，佢由前中共中央辦公廳副主任由喜貴陪同，但不見上海市領導同行，報道仲話88歲的江澤民精神唔錯。

 

圖片來源：亞視新聞截圖

你知而家風頭火勢，好似老江呢啲前總書記現身，會引起好多聯想。妙就妙在呢段老江出現的消息，唔多見內地傳媒有報道，唔知係唔係亞記自己攞到的獨家相，睇嚟就算唔係獨家，都似係細範圍發布的相片。有少少出口轉內銷的味道。

 

大家都記得兩年前亞記錯報過老江的死訊，今次又係由亞記深宵播老江出巡，又真係幾特別噃。