容祖兒《AURA》三場爆滿加開兩場 笑言獎自己食碗魚蛋粉

容祖兒（Joey）人氣勢不可擋！由英皇娛樂主辦的《保誠保險呈獻 AURA 容祖兒演唱會》，今日（11月13日）中午公開發售，原定2027年1月18、22及23日假啟德主場館舉行的三場演出，門票開售僅半小時便全部售罄！ 面對歌迷的空前熱烈支持，主辦單位英皇娛樂即時宣布連加兩場，於1月19及24日再開騷，令演唱會由三場增至五場！新增兩場門票將於11月18日公開發售。

容祖兒《AURA》演唱會今日（13日）中午公開發售，原定2027年1月18、22及23日啟德主場館三場演出，開售僅半小時全部售罄。

祖兒昨日一早已開始工作，沒想到今日門票開售不足半小時，便收到公司通知三場全部爆滿，令她既驚喜又感動。祖兒表示：「開心又感動，今日午餐我獎自己食碗魚蛋粉！哈哈。最近其實工作期表係非常瘋狂，但係奇妙地，同今次演唱會個名《AURA》一樣，去到邊都感受到各方朋友同歌迷嘅支持，大家互相交換緊一股好強大嘅力量！所以今日覺得，都值得收工之後，放自己一晚，唔開會，唔做嘢，俾大腦休息作慶祝。」

英皇娛樂即時宣布加開1月19及24日兩場，令個唱由三場增至五場，加場門票11月18日公開發售。

雖然演唱會明年1月才正式舉行，但祖兒早已進入備戰狀態。除了日常工作排得密密麻麻，接下來更要飛往不同國家試演唱會服裝，行程緊密得隨時今日飛英國，落機睡一晚、翌日試衫，隨即又要趕回香港工作，之後再飛另一個地方。祖兒透露，11月底便會開始排舞，踏入12月會可以放下其他工作，全程投入演唱會排練。首次挑戰啟德主場館，對舞台、服裝及演出每個細節都格外重視，希望帶給歌迷一次難忘的演出。

祖兒表示開心又感動，笑言今日獎自己食碗魚蛋粉。

她又指近日工作瘋狂但感受到各方支持，決定收工後放自己一晚慶祝。

今次《AURA》是祖兒繼2019年《PRETTY CRAZY》後，相隔逾七年再度於香港舉行大型個人演唱會，更是她首次以個人演唱會形式挑戰啟德主場館。演唱會以「AURA」為主題，象徵祖兒與歌迷二十多年來互相照亮、彼此成就的深厚情誼，並邀得國際舞台設計大師Es Devlin再次合作，打造令人期待的視聽盛宴。

《AURA》加場門票將於11月18日公開發售，歌迷記得留意官方公布的售票詳情，切勿光顧黃牛。

祖兒透露11月底開始排舞，12月全程投入排練，首次挑戰啟德主場館，對舞台、服裝及演出細節格外重視。

【演唱會詳情】
《保誠保險呈獻AURA TOUR容祖兒演唱會》
主辦：EEG 英皇娛樂
冠名贊助：保誠保險
贊助：英皇鐘錶珠寶、英皇金融、國泰、百老滙、OASIS
麥麥支持：麥當勞
容光綻放：叱咤903
票務平台：HK Ticketing 、大麥
場地：啟德體育園

日期： 2027年1月18, 19, 22, 23, 24日
時間： 19:30
地點： KAI TAK STADIUM (啟德體育園主場館)
票價： HKD $1680 / $1280 / $980 / $680

加開兩場:2027年1月19及24日
加場公開發售日期 : 18/11/2026
時間 :中午12:00
快達票HK Ticketing、大麥

容祖兒近日為明年1月舉行、由英皇娛樂主辦的《保誠保險呈獻 AURA 容祖兒演唱會》密密落力宣傳，早前聯同商台舉行《903 DJ－Joey Hits Battle同容祖兒去唱K》活動，召集一眾903 DJ與她大玩唱K。森美、雲妮、朱薰、梁文禮、阿正、Elsie、余德丞、急急子、Oscar、梁子、歪歪、阿寧、Woody、Dickson、Jacky及阿酸等商台DJ幾乎全員出動，而且每人均選唱祖兒的歌曲，場面熱鬧。

容祖兒早前聯同商台舉行《903 DJ－Joey Hits Battle同容祖兒去唱K》活動。

不少DJ都選了祖兒的大熱歌曲，如《痛愛》、《怯》、《煙霞》、《特別嘉賓》、《心之科學》、《全身暑假》等，不過梁文禮則是唯一一個選了國語歌，而且亦比較偏門，「我揀呢首歌一定唔會撞，係祖兒嘅國語歌，就係《亞亞亞》，我練過一次！一次就夠啦！哈哈。」就連祖兒自己都話難唱，「歌詞又密，我自己唱都打晒『kick』，但佢都唱喎。」

梁文禮（右）

至於森美則選了《啜泣》，更自爆揀歌揀足三個鐘，「今日為咗你，我揀咗好耐歌，三個鐘頭呀！因為個個同事都揀你唔同嘅歌，啲熱播歌好難搶。去到最後我揀咗首《啜泣》。」祖兒即指《啜泣》有個位自己也覺得難，「開頭係有少少好似清唱，同埋冇乜音，要攞準個Key。」森美即笑說：「唔使擔心，我應該攞唔正個Key嘅。」隨後解釋揀歌原因，「我鍾意呢首歌嘅原因係因為呢首歌好凄美，阿夕（林夕）寫詞嘅時候，感受到嗰種女仔暗戀一個人，得唔到嗰種感覺。好似我幾十年前就暗戀咗啱啱初出道嘅祖兒嘅時候，嘩，天后，我哋呢啲小歌迷點會鍾意到佢呢？」又笑言當時的自己還是搞笑藝人，面對剛出道的祖兒，只能把暗戀心情化作「啜泣」，全場即時大笑。

森美（左）

提到演唱會選曲，祖兒透露，團隊曾多次開會討論是否加入Medley。因為過往Medley幾乎已成為她演唱會的固定環節，但今次她決定作出大膽取捨，嘗試完整演繹更多歌曲，讓每首作品保留原本的音樂面貌，「何丙直程係用咗呢兩個字：『狠心啲啦你 ！冇medley！』因為真係想原汁原味咁樣唱嗰一首歌出嚟，開頭我話好，但過咗幾日之後我又問：『係咪真㗎？』」她解釋，若每首歌均完整演唱，可選歌曲數目自然會減少，團隊需要在歌曲完整度及曲目數量之間作出取捨。祖兒又劇透，不同場次或會安排不同曲目，為觀眾帶來不一樣的歌曲。

森美、容祖兒、Elsie、阿正

問到平時唱K唱甚麼歌，祖兒坦言如果朋友叫她唱一、兩首自己的歌都會唱，「但如果要我自己點歌呢，就會盡量點人哋啲歌，因為我都係一個聽眾嚟㗎嘛，都會鍾意最近嘅一啲歌。」她透露最近一次唱K都是「攞湯令山嚟唱」，「孫燕姿都係一個必選嘅，嗰首《我不難過》，唱起上嚟都真係好難，『好難過』呀，哈哈。」

森美、阿正、容祖兒、Elsie

除了唱K，期間更即興加插「估歌仔」環節，每首歌曲只播放約兩、三秒，一眾DJ已迅速搶咪回答，而祖兒則還在思考中，初段只答對了一、兩題。有工作人員忍不住笑她，「容祖兒加油呀！你平時唔係咁嘅成績㗎喎！」祖兒即解釋：「我係八十年代㗎嘛⋯⋯」遊戲接近尾聲，朱薰也忍不住向祖兒說：「歌手答番題啦。」祖兒即謂：「我平時好叻㗎⋯⋯大家夠唔夠膽往後多十年！九十年代。」眾DJ立即贊成，阿正更笑說：「我希望睇到祖兒答啱一題先走。」最後播出王菲的《愛與痛的邊緣》，一眾DJ都未有動作，反而在等祖兒「搶」咪回答，答中後，眾人為祖兒大聲歡呼兼拍手，場面搞笑。

森美、容祖兒、Elsie、阿正

而今日（11月11日）叱咤903由早上的節目《雲妮鍾情》到凌晨的《失眠藥》，將當日唱K實況於十二個節目中陸續播出，實行作全日洗版式放送！

今次與一眾903 DJ唱K，祖兒覺得這次是一個很好的活動，「佢哋話其實就算佢哋自己都好少咁樣嘅唱K，今次因為呢個原因，大家好開心，寓工作於娛樂。」又大讚眾人不但玩得盡興，亦認真準備歌曲，其中雲妮及森美的「演出」令祖兒感到驚喜，森美認真準備歌曲，令她留下深刻印象；阿正及Elsie則排舞上陣，投入程度十足，成為活動中的娛樂擔當，「娛樂性好高嘅就係阿正同埋Elsie，覺得佢哋排晒舞，好enjoy個舞台。」她又認為，平日朋友唱K往往會怕羞，但兩人完全享受舞台，令她覺得特別好玩。