政事
林鄭競選辦班底大致形成，外界留意到，大劉劉鑾雄之子劉鳴煒，並無如外界傳聞，擔任林鄭競選辦副主任。
據悉，劉鳴煒確實諗過做副主任，但最後因個人原因而推卻，不過他仍在競選辦內幫手，估計重點聯繫年青人。
林鄭競選辦五名副主任包括大律師李律仁，骨科醫生潘德鄰、香港羽毛球代表隊前成員陳念慈、海洋公園主席孔令成，及李國寶細仔、東亞銀行副行政總裁李民斌。李國寶長子李民僑，早前也曾出席林鄭的富二代飯局。
林鄭競選辦據聞約有20職員，政壇八卦友話，核心人物來自唔同界別，估計林鄭擬透過來自各方的人員，聯繫不同界別選委。
Ariel
** 博客文章文責自負,不代表本公司立場 **
特首參選人葉劉淑儀，忽然來一招「美腿橫陳」，頓時哄堂嘩然。
究竟因何無故有咁「香艷」一幕? 話說商台主持人志雲大師（陳志雲）同葉太玩fb live直播，他問葉太有冇老花，葉太話冇。
志雲大師上次訪問另一參選人林鄭月娥時，要求林太除低眼鏡，等大家睇下佢冇戴眼鏡嘅樣子，但葉太本來就無戴眼鏡，志雲大師就問：「若果請你除一啲嘢，選擇除啲咩呢？」葉太答：「至多咪除外套。」之後就馬上除咗外套。
志雲大師大讚葉太嘅上衣、手袋、皮鞋都襯到絕，清一色藍色，就喺呢個時候，葉太竟然抬高玉腿，抬到枱面上，顯示她的藍鞋，播音室馬上一片嘩嘩嘩聲，但葉太就萬二分淡定話：「我係喜歡玩時裝嘅。」然後順便拉票：「攞啲零售票啦，我長期幫襯架。」
商台fb圖片
商台fb圖片
呢次fb live直播短短7分鐘，笑點不絕，喺呢個時候都算係難得一見嘅輕鬆場面。
