政改諮詢上周六落幕，尾段好多方案衝閘最後提交，其中一個是全國政協常委胡定旭提出的方案，惹起一點點議論。
肥胡方案在特首候選人首輪「入閘」和次輪「出閘」開跑之間，提出多一個程序，參選人「入閘」後，若有三成提委會委員動議反對某個參選人參選，又獲得六成委員通過，該人必須退選，可確保對抗中央的人不能「出閘」。
肥胡方案先建議改革提委會組成，由千二增至千六人，維持四大界別。佢建議最終出閘候選人數為三名，其中一個揀參選人的方法是若有某人「入閘」成參選人後，有三成提委會委員提出反對佢參選，此動議又獲得六成委員通過，該人則必須退選。餘下參選人人數，如不超過三名，則由提名委員會以單一議案通過，全部成為候選人，若餘下參選人超過三人，則進行一提委一票方式投票，得票最高三人成為正式候選人。
支持泛民的人睇完可能唓一聲，話都係篩選啫。的確係，但比簡單地由提委會過半數選出候選人，篩人走的難度高一點，第一要有三成提委會提出，不是求求其其有人話就去篩，要有實質證據話候選人唔夠格或對抗中央才可提出。第二是要六成提委會成員通過才可以叫人退選，已比建制派原來說的過半數即五成高。
有政壇高人話，肥佬呢個方案值得留意吓，唔係話佢個方案好得，但佢提出一個方向，若然阿爺和泛民咁啱有得傾(大家都預機會唔太大)，雙方現時南轅北轍好難傾，但肥胡呢個六成提委才可以叫人退選的機制，提出咗一個制度化的方向，增加篩選的難度，可唔可以係討論的起點？
Ariel
** 博客文章文責自負,不代表本公司立場 **
高鐵醜聞有收唔到科之勢，反對派發動立法會用特權法去查，建制派反對，一直「扮兇狠」的建制派就露底啦。
最典型的人物是立法會鐵路事宜小組主席田北辰，由於佢做過九鐵主席，又經常肯發炮鋤港鐵，所以就成為傳媒恩物，經常搵佢發炮。但到上周五立法會內會傾用唔用特權法查高鐵時，佢就要歸邊投票反對用特權法。
一投完票電台的評論都針對佢呢種「講就兇狠、做就相反」的建制派，反而完全無講其他由頭到尾都比較溫和的建制派。田二少當日解話說特權法可以傳召包括地盤工人的任何人（傳召一兩個地盤工人就再拖慢進度？），認為特權法基本上會令所有程序停頓，將來的延誤及開支會比現時更嚴重。田二少昨日再出席電台節目解話，指政府決定成立專家小組調查，顯示已察覺危機云云。
高鐵出問題，立法會用唔用特權法查件事，有不同意見好正常，真誠講出自己相信的東西就得啦，反正兩邊都有捧場客。田二少之所以被人擺上枱，只因之前佢講嘢好似反對派咁，投票時又變番建制派。佢呢啲花招反差太大，唔知玩唔玩得耐，就怕玩落去唔止建制派覺得佢係「二五」，反對派又會集中攻佢，兩面不是人喎。
