林鄭爆出個「1-1-1」減開支方案

三大特首候選人電視辯論結束，坊間議論誰輸誰輸，但公務員朋友提到辯論中林鄭爆出一個政府減開支新聞，大家都無留意。

林鄭在辯論時提問政府有大筆盈餘，政府部門為何要實施0-1-1節約方案？即部門開支第一年持平，第二年減1%，第三年再減1%。鬍鬚唔係幾答到，只係話好多部門的預算開支都用唔晒。林鄭就列出唔夠使的部門，話圖書館差不多要因此提早關門。

林鄭又話有紀律部隊寫信俾三個候選人，反映他們對0-1-1策略的不滿意見，問其他兩個候選人鬍鬚曾和胡官有無收到。就在她和鬍鬚曾爭論期間，林鄭爆了句:「好彩我提下，唔係就係1-1-1呀！」

林鄭的意思似乎是鬍鬚曾當財爺時曾經想推1-1-1節約方案，而唔係0-1-1方案。即係話3年減3個百分點，而非而家的2個百分點，在林鄭反對下，才變0-1-1，少減一個百分點。這單爆料都係新聞，好多部門而家要捱0-1-1節約方案都覺得好惡頂，何況1-1-1了？

政府內部於2015/16年度起實行「0-1-1」節約方案。早在實行前已惹起好大爭議，鬍鬚曾在2014年12月28日發表的網誌解過話，佢當時話「有朋友會問另一個問題，如果我們在今年初已經預計未來會出現盈餘，為甚麼我早前又會要求庫務科在政府內部推動所謂「0-1-1」的節約方案？」

鬍鬚曾當時自問自答話:「長遠財政計劃工作小組在今年初發表報告，建議政府分別在開源、節流、儲蓄三方面做點功夫，改善公共財政的可持續性。我認同政府有責任先做好節流工作，遂決定推出0-1-1方案，而庫務科亦向各政策局和部門清楚解釋，推行方案的目的，是希望他們可以審視各個開支項目，重新訂出優先次序，研究如何節省不必要或過時的開支，務求令公帑能夠更有效地運用，而節省下來的資源，可以投放在新的項目上面。這樣不時更新財政規劃，不單只是在財政緊張時適用，在財政寬裕時，亦同樣值得推行。」

問題是當日的長遠財政規劃未預計這幾年政府收入大升到如此程度，搞出900幾億盈餘。政府估錯數估錯得咁厲害，大筆盈餘要搵地方派，又撥入呢個基金嗰個基金。但3年前定出的節約計劃又死硬咁推落去，出現盈餘勁多但政府部門又不斷節支其至影響服務，真係有啲奇怪。

政府公務員話，高官唔識轉膊，又唔理下面辛苦，公務員都有怨氣呀。

Ariel

** 博客文章文責自負,不代表本公司立場 **

由7間電子媒體搞的特首選舉論壇結束，總體來說得個悶字，無乜勁嘢爆，亦無上屆辯論唐唐話CY「你呃人!」的猛料金句。若唔係政治發燒友，要捱兩個鐘都唔易。

睇完總體感覺是胡官和鬍鬚圍攻林鄭。而林鄭就相對克制，雖有攻擊鬍鬚，但無鬍鬚隊佢咁出力。

整個辯論鬍鬚講得比較好的是兩句金句，話林鄭「唔係CY2.0， 係撕裂2.0」，這顯然係一句由競選團隊事先設計好的金句， 鬍鬚按劇本出擊。

不過去「兩分鐘主場」互相質詢講政治時，鬍鬚就有少少失態，呢個環節係做主場的候選人有優先發言權，鬍鬚做主場時話「我主場唔該熄佢咪」，唔俾林鄭插咀(按規距可以如此)。 到林鄭做主場時，他回答時林鄭再問，鬍鬚就好慶咁話「你講哂得啦，唔使俾我講」，其實是人家主場， 的確可以插口問問題俾意見。

在互問和辯論的環節，各自就對方的弱點攻擊。林鄭問鬍鬚商會過去 9年都提出兩級利得稅制，但他9年都不接受，但在參選時突然提出 ? 鬍鬚承認確實提了好多年，但近年外國有變化，如英國脫歐後首相文翠姍減稅…說到這裏林鄭已插口，叫他回到主題，話中小企已在水深火熱中等減稅。

林鄭又問政府有大筆盈餘，政府部門為何要實施011策略，即部門開支第一年持平，第二年減1%，第三年再減1%。鬍鬚唔係幾答到，只係話好多部門的預算開支都使唔晒。林鄭就列出唔夠使的部門，話圖書館差不多要因此提早關門。

鬍鬚反隊林鄭比較入肉之處，係話林鄭講過民意與她政見相違時會辭職，而家民望比他低會否棄選。 林鄭避重就輕話同團隊研究過不同調查問法不同，又話亦有調查她的支持高3個百分點，被鬍鬚贈了一句「你信嗎？」 鬍鬚繼續攻依家網上報道辯論，林鄭在facebook上有好多嬲 豬。林鄭自認自己在facebook上是弱者，反攻鬍鬚搞facebook起步早，在政府內一早做嘢攞like like，而她自己就連上網時間都無。林鄭又話鬍鬚的政治助理阿聰搞facebook好叻， 若她當選要挖角咁話。

整場辯論林鄭表現淡定，只是答到民調時略急，但基本上予人熟書之感，講政策好實在。而鬍鬚和胡官則有點虛，但鬍鬚狙擊林鄭絕對不hea，甚至有少少太慶過火的感覺。