政府預告DSD只能讓咁多

在預先放風之下，財經事務及庫務局陳局長今日一如所料，喺立法會審議雙倍印花稅(DSD)條例草案的會議上，宣布放寬少少限制。唔通政府計過數，擔心唔夠票，所以先作少少讓步？

 

政壇高人就話計過數，政府應該唔會太擔心唔夠票，雖然建制中的商界嘈到拆天，上次「雙辣招」亦過得好凶險，但到最後泛民只是離席（變相唔反對），唔敢令到過唔的局面出現。

 

據聞政府中人亦都有汲取上次的「教訓」，唔想再發生政府同建制派中人私下講完數、結果對方又交唔到票的情況。今次策略唔同，主動講明政府找到數就係咁多架喇，明碼實價，你收唔收貨先講清楚，等大家心中都有底。

 

按依家的政治形勢嚟睇，雖然想商界背景的議員轉軚支持較難，但贊成壓抑樓價的民意仲係多數，過唔到，政府固然傷，直選的議員會更傷，相信佢哋計過數都唔太敢搞到出現過唔到的局面。

 

高人解讀，政府中人反而可能擔心，又有人拉布拖落去。今次政府出手，另一個考慮是先釋出少少善意，希望尊貴的議員高抬貴手。而且當初六個月換樓期又實在係會影響真正的用家，咁微調真係一舉兩得，咪順手推舟囉。

 

不過，據知政府內部亦都冇話掉以輕心，因為上次過雙辣招後，都有泛民議員話明會今舖玩嘢，所以都會睇得實啲形勢。

Ariel

** 博客文章文責自負,不代表本公司立場 **

今日DBC電台有條料，話今日開行會好多人媽叉運輸及房屋局張局長。

Ariel覺得似呀。呢一陣子都在官場中聽到唔少聲音，話高鐵事件搞到咁喎，同張局長搞得唔好有關，雖然呢啲評論完全唔係話要張局長問責嗰隻，但有啲不滿之情，加上行會非官守議員又有不少是政黨頭頭，佢地出來要撐政府，所以關埋門媽吓有幾出奇?

下一個問題係咁使唔使張局長問責? 官場中人第一個研判，既然舊年發展局局長阿波哥都挺得到，張局長又衰唔過波哥，應該可以挺。第二個研判，問責局長由中央任命，而家習大大以硬聞名，佢係唔係咁易讓步，隨便俾人拉中央任命的官員下台呢?

那麼正局長唔問責，咁又會唔會交個邱副局出來受死? 了解張局長人士話，佢唔似咁無義氣之人，要佢交條靚出來保住自己，佢唔會做呢啲嘢喎。路邊社傳聞事件一發生，張局長已向特首表態佢可以問責，不過未獲接納咁話。

否決各種可能性後，就剩低硬挺一條路啦。