行政會議成員張志剛昨日提到地鐵擠逼的問題，話就業改善本地多咗十幾萬人返工，係地鐵擠逼的原因。此語一出，即時俾網民圍插，指佢刻意隱瞞自由行造成地鐵擠逼的事實。
張志剛今朝再上港台解話，話逼爆地鐵的原因好多，第一個係自由行，第二個係多咗人返工，而第三個係搭巴士的人少咗。佢認為返工人數多咗，始終係造成逼爆地鐵的原因。
其實，要研究地鐵擠逼原因，可以好科學化，需要客觀研究，也要提出具體數據，以便印證，原因又肯定唔會獨沽一味。張志剛提到的所有原因，相信都有關係。另外仲有人就提到政府推出長者2元交通優惠，就鼓勵了好多老人家乘搭地鐵。另外，隨住馬鐵等新鐵路沿線屋苑的發展日漸成熟，居住人口日益增加，又會有更多人搭地鐵到中環或者尖沙咀這些心藏地帶返工。問題是咁多原因中那一個影響最大，自由行又佔多少，都要有數據有硏究才講得清。
不過，無論真相如何，這個討論難免會帶上政治色彩。Ariel有個朋友，講起搭地鐵就甚有怨氣。佢話朝早趕返工，閒閒地都要等4班車，仲要死逼爛逼才入到車廂。佢媽聲四起，話香港高官議員不食人間煙火，唔使搭地鐵返工，唔知道市民逼地鐵返工嘅苦處。我覺得公眾逼地鐵逼出的怨氣，自然會投映到自由行上面。
即使朝早返工時間自由行客唔多，但市民天天逼地鐵，但又見唔到地鐵方面有快速解決的辦法，已經好慶，再聽到唔啱聽的說話，就慶上加慶啦。結論係即使張志剛的講法未必錯，但俾人鬧都係十分自然啦！
Ariel
** 博客文章文責自負,不代表本公司立場 **
星島主席何柱國做老爺，昨晚為囝囝同新抱喺君悅酒店搞咗個酒會。本來係開心活動，但何生鬧咗《蘋果》記者五次，唔通佢有「計劃」有「預謀」要隊《蘋果》？Ariel八咗知情人士，原來事件發生有段故。
話說何生早段接受大班記者訪問，有記者問佢做老爺會唔會分花紅俾星島夥記，何生即時慶慶地，話上市公司唔能夠亂派。隔左一陣，何生愈諗愈慶，又行出嚟問那個提問記者的身份，知道他來自《蘋果》後，即刻叫佢「睇住自己公司盤數」，又話好彩無買壹仔股票，仲叫《蘋果》記者小心公司唔掂將來會俾人炒。
前前後後，出出入入，何生足足對住記者剷咗《蘋果》五次，有口痕友問係咪一早有預謀借機會發火架？
原來同特首人數有關。呢場酒會五位港澳現任同前任特首都俾足面出席，貴為主人家的何生，當然要親自出門口迎接同招呼，結果每次有現任前任特首來到，何生諗到插《蘋果》嘅point，出去見到記者就講，所以有咁啱得咁蹺，就講足五次囉！
好彩香港同澳門加加埋埋，得五位現任同前任特首，如果多幾位，何生分分鐘就插多多《蘋果》幾次喇！
