立法會創下歷史先河，第一次發生行政長官答問大會要腰斬，引發政壇炸彈，成為「花生友」又一大話題。
睇番個時間表，CY的答問大會應該到十點九，「拉布」三子去到最後半小時發難，搞吓搞吓，最後由大嚿「按劇本」掟出豆沙包，拉開大龍鳳序幕，曾主席決定趕三子離場，並暫時叫停會議，但繼續開會後長毛唔肯走，何秀蘭又發難，不滿主席的裁決，講到好勞氣吓，曾主席見咁的情況，就宣布休會算喇。計計吓，離原定結束時間都唔係差得太遠。就係咁齊齊創咗呢次有史以第一次腰斬答問大會的紀錄。
不過，場大龍鳳就未完，CY離開議事廳後，即刻喺外面的咪兜(記者的收音話筒)前，狠批議員破壞綱紀，促請立法會嚴肅處理，睇電視直播的畫面，局長們一臉嚴肅齊齊企喺CY後面撐場，都可見政府真係覺得事態嚴重。期間拉布三子繼續喺附近高聲抗議，聽得記者好辛苦先聽到CY講嘢。
跟住到建制派議員在民建聯譚Sir領軍下去到咪兜前一齊轟拉布三子阻咗佢哋時間發問，坐喺長毛隔離的馬逢國仲主動做埋「證人」，話聽到長毛叫「郁佢」，相信佢係掟「豆沙包襲擊案」的主謀，之後工聯會、經民聯輪發言。
咁仲未完，少有喺立法會發聲的行政會議召集人林煥光都出場，佢語氣溫和啲，但就係劍指議員要合理文明，又叫立法會考慮辯論議事程序。
建制派連番出招後，到長毛、大嚿、慢咇等人出場回擊，批番CY態度囂張，言詞充滿挑釁性，長毛就直接啲，承認係「想郁佢」，但自己無做錯。之後又到一班溫和泛民的立法會議員代表表態，都係齊鬧CY打擊「佔領中環」運動，恐嚇市民云云。
好喇，當然係唔少得，係「難為了家嫂」的曾主席出場解畫。
今日最忙都算係立法會的咪兜，呢場大龍鳳到底雙方有預謀定冇預謀呢，講真，激進議員掟吓嘢預咗，CY心戰室都預咗要回應，之但係搞腰斬，就似超出預計，可以話係無預謀但各自有劇本的大龍鳳啩。
Ariel
** 博客文章文責自負,不代表本公司立場 **
有雜誌報道英皇集團老闆楊受成出價5億傾買亞視。Ariel索一索料，發現空穴來風，未必無因。
楊老闆搞娛樂公司，有興趣染指電視台十分正路，聞說佢早前夥拍其他有錢人接觸亞視老闆黃炳均及王征，想出5億買佢地持有的亞記控制性股權，但王征對價錢企得好硬，一派無9、10億唔好傾咁款，所以洽談無大進展。
楊老闆已經叠水，仲要拍埋其他大水喉一齊玩，俾多幾億當然俾得起，但而家講緊買51%股權，仲要打發其他股東，然後仲要放水入亞記搞嘢，跟尾條數唔係嘢少。楊老闆數口咁精，計過只能俾5億黃炳均同王征，都係差唔多呢啲價啦。仲有附加的問題係亞記個牌就快到期，買家入主後仲要冒政府不一定續牌俾亞記的風險，你話點可以出得太多錢去買股?
王征攬住亞記好似有寶咁，佢點樣打算盤唔係普通人估得到。通訊管理局將於年底決定續唔續牌俾亞記，估計9、10月呢件事都開始轉入直路，愈近呢啲時間，愈難搵人買，事關新入局者得番三幾個月時間，要證明俾通訊局睇自己有力經營都唔係咁易。王征唔見好即收，最後真係可能渣都無。
