特首CY昨日在策發會主動諮詢委員意見，問如果削20%自由行旅客大家點睇，又問吓有何方法削減自由行?
CY咁問法，食自由行飯的委員自然彈起，包括擁有海港城和時代廣場的九倉主席吳光正，以及和吳光正友好的自由黨議員方剛等，他們反對理由包括不少商舖已簽咗租約，自由行政策變化打擊旅遊業等等。
香港近年興起反內地旅客的浪潮，出現指罵內地旅客的事件，內地民間漸生反對香港的情緒，部份部門亦有一種睇法，認為自由行係益香港的政策，但既然香港人反對，何不減縮自由行。特首CY就唔係咁想減自由行喇，怕減得太勁會打擊本地經濟，影響就業。
CY在策發會講減20%自由行，睇嚟並唔似係一個成形政策，更似係一個氣球，放出來睇大家反應。
政府高官有一種情緒，認為好多政策商界大受其惠，但人家批評時，商界及他們支持的政黨一句聲都唔出，等政府去受靶。商界政客平時專做好人，只有反政府時才會出聲攞分。咁政府都唔好咁笨啦，好似自由行咁，講明研究減少，商界唔同意，你咪出來反對做吓醜人囉。若香港反對削減自由行聲音大，又可以反過來遊說阿爺唔好減，或者唔好減咁多囉。
Ariel
** 博客文章文責自負,不代表本公司立場 **
無官一身輕的唐唐又外遊，但今次不是純粹遊玩，上周去常州出席唐氏先賢唐荊川誕辰500周年的活動，仲帶回一部講述家族史的《百年毗陵唐氏》，大派各方友好。
唐唐為呢部書寫序，都揭咗少少秘料，當年佢十幾歲去咗美國讀中學，正宗番書仔一名，冇忘記中文原來全靠唐老太的功勞。唐唐到美國後，阿媽堅持要佢用中文寫家書，到第二、三年，佢發覺自己好多中文詞語都忘記晒，寫信寄返屋企後，阿媽很快就回信，並寄埋佢寫果封信轉頭，原來唐老太將唐唐信中的錯字全部改過，等佢學番，所以佢喺美國咁多年，沒有忘記中文。
依家叫啲後生仔去咗外國，仲寫信寄番屋企，睇怕都冇乜幾個會照做，最多打個電話，send個WhatsApp，科技發達，唔知好事定壞事？！
唐唐又提到當年佢父親唐翔千喺1979年已回內地投資，原來佢爺爺曾對阿爸話：「翔千，你回來投資吧，萬一蝕本了，就算你孝敬了我。」唐翔千係改革開放初期已經率先到內地投資的第一批港商，書中就透露咗，當年唐翔千喺上海搞合資紡織廠，係上海第一間合資企業，攞咗個天字1號證書：「工商企合滬字第00001號營業執照」，開荒牛當然辛苦啲，但亦飲頭啖湯，在內地建立咗廣闊的政商界關係網啦。睇準時機，真係幾重要架。
