炒完大鑊做過渡主席

去年因為機場第三條跑道同北商業區發展搞到滿城風雨的機管局，出現戲劇化任命，本來政府預咗「積蘇」(蘇澤光)明年做完貿發局主席就走馬上任，做機管局主席，張建東延任咗一年先離職。

點知今日政府宣布張建東以私人理由唔玩喇，搵咗機管局董事局成員羅康瑞做一年的「過渡」主席，呢個安排，不禁令人「嘩」一聲。

去年本網曾報道「機管局打大交 高球地建商廈爆爭議」，張建東同羅康瑞因為高球用地爭議，打曬大交，康瑞哥力推在高球場上建商場、地下建停車場，張建東就反對，認為地下應建無人列車的車廠對機場發展為重要，兩人不和出晒面，羅康瑞更試過開會時一度離場。

張建東身為主席，得到管理層傾向佢的理念，認為機場發展優先。本來政界盛傳特首梁振英想找羅康瑞接任機管局主席一職，同機管局主流意見不同的新聞曝光後，羅康瑞請辭機管局的基建委員主席，政府又宣布張建東延任一年，相信連機管局管理層都同外界一樣，諗住康瑞哥都企埋一邊架啦，點知一個轉身竟然做一年「過渡」主席，你知啦，喺張羅打大交時，管理層總會有傾向，今次望住呢個任命真係「眼瓊瓊」，唯有望呢一年快啲過啦。

Ariel

** 博客文章文責自負,不代表本公司立場 **

立法會繼續表決《撥款條例草案》修正案，曾主席不斷重覆表決果幾句話，一路仲不斷有打鐘聲(叫啲議員返回議事廳)，成個立法會都有點悶悶哋，唔似上周咁「風起雲湧」。

話說上個禮拜四CY立法會答問會破天荒腰斬收場，隔咗成個禮拜都仲有嘢八。事後有傳媒爆料，話CY早有劇本，諗住有人掟嘢，佢拉大隊拖晒所有司、局長齊齊起身走人，實行離場抗議。點知曾主席先出手腰斬個會，搞到CY想拉隊走都唔得，唯有企喺立法會咪兜位，讀出預先準備好的講稿就走人。

事後仲傳聞添馬艦要捉鬼，點解內部討論過的「拉隊走人行動」會爆出來。

Ariel同政府中人八過，據聞就未去到話要「捉鬼」咁誇張，但就真係唔明，點解時不時喺「早禱會」（政府高層每天早上碰頭會）上傾過嘅嘢，轉個頭就俾啲傳媒知道，仲要好似身歷其境，想了解吓發生咩事喎，照計有份開「早禱會」嘅人唔算多啫。