政事
昨日有政府高官提醒Ariel留意零售數字，結果4月份本地零售銷售額按年大跌9.8%，係2003年5月沙士以來最差。我開始明白政府的絃外之音，旅客消費正在減少中，係唔係減自由行，香港人要自己決定。
有政壇八卦友話前特首煲呔曾做事瞻前顧後，現任特首CY就相當出位，好似話削20%自由行，呢啲話煲呔曾一定唔會講。因為講完之後，就有市場反應。
啱啱睇到廣東《南方周末》做咗個網上民調，睇吓內地人來港旅遊的意欲，昨日黃昏時有1200人答咗，當中有67.7%人表示一年內無計劃到香港，只有32.4%話有意願來港。而選擇不去香港的理由，最主要是「不想被歧視」，有26.2%，其次是「生活成本高」，有22.8%，第三是人太多，有22.7%。
(完整結果請看http://vote.infzm.com/vote/viewResult/483)
雖然是一個網上調查，亦反映了內地人不來港主要怕俾港人歧視。看來兩地矛盾正在升溫，而特首的策略卻是「面對矛盾」，等零售界同本土派過吓招啦。
Ariel
** 博客文章文責自負,不代表本公司立場 **
商台創辦人何佐芝突然離世，令人搖首嘆息，又一個香港傳媒界巨匠離開我們。
不要看何佐芝90多，其實佢一兩年前還十分精靈。雖然佢幾年前曾經發現膀胱癌，並且擴散到全身，但老人家新陳代謝慢，治療得法，病情慢慢受控。雖然佢亦曾經因為腰痛痛到行唔郁，但最後針灸又搞番掂，生生猛猛行得走得。
一兩年前，還有香港旅客在日本東京遇上何佐芝，見到佢在著名的料理店吃飯，旅客仲報料俾香港媒體。社交界驚嘆佢老人家過咗90仲可以出外旅遊，認真犀利。
據接近商台的消息人士話，何老身體真係轉差，始自去年11月，當時商台發生李慧玲調職事件，鬧得沸沸揚揚，商台是何佐芝一生的事業，呢啲事佢不止知情，仲會過問，更十分關心，但年紀咁大真係頂唔順情緒咁樣高低起伏，經此一役，佢身體開始唔掂。
消息人士仲話，呢幾個星期何老心情唔靚，唔係幾想食嘢，身體快速惡化，佢由行得食得到唔想食嘢，都係短短半年時間。佢呢幾日身體情況急劇轉差，最終送入養和，仲要遇上大時大節瑞午節，大家個心都沉咗半截，最後雖然過了端午，但頂多兩日，終於器官衰竭，安詳離世。何佐芝搞商台搞到如此成功，帶領電台安然渡過67暴動的大風浪，都算此生無憾矣。
