政務司司長張建宗今早上商台「政好星期天」,都想聽吓佢講人生奮鬥史。張建宗今年4月講普通話發言仲俾人笑,到昨日在習主席面前用普通話宣誓,已講得有板有眼,可以攞個最佳進步獎。佢做人如何努力,可見一斑。
今天聽張建宗上電台講嘢,最吸引注意的不是講強積金對沖,而係提到「努力不一定成功,不努力一定不成功,要努力努力再努力!」
政壇高人話,呢幾句張建宗本人適用,對香港人也適用。昨日習主席引用香港俗語,叫香港人唔好「蘇州過後無艇搭」,話全球經濟格局深度調整、國際競爭日趨激烈的背景下,香港面臨好大的挑戰,直指香港經不起折騰,經不起內耗。習主席呼籲港人利用國家的持續快速發展,為香港發展提供了難得機遇。呢啲說話值得香港細味,否則再過20年回頭望,恨錯難返。
講番張建宗,佢入政府先入新聞處做新聞主任,兩年後就派佢去英國受訓,破晒要做10年、8年才去英國受訓的紀錄,係新聞處想培養的人材,但佢決定去考AO,接受更大的挑戰,就係呢種「努力努力再努力」的思維。以前聽張建宗講過,佢做AO初期,有次星期五下午5點幾在中環遇上新聞處的老細,人地一班人放工去happy hour,佢當時要繼續返工,前老細問佢咁幸苦後唔後悔轉工,佢話唔後悔。
每個人成功都有一套,張建宗就勝在肯博肯捱。佢做過前港督尤德的助理的助理,唔係打字重複咗,真係助理的助理,因為尤德的助理是區士培,他是區士培的助理,區士培星期六、放假要揸飛機,就叫尤德有事搵張建宗,那個年代手提電話未普及,佢放假只能坐在家裏等萬一尤德有事時找他,其他人視為苦差,他就當學嘢的機會。尤德好錫佢呢個年青人,做官仕途自然更順利。
Ariel
** 博客文章文責自負,不代表本公司立場 **