政事
昨日濕度高，又熱又悶天氣下，兩壇論壇，搞到好不熱鬧。
其中好打得的林鄭出席政改研討會，到場時遇到黃之鋒等要求「公民提名」的人士，拎住個吹氣鎚仔請願，叫林鄭放棄「一鎚定音」。雙方「討論」過程報道都寫晒，但如果睇埋片，會有多一番體會。
當林鄭唔肯收個鎚仔，話「黃之鋒，你也受過教育，應該懂得怎樣尊重人……」未講完黃之鋒就收番枝咪，話︰「你覺得我唔尊重你 ?」之後就再將支咪隊向林鄭，幾乎貼到佢塊面，林鄭本能反應地向後退了一下。
眼利的朋友仲睇到，黃之鋒身體向前傾，與此同時，喺旁邊嘅韓連山就出手，拍吓黃之鋒，似叫佢冷靜番啲。
當時林鄭被成班人圍住，走嘅時候更有人衝鐵馬，要佢解釋點解唔收個鎚仔，照咁睇，即使有韓連山呢啲前輩睇住，都難以控制到呢班熱血沸騰的年輕人。
咁又係嘅，搞呢類群眾運動，最緊要有激情，如果人人都咁冷靜，就好難引發共鳴同衝向爆發點，所以呢啲熱情難擋的場面，相信都陸續有嚟啦！
想睇片，可以去以下連結︰
http://news.tvb.com/local/53943d2f6db28c8e1b000003/
Ariel
** 博客文章文責自負,不代表本公司立場 **
睇完昨日《城市論壇》，好多政界人士都腳軟。城市論壇昨日議題係「六四燭光燒向佔中政改 廿五維園肝膽兄弟鬩牆」。不過從講者組合已知，佔中政改講得唔多，兄弟鬩牆連番上演。
論壇請咗支聯會主席李卓人，熱血公民創辦人黃洋達，同公民黨毛孟靜，建制派全部唔肯嚟。全場主要係黃洋達狙擊李卓人。黃洋達不斷批評支聯會未有結合抗爭，維園六四集會「行禮如儀」，李卓人踢爆黃洋達當晚在尖沙嘴另搞集會拉票，黃洋達回應李卓人「你唔好抹黑」。黃洋達又針對李卓人無維護本土利益，成日話只針對政權，李卓人反駁話唔應該「人民對人民」，雙方又拗一大餐。好多時係嗌交，聽唔到講乜，台下也經常起哄。
過去城市論壇係一班維園阿伯狙擊泛民，如今佢地out咗啦，唔知主持人謝志峰有無懷念呢班粗口阿伯，因為佢地仍「相對」斯文。
《城市論壇》完結後，數十名熱血公民支持者包圍李卓人，指罵他「勾結共產黨」，李卓人在警員護送下才能離去。照而家本土派對泛民的局面發展落去，打交都係遲早問題。
順便講兩句毛姑姑毛孟靜，佢都有搞啲本土嘢反內地人入侵，昨日就俾黃洋達拉埋佢去打李卓人，毛姑姑當然無跟黃洋達劇本。但在呢啲愈搞愈激的本土運動中，毛姑姑呢啲溫和派無市場。雖然政界中人見到對罵咁激心驚驚，但作為剝花生睇戲者會覺得好好睇，激進有市場架。
