炳良終於有運

運輸及房屋局局長張炳良早排火燒身，海陸空中晒，先有南丫海難調查報告收唔到科，再有高鐵延誤大劑嘢，然後新機場第三跑道又開始被狙擊，民望自然大插水。跟手地鐵加完價又到九巴加價，呢啲加價嘢無市民歡迎，自然衰氣撲埋身。

不過佢終於有番啲運啦，就係九巴加價時遇上阿爺公布佢套氣勢磅礡的白皮書，遇到大片上映，九巴加價呢的三線劇自然要行埋一邊，張張報紙頭版都上大片，九巴加價唔係咁talk，炳良局長的壓力自然減少。

Ariel問官府中人，九巴加價藏身白皮書之後，係唔係公關佈局? 佢笑笑口話運氣啫運氣啫。無論如何，炳良局長黑咗咁耐，上天好公平，有番啲好運降臨佢身上都應該。 講開又講，睇報紙話炳良昨日見記者時咁講:加幅低於九巴申請幅度，認為乘客可以接受。

Ariel睇完隻眼突咗一突，唔知記者有無引錯佢，若然佢真係咁講，又何以見得「乘客可以接受」。現今社會市民要求好高，不止加價呢啲衰嘢無乜情況下可以接受，即使係好嘢認為唔夠都唔係幾接受，所以後就唔講呢啲話啦，棧俾人鬧架咋。

Ariel

** 博客文章文責自負,不代表本公司立場 **

身兼全國政協常委的九倉主席吳光正昨日出席股東會後，講咗大半個頭鐘「佔中」。事緣有消息話金管局同證監會為「佔中」做應急部署，記者就問吳光正點睇「佔中」，佢表示問完公司業務才回答這些，當記者以為佢打太極之際，點知後來吳光正不但講「佔中」，還長篇講述普選同高度自治問題。

佢勸年青人唔好「佔中」，要珍惜自己，不要為了一些得不到的事宜，犧牲自己未來30年前途。佢又話，中英聯合聲明簽署時，雙方已同意中央是對香港有主權及治權，香港是「高度自治」，而非「完全自治」。佢好似提早預告今年出爐的一國兩制實踐白皮書咁樣。

「佔中」運動鬧得如火如荼，商界心中反對，但都比較錫身，唔多想出來講，怕講完變成箭靶，不過吳主席今次又幾勇猛喎。

Ariel聽聞全國政協上個星期開咗個會，動員各委員、特別係商界委員就「佔中」多發表意見。咁阿吳主席係政協常委，仲係港區政協召集人，坐呢個領導位，有權利就有義務啦，自然要出來講吓嘢啦。