黃偉綸落區講嘢無難度

發展局局長黃偉綸新官上任，都好勤力落區，昨日行程相當緊湊，佢首先到深水埗區元州邨探訪兩位獨居長者同一個家庭，跟住就約見深水埗區議員，然後參觀咗饒宗頤文化館。

而家特首林鄭建議局長要行勻18區，同18區區議員傾偈至少個半鐘。講到傾偈呢樣嘢，就難唔到Michael Wong啦，佢當年讀書時係港大辯論隊，滔滔雄辯係佢專長，試過見到電視台記者訪問佢，佢講咗相當時間之後，個記者揸咪隻手開始震。

不過Michael昨日見深水埗區議員時，唔止佢講，仲細心聆聽區議員的訴求，好勤力咁抄筆記。發展局將相片上載facebook，形容「大家都傾到唔捨得走」。

Michael家訪時同老人家有傾有講，仲送上政府20A(回歸20週年)禮物包，以表達關懷。長者就即直表演樂器，回報Michael局長。佢訪探一個家庭時，只見小朋友在玩手機，大人講嘢唔啱細路個頻道，唔知局長的禮物有無玩具啱細路玩呢？

另外，發展局又出帖子，以「集思廣益」為題，話「為咗解決本港土地供應不足問題，發展局 Michael 局長搵緊專業人士幫手研究搵地起屋；歡迎大家畀啲建議，天馬行空嘅都歡迎㗎～」

搵地係核心問題，睇嚟Michael 局長都好開放，乜意見都歡迎喎。

Ariel

** 博客文章文責自負,不代表本公司立場 **

社交平台是政治人物接觸群眾的重要途徑，在香港則一直是反對派的天下，建制派搞Facebook從來都不是太出色，不過波哥陳健波今次就成功出位，贏到粉絲支持。

網上圖片

波哥今次出位不是靠甚麼花招，只是揀中議題敢說話，就係集中講剪布。上個星期立法會最一次財委會，最終8個議程只能過到3個，多個重要撥款如公務員加薪都未能通過，令公務員及資助機構員工大為不滿，作身為財委會主席的波哥就到電台講要修改議事規則、減少議員拉布，這無疑觸動反對派神經、削弱他們玩嘢能力，群起炮轟波哥。

在這場戰火下，波哥的回應亦好簡單，除了向傳媒多解畫，昨天還在自己的Facebook貼文及拍了段片反擊，段片只是自己齋噏，加插一些開會片段，屬低成本製作，但昨天下午放上網，都未夠24小時，條片已有3.1萬次溜覽，貼文就有逾1100個反應，當中99%是like及心心，俾嬲豬的只有7個，另還有366次分享及175個回應，都可算甚為熱烈及正面。

其實波哥上個禮拜都曾將他接受港台烽煙節目訪問的片段剪輯，都引來5.6萬人看、2100多個反應、449個分享、507個回應，今次可說食住條水。

波哥在今次自拍的片段中，主要反擊反對派聯署反對他修改議事規則建議，他羅列了若他的建議獲通過，可以慳番3成開會時間，以今年為例可以慳番20幾個鐘，等於加咗10幾次會，20幾個鐘如果用來問問題，議員問到斷氣都得，本來過唔到的民生項目就一定過得到，市民可以早啲上樓，工人多600億工程有工開，公務員加薪都可過埋。每個議員發問時間亦可由規定的15分鐘加到20幾分鐘，不會限制了議員的議政空間，只係少咗鬧官員、鬧主席、玩議事規則去拉布的時間。

雖然波哥只是自己出來齋噏解畫，但成功贏到注意、出到位，理由亦都好簡單，皆因建制派議員肯講說話捍衛剪布的根本就很少，大家都是側側膞，諗住少講少俾人鬧就算。波哥身為財委會主席，位置本身都好重要，又肯出來講，捍衛剪布呢的聲音，就吸到支持這些觀點的人，去睇他的post及撐他了。