機管局早前因北商業區發展搞完一鑊粥後，依家羅康瑞出任主席，又委任埋林天福做行政總裁，都可以集中精力搞番第三條跑道同相關項目的發展啦。
康瑞哥呢期認真好，做機管局過度主席，一年後又會做貿發局主席，唔少人關心佢會唔會紅上加紅，棄商從政，甚至選特首呢？
聞說康瑞哥最近同朋友講唔會參政，亦唔會選特首，仲講得好堅決，皆因佢母親大人極力反對康瑞哥從政，話說係廿幾年前，佢做緊基本法諮委時，阿媽就講過如果康瑞哥去選特首的話，就脫離母子關係咁話。
所以孝順仔的康瑞哥話一路都冇打算從政兼選特首，依家母親大人已94歲，更唔會去做呢啲嘢去激阿媽啦！
康瑞哥貴為瑞安主席已經夠忙，依家做埋機管局主席，都等於係另一份工，佢都非常忙，聞說一日瞓得四、五個鐘，但見佢平日都面色紅潤、精神奕奕，原來秘訣係練氣功。
Ariel的朋友話見過康瑞即席「表演」，佢雙目閉上，幾十秒後，打開的雙掌漫漫變得通紅，之後合埋，右手指可以比左手指長一厘米。原來佢練的一種帶有「入靜」的氣功強身。
市場都關心機管局咁多工程，佢身兼瑞安主席會唔會有利益衝突架？聞說康瑞哥就同朋友講過，瑞安唔會投機場所有的合約，所以唔使擔心。
Ariel
** 博客文章文責自負,不代表本公司立場 **
上周何安達、李華明、施永青等十幾人組成嘅「香港政改民意關注組」，委託嶺南大學做民調，結果都幾得意，一方面發現有51.7%受訪者認為「公民提名」沒有違反《基本法》，但另一方面同時有54%受訪者認為即使提名程序唔理想，2017年都可以先實行一人一票選行政長官，只有35.2%者認為若不滿提名程序，寧願唔要普選，呢個民調結果與今年5月時明報搞的民調結果頗一致。類似問題，有類似結果，呢種認為程序唔理想都應該選住先嘅主流民意，又被稱為「袋住先」的務實態度。
民調結果一出，佔中派大力反撲。近幾日，佔中三子、黎智英同陳方安生連日在報紙上對「袋住先」市民嘅態度，口誅筆伐。肥佬黎話方案唔好，寧願唔要普選，唔應該「袋住先」；陳四萬又話，「袋住先」態度會好危險，「因為只有中央和特區政府能重新啟動政改。」
市民的意見其實相當清楚而實際。佢哋都想有全面的民主，但如果無得揀，亦一定程度上接受有篩選嘅提名，食咗先。篩選雖然唔正，但有得選，總好過沒有。有趣嘅係，這意見不是由政府提出，而係調查出來的市民意見。但佔中派卻大力插這種民意，指「袋住先」這種諗法唔要得、危險、 戇居，叫人側目，亦俾人覺得佢啱聽就聽，唔啱聽就算係民意都話知你，民意都照砌，問題係咁佢哋代表邊個？
