中英共識不提白皮書

國務院總理李克強訪英，係佢出任總理後首次踏足英國唐寧街首相府，兩國發表共載有30條文的聯合聲明，當中第23條款提到香港，雙方認為，按照「一國兩制」方針和基本法維護和促進香港特別行政區的繁榮與穩定，符合雙方利益。

得呢句總結，睇落有啲「行貨」，今年是中英聯合聲明簽署30周年，香港各界自不然關注中英呢個時重提呢份聲明時，有冇特別新意，睇落份聲中就係得一句咁多。而喺會後的記者會上，英國首相卡梅倫講多咗一段：「今年是兩國就香港問題簽署中英聯合聲明30周年，兩國承諾確保香港繼續繁榮穩定，按一國兩制保障香港居民生活方式不變。」都係一貫的表態。

有海外媒體就分析，情況唔尋常，話留意到內地的中央媒體對呢份聲明屬冷處理。另外聲明中又無提及剛公布的「一國兩制」白皮書，而李總理喺記者會同樣無提及白皮書，解讀為顯示中央內部在香港問題上有分歧。

Ariel睇番兩國領導人發表的聯合聲明，更多內容係強調雙邊的經貿合作，仲包括埋高鐵同能源的合作，英國話歡迎中國投資英國的核電項目添，睇落更多焦點係喺經貿合作上，唔在政治議題。

Ariel收到風，中英傾掂數、唔提正係鬧到不可開交的佔中及白皮書呢啲燙手山芋問題。英國只為求財，不為求氣。早前就達賴問題已和阿爺炒咗一鑊，如今唔想再為香港問題同阿爺開波啦。

Ariel

** 博客文章文責自負,不代表本公司立場 **

立法會曾主席今日發威宣布進一步加強立法會的保安措施，可以話嚴陣以待聽日議會內外可能出現的大龍鳳。

曾主席話發現去立法會參觀的導賞團有異常狀況，有班後生仔在參觀過程中，到處影相，拍攝大樓內場地的設備，又嘗試進入各個地方。亦有持立法會出入證的人士，攞住平面圖逐層去睇，呢啲現象引起立法會職員的注意。

知情人士話，通過閉路電視，見到呢啲情形，就好似大型活動前，啲人去踩吓場睇定點走位咁，知情者仲話持有出入證的人士係一位泛民議員助理。據聞呢種情況不單令立法會行政管理委員會唔敢掉以輕心，政府高層亦都關注，並研判有理由相信衝擊活動係有預謀，唔係示威者所講的臨時起義。

聽落似係充滿摩拳擦掌的氣氛喎，難怪各方都高度關注喇。