建制派都幫唔落的星爺

又到星期五開立法會財委會，警方、立法會行政管理委員會嚴陣以待，結果係外面氣氛熱鬧，會場內亦唔執輸。

據聞建制派預咗今日財委會會剪布，早早已Call齊人，部署好晒等剪完布就表決，亦預咗泛民係咁圍繞程序玩，玩到主席星爺(吳亮星)氹氹轉架啦，不過希望硬著頭皮捱過佢啦。

建制派對財委會主席星爺有啲擔心，但就冇諗過會滴汗到咁樣的程度。星爺不停咁自制漏洞俾人攻擊，俾人講一分鐘定一加N分鐘都搞唔掂，直頭係慘不忍睹。最後被人不斷質疑，草草收場，剪布不成，笑話成籮。

散會後建制派唔少議員成肚氣，好似葉劉咁出到嚟就直指不如請卿姐主持算啦。其實呢啲都係情緒式的發洩，建制派的人都心知肚明，打緊仗時搵個泛民主持財委會會議，都唔係一個符合政治現實的想法，但俾星爺的表現，就算依家再計劃下星期剪布，都唔知佢搞唔得掂。

政府中人對呢個結果亦都冇眼睇，唯有係交個波俾立法會，強調呢個議會程序、立法會運作的問題，要政府收番新界東北撥款申請，或者重新排其他議程先上，都係不可能，此例一開，以後有爭議的議題都係嘈一下就收，好難搞。總之有一大推其他撥款申請排曬喺度，各局長亦都講咗七月休會前過唔到林林總總撥款的後果。立法會點樣審議，幾時通過，過唔到有咩後果，就要議員自己要衝量啦。

Ariel

** 博客文章文責自負,不代表本公司立場 **

國務院總理李克強訪英，係佢出任總理後首次踏足英國唐寧街首相府，兩國發表共載有30條文的聯合聲明，當中第23條款提到香港，雙方認為，按照「一國兩制」方針和基本法維護和促進香港特別行政區的繁榮與穩定，符合雙方利益。

得呢句總結，睇落有啲「行貨」，今年是中英聯合聲明簽署30周年，香港各界自不然關注中英呢個時重提呢份聲明時，有冇特別新意，睇落份聲中就係得一句咁多。而喺會後的記者會上，英國首相卡梅倫講多咗一段：「今年是兩國就香港問題簽署中英聯合聲明30周年，兩國承諾確保香港繼續繁榮穩定，按一國兩制保障香港居民生活方式不變。」都係一貫的表態。

有海外媒體就分析，情況唔尋常，話留意到內地的中央媒體對呢份聲明屬冷處理。另外聲明中又無提及剛公布的「一國兩制」白皮書，而李總理喺記者會同樣無提及白皮書，解讀為顯示中央內部在香港問題上有分歧。

Ariel睇番兩國領導人發表的聯合聲明，更多內容係強調雙邊的經貿合作，仲包括埋高鐵同能源的合作，英國話歡迎中國投資英國的核電項目添，睇落更多焦點係喺經貿合作上，唔在政治議題。

Ariel收到風，中英傾掂數、唔提正係鬧到不可開交的佔中及白皮書呢啲燙手山芋問題。英國只為求財，不為求氣。早前就達賴問題已和阿爺炒咗一鑊，如今唔想再為香港問題同阿爺開波啦。